İtaliyada Azərbaycanın Zəfər Günü qeyd edilib

Bakı:

19 °C

72 %

3 m/s

Əlaqə

AZ RU EN

Ana səhifə / Xəbər lenti / İtaliyada Azərbaycanın Zəfər Günü qeyd edilib

İtaliyada Azərbaycanın Zəfər Günü qeyd edilib

08.11.2024 [15:59]

8 Noyabr - Zəfər Günü Azərbaycanın İtaliyadakı səfirliyinin tabeliyindəki Mədəniyyət Mərkəzində qeyd olunub.

AZƏRTAC xəbər verir ki, tədbirdə İtaliya rəsmiləri və akademik dairələrin nümayəndələri, səfirlər və diplomatlar, bu ölkədə yaşayan həmvətənlərimiz iştirak ediblər.

Əvvəlcə Azərbaycanın Dövlət Himni səsləndirilib, torpaqlarımızın azadlığı uğrunda canlarından keçmiş vətən övladlarının xatirəsi ehtiramla yad olunub.

Azərbaycanın İtaliyadakı səfiri Rəşad Aslanov Zəfər Gününün ölkəmiz üçün böyük önəm kəsb etdiyini bildirib. Ermənistanın ötən əsrin 90-cı illərinin əvvəlində Azərbaycan torpaqlarına ərazi iddiaları ilə çıxış etdiyini və ölkəmizə qarşı hərbi təcavüzə başladığını xatırladan səfir 30 ilə yaxın müddət ərzində ərazilərimizin 20 faizinin hərbi işğal altında qaldığını, etnik təmizləmə siyasəti nəticəsində 1 milyondan çox azərbaycanlının öz yurdundan didərgin düşdüyünü bildirib.

Diplomat ərazilərinin işğalı və vətəndaşlarının hüquqlarının pozulmasi ilə barışmayan Azərbaycanın Ermənistanın bu işğalçı siyasətinin və onun nəticələrinin beynəlxalq ictimaiyyətin diqqətinə çatdırılması istiqamətində böyük iş apardığını qeyd edib. Bildirib ki, bütün aparıcı beynəlxalq təşkilatlar, xüsusilə də BMT Təhlükəsizlik Şurası Azərbaycan ərazilərinin Ermənistan tərəfindən işğalı faktını tanıyan, Ermənistan qoşunlarının Azərbaycan ərazilərindən dərhal, tam və qeyd-şərtsiz çıxarılmasını tələb edən qətnamələr qəbul edib. Lakin buna baxmayaraq, Ermənistan 30 ilə yaxın müddət ərzində bu qətnamələrin tələblərini yerinə yetirməyib, xüsusilə də təxribatçı bəyanatlar və addımlar ataraq danışıqlar prosesini məqsədyönlü şəkildə tamamilə pozub, bir daha özünün əsl məqsədinin Azərbaycan ərazilərini ilhaq etməkdən ibarət olduğunu nümayiş etdirib.

Rəşad Aslanov 2020-ci il sentyabrın 27-də başlayan və 44 gün davam edən Vətən müharibəsi nəticəsində müzəffər Azərbaycan Ordusunun işğalda qalmış ərazilərimizi və bütün azərbaycanlılar üçün əziz olan Şuşa şəhərini azad etdiyini bildirib. Qeyd edib ki, münaqişədən sonrakı dövrdə Azərbaycan regionda yeni geosiyasi reallıqlar yaradıb, hazırda sülh və inkişaf gündəliyini təşviq edir. Bildirib ki, Azərbaycan işğal dövründə Ermənistan tərəfindən minalarla çirklənmiş ərazilərin təmizlənməsi, tamamilə dağıdılmış şəhər və kəndlərin yenidən qurulması istiqamətində irimiqyaslı layihələr həyata keçirir.

Səfir İtaliyanın Azərbaycanın yaxın dostu, strateji tərəfdaşı olduğunu qeyd edib və hazırda İtaliya şirkətlərinin azad edilmiş ərazilərdəki layihələrdə fəal iştirak etdiyini diqqətə çatdırıb.

Daha sonra ordumuzun 44 gün ərzində apardığı Vətən müharibəsi, qazanılan Zəfər və azad edilmiş ərazilərdə həyata keçirilən bərpa-quruculuq işlərinə dair videoçarx nümayiş etdirilib.

Tədbir konsert proqramı və Azərbaycan milli mətbəxinin təamlarından ibarət ziyafət ilə başa çatıb.

Paylaş:

Baxılıb: 734 dəfə