YAP Nərimanov rayon təşkilatında 28 May Respublika Günü münasibəti ilə tədbir keçirilib

Bakı:

21 °C

88 %

6 m/s

Əlaqə

AZ RU EN

Ana səhifə / YAP xəbərləri / YAP Nərimanov rayon təşkilatında 28 May Respublika Günü münasibəti ilə tədbir keçirilib

YAP Nərimanov rayon təşkilatında 28 May Respublika Günü münasibəti ilə tədbir keçirilib

26.05.2017 [09:48]

Dünən Yeni Azərbaycan Partiyası (YAP) Nərimanov rayon təşkilatında 28 May Respublika Günü münasibəti ilə “dəyirmi masa” keçirilib. Fəal gənclərin iştirakı ilə keçirilən tədbirdə YAP Nərimanov rayon təşkilatının sədri Təmraz Tağıyev çıxış edərək bildirib ki, AXC-nin yaradılması Azərbaycan dövlətçilik tarixində xüsusi yerə malikdir: “Ümummilli lider Heydər Əliyev qeyd edirdi ki, müsəlman Şərqində ilk demokratik cümhuriyyətin məhz Azərbaycanda yaranması xalqımızın o dövrdə milli müstəqillik, azadlıq duyğusuna sahib olması ilə bağlıdır. Cümhuriyyətimiz cəmi 23 ay yaşamasına baxmayaraq, dövlət quruculuğu, parlamentarizm sahəsində ciddi fəaliyyət nümayiş etdirdi, həmçinin ordu, təhsil, mədəniyyət, sərhədlərin bərpası və bir çox sahələrdə əsaslı işlərin müsbət nəticəsi ortaya qoyuldu”.
Təşkilat sədri qeyd edib ki, Azərbaycan dövlətçiliyini, milli maraqlarımızı hər şeydən üstün tutan böyük dövlət xadimi, xalqımızın Ümummilli lideri Heydər Əliyev hər zaman Azərbaycan Xalq Cümhuriyyətinin ölkəmizin müstəqillik tarixində mühüm yerə malik olduğunu bildirirdi. Onun sözlərinə görə, Ulu öndər Heydər Əliyev müasir Azərbaycan dövlətinin məhz 1918-ci ildə yaranmış Azərbaycan Xalq Cümhuriyyətinin varisi olmasını dəfələrlə vurğulayıb: “Təsadüfi deyil ki, Azərbaycan Xalq Cümhuriyyətinin üçrəngli bayrağının ilk dəfə Naxçıvan Muxtar Respublikasında qaldırılması Ümummilli liderin adı ilə bağlıdır. Onu da qeyd etmək lazımdır ki, bu gün Xalq Cümhuriyyətinin varisi olan müasir Azərbaycan beynəlxalq müstəvidə öz müstəqil siyasəti və zəngin dövlətçilik ənənələri ilə təmsil olunur. Ümummilli lider Heydər Əliyevin ideyaları və Prezident İlham Əliyevin siyasəti nəticəsində hazırda beynəlxalq arenada özünə layiqli yer tutan Azərbaycan həm cümhuriyyət dəyərlərini yaşadır, həm də öz müstəqil siyasəti ilə fərqlənir”.
Sonra tədbirdə gənclər çıxış edərək Xalq Cümhuriyyətinin tarixi, cümhuriyyətin mövcud olduğu 23 ay ərzində qəbul olunan mühüm qərarlardan söz açıblar, müsəlman aləmində ilk demokratik respublika olan Xalq Cümhuriyyətinin dövlətçilik tariximizdə xüsusi yeri olduğunu və tariximizin bu mərhələsinə siyasi qiymətin də məhz Ümummilli lider Heydər Əliyev tərəfindən verildiyini bildiriblər. Dövlət müstəqilliyimizin qorunmasını və əbədiliyini təmin edən Ulu öndər Heydər Əliyevin dövlətçilik siyasətindən danışan natiqlər ölkəmizin bugünkü inkişafının və beynəlxalq miqyasda artan nüfuzunun Ümummilli liderin siyasi xəttinin davamçısı Prezident İlham Əliyevin siyasi fəaliyyəti, milli təəssübkeşliyi və qətiyyəti hesabına mümkün olduğunu vurğulayıblar. Çıxış edənlər əminliklə ifadə ediblər ki, işğal altında olan torpaqlarımız ölkə Prezidenti, Ali Baş Komandan İlham Əliyevin rəhbərliyi ilə tezliklə azad ediləcək, üçrəngli bayrağımız Qarabağda da dalğalanacaq.

Paylaş:

Baxılıb: 919 dəfə