YAP Masallı rayon təşkilatının IX konfransı keçirilib

Bakı:

19 °C

72 %

2 m/s

Əlaqə

AZ RU EN

Ana səhifə / YAP xəbərləri / YAP Masallı rayon təşkilatının IX konfransı keçirilib

YAP Masallı rayon təşkilatının IX konfransı keçirilib

09.06.2017 [11:30]

Dünən Yeni Azərbaycan Partiyası (YAP) Masallı rayon təşkilatının IX konfransı keçirilib. Tədbir iştirakçıları əvvəlcə Ümummilli lider Heydər Əliyevin abidəsini ziyarət edərək, önünə tər gül dəstələri düzüblər. Sonra konfrans öz işini N.Gəncəvi adına Masallı şəhər Mədəniyyət evində davam etdirib. Konfransda YAP-ın Siyasi Şurasının üzvü, Milli Məclisin deputatı Hadı Rəcəbli, Milli Məclis aparatının şöbə müdiri İbrahim Yusifzadə, YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə, Masallı rayon İcra Hakimiyyətinin başçısı Rafil Hüseynov iştirak ediblər.
YAP Masallı rayon təşkilatının sədri Seyfəddin Əliyev hesabat məruzəsi ilə çıxış edərək bildirib ki, müstəqil Azərbaycan Respublikasının banisi, Ümummilli lider Heydər Əliyev tərəfindən müəyyənləşdirilən siyasi kursun ölkə Prezidenti cənab İlham Əliyev tərəfindən qətiyyət və sədaqətlə davam etdirilməsi nəticəsində ölkəmiz ildən-ilə qüdrətlənir və inkişaf edir. Bu tərəqqini hər bir Azərbaycan vətəndaşı rifah halının yüksəlməsi, özünün sosial vəziyyətinin yaxşılaşması şəklində görür, yaşayır və hiss edir. Eyni zamanda, bütün regionlarımızda genişmiqyaslı abadlıq və quruculuq işlərinin aparılması, illərlə yığılıb qalmış problemlərin həll edilməsi, kəndlərimizin, şəhərlərimizin yenidən qurulması ölkəmizin sürətli inkişafına əyani sübutdur. Bu gün qətiyyətlə deyə bilərik ki, Azərbaycan regionun lider dövlətinə çevrilməklə bərabər, həm də beynəlxalq aləmdə güclü dövlət və etibarlı tərəfdaş kimi tanınmışdır.
Natiq daha sonra qeyd edib ki, YAP Masallı rayon təşkilatı ötən illər ərzində işini günün tələbləri səviyyəsində quraraq yüksək nəticələr əldə edib, ərazi ilk partiya təşkilatlarının sayını 90-dan 105-ə çatdırıb və partiya üzvlərinin sayı 7634 nəfərdən 11083 nəfərədək artıb. Rayon təşkilatının qeydiyyatında olan partiya üzvlərindən 29,1%-ni (3221nəfər) qadınlar, 28,2%-ni ( 3126 nəfər) isə gənclər təşkil edir. Ötən dövr ərzində partiya sıralarına 3449 nəfər daxil olub ki, onların da 37,8%-ni (1268 nəfər) qadınlar, 47%-ni (1579 nəfər) isə gənclər təşkil edir. Konfransda daha sonra Nəzarət-Təftiş Qrupunun hesabatı dinlənilib.
Tədbirdə Masallı rayon İcra Hakimiyyətinin başçısı Rafil Hüseynov çıxış edərək YAP-ın yaranma tarixi, o dövrdə baş verən proseslər haqqında geniş məlumat verib. O qeyd edib ki, Ulu öndər Heydər Əliyevin rəhbərliyi ilə Yeni Azərbaycan Partiyası ilk gündən ölkəmizin müstəqilliyinin qorunması, dövlətçiliyin möhkəmləndirilməsi, iqtisadiyyatın inkişaf etdirilməsi, demokratik təsisatların bərqərar olmasında siyasi flaqman rolunu öhdəsinə götürüb. “YAP Azərbaycan siyasi palitrasında milli siyasi iradəni təmsil edən avanqard siyasi qüvvə olaraq xalqımızın ali mənafeyini özünün fəaliyyəti boyu dolğun ifadə etməkdədir”, - deyən R.Hüseynov bildirib ki, ölkəmizdə 700 min üzvü olan partiyamızla rəqabət apara biləcək siyasi qüvvə yoxdur.
YAP Siyasi Şurasının üzvü, Milli Məclisin deputatı Hadı Rəcəbli, Milli Məclis Aparatının şöbə müdiri İbrahim Yusifzadə, YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə çıxış edərək partiyamızın ölkənin ictimai-siyasi həyatındakı rolu, keçdiyi inkişaf yolu, Prezident İlham Əliyevin rəhbərliyi ilə qazanılan uğurlarda iştirakı barədə geniş söz açıblar. Konfransda daha sonra təşkilati məsələlər müzakirə edilib. Seyfəddin Əliyev yenidən YAP Masallı rayon təşkilatının sədri seçilib. Konfransda yeni tərkibdə rayon təşkilatının Şurası, İdarə Heyəti, eləcə də Nəzarət-Təftiş Qrupu seçilib.
Səlim LOĞMANOĞLU

Paylaş:

Baxılıb: 894 dəfə