Xalq-iqtidar birliyi sarsılmaz təməllərə söykənir

Bakı:

15 °C

94 %

1 m/s

Əlaqə

AZ RU EN

Ana səhifə / YAP xəbərləri / Xalq-iqtidar birliyi sarsılmaz təməllərə söykənir

Xalq-iqtidar birliyi sarsılmaz təməllərə söykənir

07.09.2026 [20:48]

Sentyabrın 7-də Yeni Azərbaycan Partiyası (YAP) Xətai rayon təşkilatının XIII konfransı keçirilib.

Əvvəlcə xalqımızın Ümummilli Lideri Heydər Əliyevin abidəsi ziyarət edilib, abidənin önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.

YAP Xətai rayon təşkilatının sədri Ramil Mirzəyev hesabat məruzəsi ilə çıxış edib. O, YAP-ın keçdiyi zəngin və şərəfli inkişaf yolundan, partiyanın ölkənin ictimai-siyasi həyatındakı mühüm rolundan danışaraq qeyd edib ki, Yeni Azərbaycan Partiyası Ulu Öndər Heydər Əliyevin müəyyən etdiyi siyasi xəttə sadiq qalaraq fəaliyyətini uğurla davam etdirir. Bildirilib ki, YAP Xətai rayon təşkilatı da öz fəaliyyətini partiyanın Proqram və Nizamnaməsinə uyğun şəkildə quraraq qarşıya qoyulan vəzifələrin icrasında fəal iştirak edib.

Çıxış edən Xətai Rayon İcra Hakimiyyətinin başçısı Rafiq Quliyev Yeni Azərbaycan Partiyasının siyasi sistemin aparıcı qüvvəsi olduğunu vurğulayaraq bildirib ki, rayonun ictimai həyatında partiya üzvlərinin fəal iştirakı, vətəndaşlarla mütəmadi əlaqələrin qurulması və sosial təşəbbüslərin dəstəklənməsi xüsusi əhəmiyyət daşıyır. O, qarşıdakı dövrdə də bu istiqamətdə fəaliyyətin davam etdirilməsinin vacibliyini qeyd edib.

YAP Veteranlar Şurasının sədri, partiyanın İdarə Heyətinin üzvü Arif Rəhimzadə çıxışında Yeni Azərbaycan Partiyasının zəngin siyasi ənənələrinin qorunmasının önəmini vurğulayıb. O, partiya veteranlarının təcrübəsindən səmərəli istifadə edilməsinin, onların bilik və tövsiyələrinin gənclərlə bölüşülməsinin gələcək fəaliyyət baxımından müstəsna əhəmiyyət daşıdığını qeyd edib.

Sonra çıxış edən YAP İdarə Heyətinin üzvü, Milli Məclisin deputatı Mixail Zabelin Heydər Əliyev ideyalarını yaşadan Yeni Azərbaycan Partiyasının ümumxalq etimadını doğrultduğunu bildirib. O, YAP Xətai rayon təşkilatının gələcək fəaliyyətində yeni təşəbbüslərin və layihələrin həyata keçirilməsinin vacibliyini söyləyib.

YAP İdarə Heyətinin üzvü, Bakı Ali Neft Məktəbinin rektoru Elmar Qasımov isə çıxışında gənclərin ictimai-siyasi həyatda fəal iştirakının təmin edilməsinin, onların bilik və bacarıqlarının cəmiyyətin inkişafına yönəldilməsinin vacibliyini bildirib. E.Qasımov, həmçinin gənclər arasında fəal vətəndaşlıq mövqeyinin formalaşdırılmasında partiyanın xüsusi rolunu qeyd edib.

Milli Məclisin deputatı Pərvanə Vəliyeva çıxışında qadınların və gənclərin ictimai-siyasi fəallığının artırılmasının, onların partiya fəaliyyətində daha geniş iştirakının önəmini vurğulayıb. O bildirib ki, qadınların və gənclərin təşəbbüslərinin dəstəklənməsi ictimai fəaliyyətin daha da canlanmasına və yeni ideyaların formalaşmasına imkan yaradır.

Daha sonra “SOCAR Neftqaztikinti” trestinin rəhbəri Qağaməli Seyfullayev, Xətai Rayon Ağsaqqallar Şurasının sədri Mürvət Əsgərov və Vətən Müharibəsi Qəhrəmanı Zaur Hüseynov çıxış ediblər. Çıxışlarda Prezident İlham Əliyevin siyasəti nəticəsində Azərbaycanda xalq-iqtidar birliyinin sarsılmaz təməllərə söykəndiyi bildirilib.

Konfransda YAP Xətai rayon təşkilatının hesabat dövründəki fəaliyyəti qənaətbəxş hesab edilib və Yeni Azərbaycan Partiyasının VIII Qurultayına nümayəndələr seçilib.

Tədbir Yeni Azərbaycan Partiyasının himninin səsləndirilməsi ilə başa çatıb.

Paylaş:

Baxılıb: 120 dəfə