Elmin zirvəsinə yüksələn alim Fikrət Əliyev

Bakı:

11 °C

87 %

7 m/s

Əlaqə

AZ RU EN

Ana səhifə / Xəbər lenti / Elmin zirvəsinə yüksələn alim Fikrət Əliyev - 75

Elmin zirvəsinə yüksələn alim Fikrət Əliyev - 75

13.08.2024 [17:24]

Alim ömrünü çox doğru olaraq yanan şama bənzədirlər. Şam yandıqca ətrafa ziya saçır, qaranlığı işıqlandırır. Alim də belədir. O da təmsil etdiyi ölkəni, xalqı, cəmiyyəti aydınlığa çıxartmaq üçün daim fədakarlıqlar göstərir, yuxusuz gecələr keçirir, nail olduğu ixtiralarla həyatımıza yeni rahatlıqlar gətirir. Belə aydınlarımızdan biri də AMEA-nın Rəyasət Heyətinin üzvü, Bakı Dövlət Universitetinin Tətbiqi Riyaziyyat Elmi-Tədqiqat İnstitutunun direktoru, Türk Dünyası Riyaziyyat Cəmiyyətinin vitse-prezidenti, akademik Fikrət Əliyevdir.

Fikrət Əhmədəli oğlu Əliyev 1949-cu il avqust ayının 13-də Qərbi Azərbaycanın Zəngəzur mahalının Nüvədi kəndində ziyalı ailəsində anadan olub. Onun uşaqlığı, yeniyetməlik dövrü qaynar bir dövrə təsadüf edir. Düzdür, o dövrdə komputer yox idi. Ancaq məktəblərdə, ailələrdə təhsilə böyük maraq var idi. Şagirdlər bir-biri ilə sözün yaxşı mənasında rəqabət aparır, çoxlu mütaliə edir, dərslərində fərqlənməyə çalışırdılar. O dövrün əksər gənclərinin xəyalları Bakıya uçurdu. Onlar burada instituta daxil olmaq və təhsillərini başa vurduqdan sonra elə ali məktəbdə qalıb işləmək, müdafiə edib alim olmaq barədə planlar qururdular. Bu cəhətdən Fikrət də yaşıdlarından fərqlənmirdi. O, 1966-cı ildə orta məktəbi bitirərək arzularının qanadında Azərbaycan Dövlət Universitetinin (indiki BDU) mexanika-riyaziyyat fakültəsinə daxil olub. F.Əliyev 1971-ci ildə həmin fakültəni bitirərək aspiranturaya daxil olub, 1975-ci ildə Ukrayna EA-nın Riyaziyyat İnstitutunda (Kiyev) namizədlik dissertasiyasını, 1990-cı ildə isə Moskva şəhərində fizika-riyaziyyat elmləri doktoru dərəcəsini almaq üçün doktorluq dissertasiyasını müdafiə edib.

Fikrət Əliyev 1975-ci ildən 1992-ci ilədək Azərbaycan EA Riyaziyyat və Mexanika İnstitutunda kiçik, baş elmi işçi, 1992-1993-cü illərdə İstanbul Texniki Universitetinin (Türkiyə) professoru olub, 1993-cü ildən indiyədək BDU-nun Tətbiqi Riyaziyyat ETİ-nin direktoru vəzifəsində calışır. O, 2001-ci ildə Azərbaycan Milli Elmlər Akademiyasına informatika ixtisası üzrə akademik seçilib. 1994-cü ildən etibarən F.Əliyevin rəhbərliyi ilə müntəzəm olaraq institutun elmi seminarı keçirilir. Seminarda əcnəbi alimlər, ölkəmizin müxtəlif elmi mərkəzlərində, universitetlərində çalışan alimlər elmi məruzələrlə çıxış edirlər.

Çoxlu alim yetişdirən, Azərbaycan elmini ölkə hüdudlarından kənarda da layiqincə təmsil edən Fikrət Əliyev müxtəif təltiflərə layiq görülüb. Belə ki, o, Azərbaycanın “Tərəqqi”, Rumıniyanın Riyaziyyat Cəmiyyətinin 100 illiyinə həsr olunmuş xatirə, Qazaxıstanın Əl-Fərabi adına Milli Universitetin Yubiley medalları ilə təltif olunub. Onun özü bütün mükafatlarını Azərbaycan adına qazandığını və bununla böyük fəxarət hissi keçirdiyini bildirir. 75 yaşı tamam olan görkəmli alimimizi təbrik edir və ona möhkəm cansağlığı, yeni-yeni elmi nailiyyətlər arzulayırıq.

"Yeni Azərbaycan" qəzeti

Paylaş:

Baxılıb: 642 dəfə