“Xalqın qəlbində əbədiyyət qazanmış dahi şəxsiyyət”

Bakı:

28 °C

59 %

11 m/s

Əlaqə

AZ RU EN

Ana səhifə / Xəbər lenti / “Xalqın qəlbində əbədiyyət qazanmış dahi şəxsiyyət”

“Xalqın qəlbində əbədiyyət qazanmış dahi şəxsiyyət”

22.11.2023 [18:15]

Noyabrın 22-də “Heydər Əliyev İli” çərçivəsində Yeni Azərbaycan Partiyasının (YAP) Veteranlar Şurasının və Yasamal rayon təşkilatının birgə təşkilatçılığı ilə “Xalqın qəlbində əbədiyyət qazanmış dahi şəxsiyyət” adlı tədbir keçirilib.

Tədbirdə YAP Veteranlar Şurasının üzvləri və Bakı şəhəri üzrə rayon təşkilatlarının fəalları iştirak ediblər.

Tədbirdən öncə Yasamal rayonu ərazisində Şəhidlər Xatirə Kompleksi ziyarət edilib.

YAP Yasamal rayon təşkilatının inzibati binasında keçirilən tədbirdə əvvəlcə Ulu Öndər Heydər Əliyevin büstü önünə gül dəstələri düzülüb.

Tədbirdə Dövlət Himni səsləndirilib. Ulu Öndər Heydər Əliyevin və torpaqlarımızın azadlığı uğrunda canlarını qurban vermiş şəhidlərimizin əziz xatirəsi bir dəqiqəlik sükutla yad edilib.

Sonra “Nə qədər ki Azərbaycan var, Heydər Əliyev də var olacaq!” adlı sənədli film nümayiş olunub.

Çıxış edən YAP Yasamal rayon təşkilatının sədri Bəxtiyar Nəbiyev Ulu Öndər Heydər Əliyevin xalqımız qarşısında tarixi xidmətlərindən bəhs edib. Qeyd edib ki, Azərbaycanın inkişaf strategiyasının müəllifi Ümummilli Lider Heydər Əliyevdir: “Ulu Öndər Heydər Əliyevin siyasi varisi Prezident İlham Əliyevin rəhbərliyi ilə həyata keçirilən siyasət nəticəsində Azərbaycan qüdrətli və qalib ölkəyə çevrilib.”

2023-cü ilin ölkəmizdə “Heydər Əliyev İli” elan olunması ilə əlaqədar silsilə tədbirlərin keçirildiyini diqqətə çatdıran YAP Veteranlar Şurasının sədri, partiyanın İdarə Heyətinin üzvü Arif Rəhimzadə bildirib ki, Ulu Öndər Heydər Əliyevin Azərbaycana rəhbərlik etdiyi dövr milli dövlətçilik tarixində mühüm yer tutur: “Heydər Əliyevin hakimiyyətə birinci gəlişi xalqın həyatında dönüş nöqtəsi, çiçəklənmə, milli oyanış dövrü oldu. 1993-cü ildə Ulu Öndər hakimiyyətə qayıdışı ilə xilaskarlıq missiyasını yerinə yetirdi, ölkəmizi məhv olmaq təhlükəsindən qurtardı. Ümummilli Lider Heydər Əliyevin müasir və müstəqil Azərbaycana rəhbərliyinin əsas nəticəsi ondan ibarətdir ki, dağılmaq ərəfəsində olan ölkəmiz dinamik inkişaf edən bir ölkəyə çevrilib. Bu heç də asan başa gəlməyib. Azərbaycanı inkişaf yoluna yönəltmək üçün böyük zəhmət sərf olunub. Odur ki, biz Heydər Əliyevin qurucusu olduğu bugünkü Azərbaycanı daim qorumalıyıq”.

YAP Veteranlar Şurasının üzvü, “91-lər”dən Tahir Məmmədov çıxışında söyləyib ki, Ulu Öndər Heydər Əliyev bütün həyatını Azərbaycanın inkişafına həsr edib. T.Məmmədov Ulu Öndərin milli-mənəvi dəyərlərimizə verdiyi qiymətdən, yaradıcı insanlara qayğısından danışıb və bu istiqamətdə xatirələrini bölüşüb. Tahir Məmmədov Ulu Öndərin müstəsna xidmətlərinin hələ uzun illər tədqiqatçıların diqqət mərkəzində olacağını qeyd edərək vurğulayıb ki, müstəqil Azərbaycan Heydər Əliyevin şah əsəridir.

YAP Veteranlar Şurasının sədr müavini, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova Ulu Öndər Heydər Əliyevin öz həyat və fəaliyyətini Azərbaycanın inkişafına həsr etdiyini diqqətə çatdırıb. Bildirib ki, Heydər Əliyevin zəngin irsi bugünkü uğurlarımızı şərtləndirir. Belə tədbirlərin keçirilməsi də dahi şəxsiyyət Heydər Əliyevin əbədiyaşar ideyalarının təbliğində vacib rol oynayır. Çünki Azərbaycanın müasir tarixi, ölkəmizin inkişafı bilavasitə Ulu Öndər Heydər Əliyevin adı ilə bağlıdır. Dövlət müstəqilliyimiz məhz Ümummilli Liderin qətiyyəti, zəngin təcrübəsi, güclü iradəsi, xalqına bağlılığı sayəsində əbədi xarakter alıb.

YAP Veteranlar Şurasının üzvü, “91-lər”dən Şahlar Əsgərov Azərbaycanın inkişaf yolundan, əldə olunan nəaliyyət və inkişafdan bəhs edib. Bildirib ki, ölkəmizin inkişafının təməlində əsası Ulu Öndər Heydər Əliyev tərəfindən müəyyənləşdirilən çoxşaxəli siyasətin Prezident İlham Əliyev tərəfindən son 20 ildə məzmun və keyfiyyətcə yeni mərhələyə yüksəldilməsi dayanır. Ərazi bütövlüyü və suverenliyini təmin edən Azərbaycan bu gün heç kimdən asılı deyil, özü öz taleyinin sahibi olmaqla yanaşı dünyada söz sahibi olan dövlətlərdən birinə çevrilib.

Tədbirdə, həmçinin Bakı Dövlət Universitetinin professoru, fəlsəfə elmləri doktoru, Milli Qəhrəman Məzahir Rüstəmovun atası İzzət Rüstəmov, Türk Ağsaqqaları Birliyinin sədr müavini Eyvaz Hümbətov və partiyanın veteran üzvü Tahir Quliyev çıxış edərək Ulu Öndər Heydər Əliyevin xalqımız və dövlətimiz qarşısındakı xidmətlərindən bəhs ediblər.

Tədbirə Yeni Azərbaycan Partiyasının Himninin səsləndirilməsi ilə yekun vurulub.

Paylaş:

Baxılıb: 528 dəfə