Daha 1 il...

Bakı:

24 °C

61 %

3 m/s

Əlaqə

AZ RU EN

Ana səhifə / Xəbər lenti / Daha 1 il...

Daha 1 il...

06.07.2023 [10:41]

Yens Stoltenberqin səlahiyyət müddəti növbəti ilin oktyabr ayınadək uzadılıb

GÜLAY

NATO-nun Baş katibi Yens Stoltenberqin səlahiyyət müddəti 2023-cü il sentyabrın 30-da başa çatır. Xatırladaq ki, baş katib Yens Stoltenberq 2014-cü ildən NATO-ya rəhbərlik edir. Artıq o, üç müddətə bu vəzifədə çalışıb. Sonuncu uzadılma isə bir il müddətinə, 2023-cü ilin sentyabrın sonuna qədər tətbiq edilib. Stoltenberqin 64 yaşı var və bundan əvvəl Norveçin Baş naziri olub.

İyulun 4-də NATO ölkələri baş katib Yens Stoltenberqin səlahiyyət müddətinin uzadılması ilə bağlı razılıq məsələlərini müzakirəyə çıxarmışdılar. NATO diplomatları Stoltenberqin böhran vəziyyətlərində hərbi alyansı idarə etmək bacarığını qeyd ediblər. Onlar hesab ediblər ki, baş katibin səlahiyyət müddətinin uzadılması vaxta qənaət etməyə və namizədlərlə bağlı debatlar təşkil etmək əvəzinə diqqəti Ukraynaya dəstək göstərilməsinə cəmləməyə imkan verəcək. Son məlumatlara əsasən, Baş katib Yens Stoltenberqin 2024-cü il oktyabrın 1-dək vəzifəsində qalacağı təsdiq edilib. Bu barədə Stoltenberq özü açıqlama verib.

Qeyd edək ki, Stoltenberq 2023-cü ilin sentyabrında vəzifəsini tərk etməli idi. Hələ fevral ayında o, müqaviləsini yeniləmək istəmədiyini bildirmiş, baş katibin mətbuat katibi Oana Lunqesçu fevral ayında Yens Stoltenberqin səlahiyyətlərinin uzadılmasına cəhd etmək niyyətində olmadığını və yenidən təklif edilsə belə, bu ilin oktyabrında vəzifəsindən getmək niyyətində olduğunu ictimaiyyətə çatdırmışdı. Lakin xarici mətbuatın yazdığına görə, NATO ölkələri ondan vəzifəsində qalmasını istəyiblər. Hətta ABŞ Prezidenti Co Bayden Yens Stoltenberqin vəzifəsində qalmaq istəyini də 12-13 iyun tarixlərində Vaşinqtona səfəri zamanı NATO Baş katibinə ünvanlayıb. Nəhayət, iyulun 4-də NATO müttəfiqləri bu barədə qərar qəbul ediblər.

Xatırladaq ki, Böyük Britaniyanın müdafiə naziri Ben Uolles və Danimarkanın Baş naziri Mette Frederiksenin baş katib postuna namizəd olması da müzakirə olunan məsələlərdən idi. Ben Uolles

NATO-ya rəhbərlik etmək niyyətində olduğunu açıq şəkildə bəyan etsə də, digəri bu vəzifəyə namizədliyini verməkdən imtina edib. Böyük Britaniyanın müdafiə naziri Ben Uollesin NATO-nun baş katibi ola bilməməsinin səbəbini Ukraynaya fəal dəstəyinin nəticəsi olaraq göstərilir. Onun namizədliyinin qarşısının ABŞ və Fransa tərəfindən alındığına dair iddialar səsləndirilir. Həmçinin iddia edilir ki, Baydenin namizədi Avropa Komissiyasının rəhbəri Ursula fon der Leyen olub, lakin NATO üzvləri yeni baş katiblə bağlı konsensusa gələ bilməyəndən sonra Yens Stoltenberqin adı üzərində dayanıblar.

Paylaş:

Baxılıb: 555 dəfə