Xətai rayonunda YAP-ın yaranmasının 25-ci ildönümünə həsr olunmuş silsilə tədbirlərə start verilib

Bakı:

22 °C

68 %

4 m/s

AZ RU EN

Ana səhifə / YAP xəbərləri / Xətai rayonunda YAP-ın yaranmasının 25-ci ildönümünə həsr olunmuş silsilə tədbirlərə start verilib

Xətai rayonunda YAP-ın yaranmasının 25-ci ildönümünə həsr olunmuş silsilə tədbirlərə start verilib

30.09.2017 [11:58]

Yeni Azərbaycan Partiyasının (YAP) yaranmasının 25 illiyi ilə bağlı YAP Xətai rayon təşkilatı Tədbirlər planının icrasına start verib. Bu qəbildən olan ilk tədbir dünən YAP Xətai rayon təşkilatının 265 saylı tam orta məktəb ərazi ilk partiya təşkilatında keçirilib. Tədbiri giriş sözü ilə açan YAP Xətai rayon təşkilatının sədr müavini, 265 saylı tam orta məktəbin direktoru Yeganə Qurbanova Yeni Azərbaycan Partiyasının keçdiyi inkişaf yolundan, Ulu öndər Heydər Əliyev siyasətinin Prezident İlham Əliyev tərəfindən uğurla davam etdirilməsi nəticəsində qazanılan uğurlardan geniş bəhs edib. O, daha sonra YAP-ın xalqımız və Azərbaycan dövlətçiliyi qarşısında böyük xidmətlərindən danışıb. Y.Qurbanovanın sözlərinə görə, gələcəyə doğru inamla irəliləyən Yeni Azərbaycan Partiyası Prezident İlham Əliyevin rəhbərliyi ilə ölkəmizin daha da qüdrətlənməsi istiqamətində ciddi səylər göstərir.
Xətai rayon İcra Hakimiyyətinin şöbə müdiri Pənah İmanov bildirib ki, tarixi müstəqil Azərbaycanın tarixi ilə üst-üstə düşən Yeni Azərbaycan Partiyasının 25 ildə zəngin və şərəfli yol keçməsini şərtləndirən əsas amil təbii ki, sözlə əməl birliyidir. YAP yarandığı gündən xalqa, dövlətə xidməti fəaliyyətinin əsas xətti kimi qəbul edib. İlk gündən milyonların sevgisini qazanan partiya sıralarını kəmiyyət və keyfiyyət baxımından zənginləşlirməklə, hər bir üzvü Heydər Əliyev irsinin təbliğinə öz töhfəsini verməyə çalışır.
YAP Xətai rayon təşkilatının sədri, Milli Məclisin deputatı Hüseynbala Mirələmov YAP-ın yaranmasını zərurətdən doğan amil kimi dəyərləndirərək xüsusilə qeyd edib ki, partiya bir çox mühüm məsələlərdə üzərinə öhdəliklər götürmüş və bu öhdəlikləri şərəflə həyata keçirmişdir. O bildirib ki, YAP ölkəmizin avanqard qüvvəsi kimi xalqımızın qarşısında dayanan vəzifələrin həll edilməsinə layiqli töhfəsini verib: “Ulu öndər Heydər Əliyevin zəngin siyasi və dövlətçilik təcrübəsinə əsaslanan Yeni Azərbaycan Partiyası ölkəmizdə ən güclü, ən mükəmməl siyasi təşkilatdır və ictimai nüfuzuna görə onunla müqayisə edilə biləcək siyasi təşkilat yoxdur. Cənab Prezident, partiyamızın Sədri İlham Əliyevin vurğuladığı kimi, artıq Yeni Azərbaycan Partiyası Cənubi Qafqaz regionunun ən güclü siyasi qüvvəsidir”.
Rayon təşkilatının sədri qeyd edib ki, Azərbaycan xalqı, o cümlədən partiyamızın üzvləri bu siyasəti yüksək qiymətləndirməklə yanaşı, öz məsuliyyətlərini dərk edir və Prezident İlham Əliyevin müəyyənləşdirdiyi strateji vəzifələrin uğurla həyata keçirilməsinə, respublikamızın dinamik inkişaf edən qüdrətli dövlətə çevrilməsinə öz töhfəsini verməyə çalışırlar.
H.Mirələmov qeyd edib ki, Yeni Azərbaycan Partiyasının 25 illik fəaliyyəti dövründə ölkədə keçirilən bütün seçkilərdə uğur qazanmasını şərtləndirən əsas amillərdən biri məhz ona olan inam, həyata keçirdiyi siyasətə dəstəkdir. Partiya qələbələri ilə tutduğu yola sadiqliyini təsdiqləyib. 25 ililk zaman böyük tarixdir, mərhələdir. Daim yeniliyə, təkmilləşməyə səy göstərən Yeni Azərbaycan Partiyası hər bir seçki prosesinə qatıldığı şüarlarla Azərbaycanın davamlı inkişafına dəstəyini nümayiş etdirir.
Tədbirdə çıxış edən məktəbin müəllimləri Sevda Mürşüdova, Vüsalə Mehdiyeva, gənc üzvlər adından Nəzakət Ağamirzəyeva Yeni Azərbaycan Partiyasının üzvü olmaqdan böyük şərəf duyduqlarını bildiriblər.
YAP Xətai rayon təşkilatı Qadınlar Şurasının sədri Aygün Əhmədli bildirib ki, Ulu öndər Heydər Əliyevin yaradıcısı olduğu Yeni Azərbaycan Partiyası bu gün Prezident İlham Əliyevin rəhbərliyi altında inamla irəliləyir. Onun sözlərinə görə, 25 illik zəngin yol keçmiş Yeni Azərbaycan Partiyası bu möhkəm bunövrə üzərində daha böyük uğurlara imza atacaq, Azərbaycan daha möhtəşəm uğurları ilə dünyanın diqqətində olacaq.
Sonda məktəblilər müstəqil Azərbaycanımızın, Yeni Azərbaycan Partiyasının keçdiyi inkişaf yolunu özündə əks etdirən şeir və mahnılar ifa ediblər.

Paylaş:

Baxılıb: 893 dəfə