Azərbaycan gələcəyin layihələrini reallaşdırır

Bakı:

15 °C

94 %

2 m/s

Əlaqə

AZ RU EN

Ana səhifə / YAP xəbərləri / Azərbaycan gələcəyin layihələrini reallaşdırır

Azərbaycan gələcəyin layihələrini reallaşdırır

10.02.2023 [11:32]

İlqar İlyasov,

YAP Laçın rayon təşkilatının sədri

Azərbaycan son illərdə reallaşdırdığı bütün layihələr gələcəyə hesablanıb. Bu vəziyyət ölkəmizin gələcək perspektivlərindən xəbər verir. Vaxtı ilə BTC-ni xəyal layihəsi adlandıranlar, layihə reallaşdıqdan sonra bu addımın perspektivlərini görüb, uzaqgörən siyasətə heyran olduqlarını etiraf etdilər. O dövrdən bu dövrədək dünyada bir çox proseslər baş verib. Amma son bir ildə baş verən hadisələr dünyanın siyasi və iqtisadi düzənini daha çox dəyişdi. Enerji sferasında bu özünü daha bariz göstərir. Fevralın 3-də Cənub Qaz Dəhlizi Məşvərət Şurası çərçivəsində nazirlərin 9-cu və Yaşıl Enerji Məşvərət Şurası çərçivəsində nazirlərin 1-ci iclaslarının açılışında çıxış edən Azərbaycan Respublikasının Prezidenti İlham Əliyev cənabları deyib: “Cənub Qaz Dəhlizi Məşvərət Şurasının səkkizinci toplantısından sonra dünyada çox şey dəyişibdir. O toplantı bir il öncə burada keçirilmişdi. Dünya dəyişib, enerji təhlükəsizliyi məsələlərinin hər bir ölkə üçün əhəmiyyəti daha da artır və adətən görüşlərdə söylədiyimiz kimi enerji təhlükəsizliyi həqiqətən milli təhlükəsizlik məsələsidir”.

Ölkəmizin iqtisadi-maliyyə gücünün artmasına, Azərbaycanın və Avropanın enerji təhlükəsizliyinin təmin edilməsinə xidmət edən Cənub Qaz Dəhlizi layihəsinin bütün seqmentləri yubanmalara baxmayaraq iki ildən artıqdır ki, fəaliyyətdədir. Azərbaycan dünya bazarının böyük qaz ixracatçısına çevrilib. Vurğulanmalıdır ki, Cənub Qaz Dəhlizinin uğurla başa çatdırılması Azərbaycan üçün əhəmiyyətli və tarixi hadisə idi. Azərbaycanın təbii qaz ehtiyatlarının az olması və bu qazın Avropanın təchizatında böyük rol oynamayacağını qeyd edənlər artıq yanıldıqlarını görürlər. Prezidentin dediyi kimi; “Bu gün biz artıq TANAP-ın 16 milyard kubmetrdən 30 milyard kubmetrə qədər genişləndirilməsini nəzərdən keçiririk və TAP-ın 10 milyard kubmetrdən 20 milyard kubmetrə genişləndirilməsi haqqında danışırıq”, - o deməkdir ki, Azərbaycan həyata keçirdiyi layihələr gələcəyin layihələridir. Bütün dünyanın bu layihələrdən bəhrələnməsinə töhfə verir.

Azərbaycan enerji təchizatının davamlı şaxələndirilməsi missiyasını öz üzərinə götürüb. Ötən illər ərzində bu istiqamətdə fəaliyyət göstərmək məqsədi ilə böyük komanda formalaşıb. Məhz buna görə, əvvəlki illərdə birgə səylərimizlə görülmüş bütün işlər bu gün bizim səlahiyyətimizdədir və bizim heyətimiz daha da böyüyür. Səmərəli fəaliyyətin nəticəsidir ki, 2021-ci ildə təxminən 19 milyard kubmetr, ötən il isə 22,6 milyard kubmetr qaz ixrac olunmuşdur. Cari ildə Avropaya qaz ixracının 24,5 milyard kubmetr olması proqnozlaşdırılır. Bu, o deməkdir ki, Azərbaycan bütün Anlaşma Memorandumlarına əməl edir. Azərbaycan nəinki hasilatı, o cümlədən ixracı artırır və həmçinin onun coğrafiyasını genişləndirir, şaxələndirmə missiyasını uğurla reallaşdırır.

Bu gün respublikamızın müxtəlif bölgələrində ümumi gücü 66 MVt təşkil edən külək, 40 MVt olan günəş, 38 MVt bioenerji elektrik stansiyaları, həmçinin 32 MVt gücündə kiçik su elektrik stansiyaları istismar olunur.

Bərpa olunan enerji mənbələrindən istifadənin genişləndirilməsinin Azərbaycan Respublikasının Prezidenti İlham Əliyev tərəfindən prioritet vəzifə olaraq irəli sürüldüyü və 2030-cu ilədək elektrik enerjisinin qoyuluş gücündə payının 30 %-ə çatdırılmasının (hazırda 17 % təşkil edir) hədəf kimi müəyyənləşdirildiyi nəzərə alınmaqla bu istiqamətdə bir çox işlər görülür.

Prezident tədbirdə çıxışında bildirmişdir ki, Xəzər dənizində külək enerjisi potensialı 157 qiqavatdır. Quruda isə külək və günəş enerjisi potensialı 27 qiqavatdır. Vətən müharibəsi nəticəsində işğaldan azad edilmiş ərazilərdə külək və günəş enerjisi potensialı 10 qiqavatdan çoxdur. Hazırda 500 meqavatlıq günəş enerjisi stansiyasının tikilməsinə dair danışıqlar aparılır. Gələcəyə doğru hesablanmış bu layihələr Avropa qitəsində həm təbii qaz, həm də bərpaolunan enerji istehsalı ilə bağlı gələcək planlarımızın uğurlu olacağından xəbər verir. Bunun üçün Azərbaycanda formalaşmış komanda mövcuddur. Sadəcə işə konseptual yanaşmaq, məsuliyyətli və beynəlxalq qurumlarla hərtərəfli əməkdaşlıq vacibdir.

Paylaş:

Baxılıb: 393 dəfə