YAP Səbail rayon təşkilatında hesabat-seçki yığıncaqları uğurla davam edir

Bakı:

23 °C

78 %

7 m/s

Əlaqə

AZ RU EN

Ana səhifə / YAP xəbərləri / YAP Səbail rayon təşkilatında hesabat-seçki yığıncaqları uğurla davam edir

YAP Səbail rayon təşkilatında hesabat-seçki yığıncaqları uğurla davam edir

11.02.2017 [10:30]

Yeni Azərbaycan Partiyası (YAP) Səbail rayon təşkilatı “Xalçaçılar” ərazi ilk partiya təşkilatında hesabat-seçki yığıncağı keçirilib. Əvvəlcə torpaqlarımız uğrunda canlarından keçmiş şəhidlərimizin, o cümlədən Azərbaycanın Milli Qəhrəmanı Çingiz Qurbanovun əziz xatirəsi bir dəqiqəlik sükutla yad edilib.
Yığıncaqda “Xalçaçılar” ərazi ilk partiya təşkilatının sədri Fuad Rəsulov hesabat məruzəsi ilə çıxış edərək 2016-cı ildə yaradılmış təşkilatda bir il ərzində görülmüş işlər haqqında ətraflı məlumat verib. O, bundan sonra da verilmiş bütün tapşırıqları əzmkarlıqla yerinə yetirməyə hazır olduqlarını vurğulayıb.
Tədbirdə çıxış edən YAP Səbail rayon təşkilatı sədrinin birinci müavini Muxtar Nağıyev qeyd edib ki, Azərbaycan Xalça Muzeyinin kollektivi arasında Yeni Azərbaycan Partiyasının üzvlərinin sayının getdikcə artması sevindirici haldır.
Yığıncaq iştirakçıları “Xalçaçılar” ərazi ilk partiya təşkilatının hesabatını qənaətbəxş qiymətləndiriblər.
Tədbirdə Azərbaycan Xalça Muzeyində YAP sıralarına yeni qəbul olunan muzey əməkdaşlarına partiya vəsiqələri təqdim edilib.
Qeyd edək ki, YAP Səbail rayon təşkilatı “7 saylı oxu zalı” (7 №-li orta məktəb) ərazi ilk partiya təşkilatında da hesabat-seçki yığıncağı keçirilib. Ərazi ilk partiya təşkilatının sədri Firəngiz Mustafayeva hesabat məruzəsi ilə çıxış edərək təşkilatın 2016-cı ildəki fəaliyyətindən, görülmüş işlərdən və qarşıda duran vəzifələrdən danışıb. Bildirib ki, təşkilatdakı YAP üzvləri istər ölkə səviyyəsində keçirilən tədbirlərdə, istərsə də rayon tədbirlərində fəal iştirak edirlər.
Hesabat məruzəsi ətrafında geniş müzakirələr aparılıb və ərazi ilk partiya təşkilatının hesabatı qənaətbəxş hesab olunub.
Tədbirdə çıxış edən YAP Səbail rayon təşkilatının Qadınlar Şurasının sədri Təranə Kərimova hesabat məruzəsini və ilk partiya təşkilatının fəaliyyətini müsbət qiymətləndirib. YAP-ın Sədri, ölkə Prezidenti İlham Əliyevin həyata keçirdiyi siyasətin uğurlarından danışan T.Kərimova bildirib ki, ölkəmizdə neft kapitalının insan kapitalına çevrilməsi üçün əsaslı işlər görülür, təhsil ocaqlarımızın maddi-texniki təchizatının yaxşılaşdırılması, yeniləşdirilməsi hər zaman dövlət başçısının və ölkənin birinci xanımı Mehriban Əliyevanın diqqət mərkəzindədir.
Qeyd edək ki, hər iki ərazi ilk partiya təşkilatının yığıncağında təşkilati məsələlərə baxılıb, sədr, idarə heyətinin üzvləri və YAP Səbail rayon təşkilatının XI konfransına nümayəndələr seçiliblər.

Paylaş:

Baxılıb: 1059 dəfə