UNESCO-nun subregional konfransı...

Bakı:

24 °C

53 %

7 m/s

Əlaqə

AZ RU EN

Ana səhifə / Xəbər lenti / UNESCO-nun subregional konfransı...

UNESCO-nun subregional konfransı...

25.10.2023 [11:34]

8 ölkə nümayəndəsinin iştirakı ilə

Oktyabrın 23-dən “İpək Yolu Volqa-Xəzər Dəhlizi: Birinci İllik Subregional” konfransı öz işinə başlayıb. Konfrans Azərbaycan Milli İncəsənət Muzeyində keçirilib. Tədbir Mədəniyyət Nazirliyi və UNESCO-nun Ümumdünya İrs Mərkəzinin birgə təşkilatçılığı baş tutub.

Qeyd edək ki, tədbirdə ölkəmizlə yanaşı Qazaxıstan, Türkmənistan, İngiltərə, Yaponiya, Rusiya Federasiyasının Tatarıstan Respublikası və İrandan olan nümayəndələr iştirak edirlər. Konfransın təşkil olunmasının məqsədi “İpək Yolu Volqa-Xəzər Dəhlizi Transsərhəd Nominasiyası”na təqdim ediləcək mədəni irs obyektlərinin müəyyənləşdirilməsidir. Eyni zamanda müvafiq sənədlərin dəhlizə daxil olan 5 ölkənin hökumət nümayəndələri, milli əlaqələndiriciləri, yerli və beynəlxalq ekspertlərlə müzakirə olunması əsas məqsəddir.

Tədbirdə UNESCO-nun Dünya İrs Komitəsinin təşəbbüsü ilə irihəcmli “Transsərhəd İpək Yolu abidələrinin Dünya İrs Siyahısına nominasiyası” proqramının əhəmiyyətindən danışılıb. Proqramın İpək Yolunun üzərində yerləşən ölkələrin zəngin mədəni irsinin beynəlxalq səviyyədə təbliğ olunmasında əhəmiyyəti vurğulanıb. Bu yolun təkcə iqtisadi deyil, həm də mədəni sahədə birləşdirici və mövcud olduğu dövrdə keçdiyi ölkələrin həyatında vacib rolu qeyd olunub.

Daha sonra Azərbaycan, İran, Qazaxıstan, Rusiya və Türkmənistandan olan ekspertlər layihə çərçivəsində görülən işlər barədə təqdimatla çıxış ediblər.

Azərbaycan geniş mədəni irsə malikdir

UNESCO-nun Azərbaycandakı daimi nümayəndəsi Elman Abdullayev çıxışında Azərbaycanın çox geniş mədəni irsə malik olduğunu deyib. O, bildirib ki, ölkəmizin həmişə bu mədəni dəyərlərin qorunmasında xüsusi rolu olub: “Azərbaycan şərqlə qərbi birləşdirən beynəlxalq ipək yolu üzərindən maddi və qeyri-maddi irsin qorunması mövzusunda Mərkəzi Asiya ölkələri ilə tarixi əlaqələr qurub”.

Bərpa etməli olduğumuz tarixi yerlər var

Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Səbinə Hacıyeva ipək yolunun Azərbaycan üçün vacib əhəmiyyətə malik olduğunu deyib: “Bir çox ölkəni birləşdirən bu yol sadəcə ticarət əlaqələrinin deyil, mədəni əlaqələrin də inkişaf etməsinə töhvə verib. Ölkəmizin digər sahələrdə də inkişafına və adət-ənənələrinin formalaşmasına əhəmiyyətli dərəcədə təsir edib. Qeyd edim ki, əsrlər boyu bu yol üzərində bir sıra karvansaraylar, mədəni abidələr tikilib. Bizim də bu abidələrin fonunda bərpa etməli olduğumuz bir çox tarixi yerlər mövcuddur. Düşünürəm ki, zamanla biz bu yerləri bərpa edəcəyik”.

Azərbaycan Respublikası UNESCO üzrə Milli Komissiyasının ikinci katibi Emil Əhmədov Azərbaycanın ipək yolu üzərində keçirilən layihələri hər zaman dəstəklədiyini deyib: “Azərbaycan maddi və qeyri-maddi mirasın qorunmasında təkcə milli yox, həm də regional addımlar atır. Qeyd etmək lazımdır ki, Azərbaycan son otuz ildə erməni işğalı altında olan torpaqlarını azad edib. Bütün dünya da gördü ki, ermənilər Azərbaycana aid mülki obyektləri, tarixi abidələri dağıtmışdır. Milli-mədəni irsimizə qarşı genosid həyata keçirmişdir. Bu konfransda da bir daha bu məsələlər müzakirə olunur. Və bütün iştirakçı ölkələri bu barədə bir daha məlumatlandırmaq onlara da faydalı olacaq”.

Y.BAYRAMOVA

Paylaş:

Baxılıb: 659 dəfə