YAP Əzizbəyov rayon təşkilatı hədəflərinə maksimum şəkildə çatacaq

Bakı:

26 °C

78 %

9 m/s

Əlaqə

AZ RU EN

Ana səhifə / YAP xəbərləri / YAP Əzizbəyov rayon təşkilatı hədəflərinə maksimum şəkildə çatacaq

YAP Əzizbəyov rayon təşkilatı hədəflərinə maksimum şəkildə çatacaq

16.10.2009 [09:40]

“Respublika müşavirəsindən sonra rayon təşkilatının qarşısında duran vəzifələr artıq mərhələ-mərhələ yerinə yetirilməkdədir”. Bunu Yeni Azərbaycan Partiyası (YAP) Əzizbəyov rayon təşkilatının sədri Namiq Əhmədov bildirib. Onun sözlərinə görə, hazırda bələdiyyə seçkilərinə start verilməsilə əlaqədar olaraq partiyamızın Əzizbəyov rayonundan olan namizədlərinin siyahısının hazırlanması və dairə seçki komissiyalarına təqdim olunması prosesi gedir: “Əzizbəyov rayonunda mövcud olan 10 bələdiyyə üzrə 122 nəfərin namizədliyini irəli sürmək niyyətindəyik. Belə ki, Mərdəkan, Zirə, Türkan, Şüvəlan, Pirallahı bələdiyyələri üzrə hərəsinə 13 olmaqla ümumi 65 nəfərin, Binə, Buzovna bələdiyyələri üzrə hərəsinə 15 olmaqla ümumi 30 nəfərin, Şağan, Qala və Neft Daşları bələdiyyələri üzrə hərəsinə 9 olmaqla ümumi 27 nəfərin namizədliyi siyahıya daxil edilib. Düşünürük ki, bu işi həftənin sonuna qədər başa çatdıracağıq. İkinci mərhələdə isə artıq imzaların toplanması kampaniyası başlayacaq. Bu mərhələ ilə bağlı da elə bir problemimiz yoxdur. çünki, xalqın YAP-a olan böyük etimadı üzvlərimizin namizədliyinin irəli sürülməsinə geniş imkanlar yaradır. Hesab edirəm ki, YAP Əzizbəyov rayon təşkilatı hədəflərinə maksimum şəkildə nail olacaq”.
Namiq Əhmədov deyib ki, təbliğat-təşviqat kampaniyasına start verildikdən sonra YAP Əzizbəyov rayon təşkilatı sistemli şəkildə bütün rayon üzrə fəal iş aparacaq: “Bu mərhələdə artıq biz kənd-kənd, qəsəbə-qəsəbə təbliğat işi aparacağıq. Amma bu dəfə də bizim əsas məqsədimiz “gəlib bizə səs verin” demək deyil, sadəcə, rayon sakinlərinin seçki prosesində aktivliyini artırmaqdır. Yəni, insanlar Yeni Azərbaycan Partiyasına olan inamını, etimadını seçki məntəqələrində göstərməlidirlər”.
Müxalifətin “şanslarına” toxunan YAP Əzizbəyov rayon təşkilatının sədri vurğulayıb ki, sosial bazası, seçki texnologiyası, alternativ platforması olmayan müxalifət bu dəfəki seçkilərdə də məğlub olacaq: “Siyasi fəaliyyət məqsəddən və bu məqsədi reallaşdırmaq üçün vasitələrdən, ideyalardan ibarətdirsə, demək müxalifət fəaliyyətsiz bir “çürük” orqanizmdir. çünki, müxalifətin nə məqsədi, nə ideyaları, nə də fəaliyyəti nəzərə çarpır. Ona görə də xalq onlara inanmır”.
YAP Əzizbəyov rayon təşkilatı Gənclər Birliyinin sədri İbrahim Mustafayev isə gənclərin bələdiyyə seçkilərində də, əvvəlki siyasi kampaniyalardakı kimi, fəal olacağını söyləyib: “Gənclər Birliyinin əsas prinsiplərindən biri o idi ki, bu dəfəki bələdiyyə seçkilərində gənclərin namizədliyi üstünlük təşkil etsin və biz buna nail ola bilmişik. çünki, gənclər bu gün cəmiyyətimizin aparıcı fəal təbəqəsidir. Gənclərimiz intellektual potensialını idarəçilik sahəsində də reallaşdırmalıdır. Dövlətimiz gənclərimizin yüksək təhsil almasına, cəmiyyətin intellektual təbəqəsinə çevrilməsinə və idarəçilik sahəsində özünü göstərməsinə böyük şərait yaradıb”.
İ.Mustafayevin sözlərinə görə, gənclərimiz ötən prezident seçkilərində və referendumda yüksək fəallıq nümayiş etdirmişdi: “Əminəm ki, bələdiyyə seçkilərində də cəmiyyətin ən aktiv təbəqəsi kimi gənclərimiz produktiv fəaliyyət göstərəcəklər”.
“Qadınlar cəmiyyətin aparıcı üzvləri kimi, siyasi proseslərdə də aktiv iştirak etməlidirlər”, deyən YAP Əzizbəyov rayon təşkilatı Qadınlar Şurasının sədri Gülşən Yusubova bildirib ki, Əzizbəyov rayon qadınları bələdiyyə seçkilərində də aktivlik nümayiş etdirəcəklər: “Əvvəlki siyasi kampaniyalarda YAP Əzizbəyov rayon təşkilatının Qadınlar Şurası yüksək fəallıq nümayiş etdirərək böyük nailiyyətlər əldə ediblər. çalışacağıq ki, bu dəfəki siyasi kampaniyada qadınların seçkilərdə iştirak payı daha da yüksəlsin”.
Ramil VƏLİBƏYOV

Paylaş:

Baxılıb: 1601 dəfə