Neokolonializmə qarşı mübarizədə uğurlu tərəfdaş

Bakı:

22 °C

56 %

3 m/s

Əlaqə

AZ RU EN

Ana səhifə / Xəbər lenti / Neokolonializmə qarşı mübarizədə uğurlu tərəfdaş

Neokolonializmə qarşı mübarizədə uğurlu tərəfdaş

24.10.2023 [11:06]

Bakı Təşəbbüs Qrupunun Ofisi açılıb

Ölkəmizdə multikulturalizm artıq alternativi olmayan həyat tərzinə çevrilib. Müasir dövrdə Azərbaycanda həyata keçirilən multikulturalizm siyasəti dövlətin tolerantlıq prinsiplərinə sadiq qalmasının bariz nümunəsidir. XXI əsr insan hüquqlarının qorunması əsridir. Dünya xalqları sülh və əmin-amanlıq şəraitində yaşamaq istəyir. Bu tendensiyanı gələcək nəsillərə ötürmək prioritet istiqamətlərdən biridir. İnsan hüquq və azadlıqlarının qorunması, dünya ölkələrində multikultural dəyərlərin daha da geniş yayılması istiqamətində Azərbaycanın fəaliyyəti danılmazdır.

Bunun bir nümunəsi kimi, ötən günlərdə paytaxtda Bakı Təşəbbüs Qrupunun Ofisinin açılış mərasiminin keçirilməsini qeyd edə bilərik. Açılış mərasimində rəsmi şəxslər, o cümlədən Bakı Təşəbbüs Qrupunun icraçı direktoru Abbas Abbasov iştirak edib. Açılış mərasiminə yerli və xarici qonaqlar da qatılıblar.

Neokolonializmə qarşı mübarizəmiz davam edəcək

Bakı Təşəbbüs Qrupunun Bakıdakı ofisinin açılış mərasimində Qrupun icraçı direktoru Abbas Abbasov bildirib ki, Bakı Təşəbbüs Qrupu artıq rəsmi fəaliyyətə başlayıb. Bizim neokolonializmə qarşı mübarizəmiz davam edəcək.

O bildirib ki, Qrupun fəaliyyəti beynəlxalq hüquq çərçivəsində davam etdiriləcək: “Bildiyiniz kimi, Azərbaycanın Qoşulmama Hərəkatına sədrliyi yekunlaşır. Amma neokolonializmlə mübarizəmiz davam edəcək”.

Kolonializmlə mübarizədə Azərbaycan bizə kömək edir

Bakı Təşəbbüs Qrupunun Bakıdakı ofisinin açılışı mərasimində Martinikanın Azadlığı Partiyasının sədri Lyuk Frensis Karolenin sözlərinə görə, bir neçə aydır, Azərbaycanla birgə işlər görülür: “Məqsədimiz azadlıqdır, kolonializmə qarşı mübarizədir. Azərbaycanla ortaq layihələr davam edir. Müstəmləkə altında əzilən digər ölkələrlə də sıx əlaqədəyik. Birgə addımlar atırıq. Azərbaycan bizə kömək edir və edəcək. Buna görə Azərbaycana təşəkkür edirik”, - o vurğulayıb.

Qeyd edək ki, Bakı Təşəbbüs Qrupu Azərbaycan Respublikasının sədrlik etdiyi Qoşulmama Hərəkatının Əlaqələndirmə Bürosunun nazirlər toplantısı çərçivəsində 6 iyul 2023-cü ildə Bakıda “Müstəmləkəçiliyin tamamilə aradan qaldırılmasına doğru” adlı konfransın iştirakçıları tərəfindən yaradılıb. Bakı Təşəbbüs Qrupu XXI əsrdə hələ də müstəmləkəçilikdən əziyyət çəkən dünyanın müxtəlif bölgələrində yerləşən xalqların azadlıq uğrunda apardıqları mübarizəyə dəstək verir.

Bu xüsusda, Bakı Təşəbbüs Qrupu cari il sentyabrın 22-də BMT-də “Dekolonizasiya: Sakit inqilab” mövzusunda konfrans da keçirib.

Oktyabrın 20-də isə Bakı Təşəbbüs Qrupunun təşkilatçılığı “Neokolonializm: İnsan hüquqlarının pozulması və ədalətsizlik” adlı beynəlxalq konfrans keçirilib. Konfransda 14 ölkənin, eləcə də Fransanın müstəmləkə altında saxladığı dənizaşırı ərazilərin, həmçinin Korsikanın təmsilçiləri iştirak ediblər.

Növbəti tədbir oktyabrın 21-də Azərbaycan Dillər Universitetində (ADU) Bakı Təşəbbüs Qrupunun təşkilatçılığı ilə “Neokolonializm və ədalətsizlik: iki dünyəvi təhlükəli tendensiya” mövzusunda keçirilib.

Tədbirdə qeyd olunub ki, həmçinin təhsil və mədəniyyət sahələrində də dominantlıq var. Dərslər Fransa dərslikləri vasitəsilə keçilir. Qonaqlar Fransanın müstəmləkəçilik siyasətini və dil sahəsindəki zorakılıqlarını pisləyib, dövrü nəşrlərin ana dilində dərc olunmasının zəruriliyini diqqətə çatdırıblar.

Çıxış edən qonaqlar bəzi Avropa ölkələrinin müstəmləkəçilik siyasətinin ağır fəsadlara yol açdığını qeyd ediblər. Onlar bildirib ki, ana dillərinin istifadəsi məhdudlaşır, bunun yerinə fransız dili hökmranlıq edir. Qvadelupa əhalisinin dörd əsrdir Fransanın əsarəti altında yaşadığını vurğulayan Jan-Jakob Bisep deyib ki, Qvadelupanın təbii sərvətləri illərdir Fransa tərəfindən mənimsənilir. Onlar öz kitablarında bizim dilimizi, tariximizi, mədəniyyətimizi təhrif edir, gənclərimizə Fransa tarixini və dilini öyrədirlər.

Günel ABBAS

Paylaş:

Baxılıb: 676 dəfə