Paşinyan təkzib edir...

Bakı:

26 °C

44 %

5 m/s

Əlaqə

AZ RU EN

Ana səhifə / Xəbər lenti / Paşinyan təkzib edir...

Paşinyan təkzib edir...

11.01.2023 [10:17]

Ermənistan Rusiya ilə ittifaq dövləti yaratmaq barədə rəsmi təklif almayıb

Ermənistanın baş naziri Nikol Paşinyan yanvarın 10-da mətbuat konfransı keçirib. Mətbuat konfransında bir sıra məsələlərə toxunan erməni baş nazir bildirib ki, Ermənistan-Türkiyə sərhədinin və dəmir yolunun açılması qlobal əhəmiyyət kəsb edir. Onun sözlərinə görə, nəqliyyat əlaqələri nəzərindən regionun logistik əhəmiyyəti dəyişir, daha vacib rol oynayır: “Ermənistanla Türkiyə arasında sərhədlərin, o cümlədən dəmir yolunun açılması qlobal əhəmiyyət daşıyacaq. Həmçinin Azərbaycanın digər hissəsi ilə Naxçıvan, İranla Azərbaycan, Ermənistanla Rusiya arasında əlaqələrin bərpası vacibdir”.

O qeyd edib ki, İrəvan və Ankara təkcə danışıqlar aparmamalıdır, prosesin dinamikasını artıran konkret addımlar da atılmalıdır. “Xüsusi nümayəndələrin işinin davam etməsi, Prezident Rəcəb Tayyib Ərdoğanla birbaşa danışıqlar vacibdir. Ümid edirəm ki, yaxın gələcəkdə sərhəd üçüncü ölkə vətəndaşları üçün açılacaq”, - deyə Paşinyan bildirib.

KTMT ilə bağlı məsələyə də münasibət bildirən N.Paşinyan Ermənistanın 2023-cü ildə KTMT-nin hərbi təlimlərinə ev sahibliyi etməyəcəyini bəyan edib. Baş nazirin sözlərinə görə, Ermənistanın hazırkı vəziyyətində KTMT-nin “Sarsılmaz qardaşlıq” təlimlərinin keçirilməsi məqsədəuyğun deyil. Eyni zamanda, Rusiya ilə ittifaq dövləti yaratmaq barədə də rəsmi təklif almadıqlarını bildirən N.Paşinyan vurğulayıb ki, reallıq göründüyü qədər sadə deyil. “Bəzən problemin mətninə deyil, kontekstinə və qlobal proseslərə dərindən baxmaq lazımdır. Bizim üçün Ermənistanın suverenliyi və dövlətçiliyi mütləq dəyərdir. Biz dövlətin mövcudluğunu təmin etməyi özümüzə borc və məsuliyyət hesab edirik”, - deyə Paşinyan söyləyib.

Ermənistana qeyri-rəsmi kanallar vasitəsilə təzyiq edilib-edilmədiyi ilə bağlı suala erməni hökumət başçısı cavabında bildirib ki, qeyri-rəsmi kanal ifadəsi başqa mənaları ifadə edə bilər: “Məsələn, ekspertlərin daimi söhbətlərini, habelə müxtəlif kontaktları da qeyri-rəsmi kanallar hesab etmək olar. Güman edirəm ki, Ermənistan Təhlükəsizlik Şurasının katibi də təzyiqdən danışarkən bunu nəzərə alıb”.

“Bölgədə münasibətlərimizi dəyişməsək, mövcud təhlükələri idarə edə bilməyəcəyik, amma arzu etmək kifayət deyil, düşündüyümüzdən daha çevik olmalıyıq”, - deyən N.Paşinyan Rusiya ilə Türkiyə arasında münasibətlərin niyə və necə dəyişdiyini, bunun Ermənistan üçün nə demək olduğunu anlamağa çağırıb. “Rusiya ilə Azərbaycan arasında münasibətlər niyə və necə dəyişib? Bunun bizə təsirini başa düşməliyik. Suallara cavab verməliyik: regionda necə mövqe tuturuq? Qonşu və tərəfdaş, yoxsa istehkam kimi? Yoxsa tarixi ədalət uğrunda mübarizə aparan, başqa ölkələrə dərs verməli bir dövlət kimi?”, - deyə Paşinyan ritorik suallar ünvanlayıb.

Azərbaycan ilə münasibətlərə də toxunan Paşinyan bildirib ki, Azərbaycan Ermənistanın ərazi bütövlüyünü heç vaxt tanımayacaq, əksinə, ona qarşı yeni hücumlar həyata keçirməyi qarşısına məqsəd qoyub. Qeyd edib ki, biz “Dağlıq Qarabağ”dan danışanda Azərbaycan bunu ərazi bütövlüyünə və suverenliyinə qəsd kimi dəyərləndirir. “Bunu Ermənistanın onun ərazi bütövlüyünü tanımadığını və tanımaq niyyətində olmadığını sübut kimi irəli sürür. Bu ritorikanı inkişaf etdirərək deyirlər ki, əgər belədirsə, biz də Ermənistanın ərazi bütövlüyünü tanımırıq”, - deyə Paşinyan bildirib. O vurğulayıb ki, dünyada elə bir ölkə olmayıb və yoxdur ki, Qarabağı Azərbaycanın tərkib hissəsi kimi tanımasın. Paşinyan xatırladıb ki, Praqa görüşünün yekunlarına əsasən, Ermənistan və Azərbaycanın 1991-ci il Alma-Ata Bəyannaməsi əsasında bir-birilərinin ərazi bütövlüyünün tanınması barədə razılıq əldə ediblər. Paşinyan mətbuat konfransında Laçın yolunda baş verənlərə də toxunub. O bildirib ki, biz tərəfdaşlarımızla ultimatum dilində danışmalı deyilik”. Paşinyan deyib ki, durum ictimaiyyətə açıqlanıb, lazımi qiymət verilib: “Laçın dəhlizinin işini Rusiya sülhməramlıları təmin etməlidir. Bu, üçtərəfli sazişlərdə də öz əksini tapıb”.

PƏRVİZ

Paylaş:

Baxılıb: 605 dəfə