Azərbaycan-Türkmənistan münasibətləri: geosiyasi əməkdaşlıq və ortaq inkişaf hədəfləri

Bakı:

26 °C

54 %

2 m/s

Əlaqə

AZ RU EN

Ana səhifə / Arxiv / Azərbaycan-Türkmənistan münasibətləri: geosiyasi əməkdaşlıq və ortaq inkişaf hədəfləri

Azərbaycan-Türkmənistan münasibətləri: geosiyasi əməkdaşlıq və ortaq inkişaf hədəfləri

24.06.2026 [13:11]

Elşən Alıyev

YAP Daşkəsən rayon təşkilatının sədr müavini

Müasir beynəlxalq münasibətlər sistemində regional əməkdaşlıq, qarşılıqlı etimad və ortaq maraqlar üzərində qurulan tərəfdaşlıqlar xüsusi əhəmiyyət daşıyır. Xəzər hövzəsinin iki mühüm dövləti olan Azərbaycan və Türkmənistan arasında formalaşan münasibətlər də məhz bu prinsiplərə əsaslanır. İyunun 22-də Türkmənistan Prezidenti Sərdar Berdiməhəmmədovun Azərbaycana səfəri çərçivəsində dövlət başçılarının mətbuata verdikləri bəyanat iki ölkə arasında əlaqələrin strateji xarakter daşıdığını bir daha nümayiş etdirir. Səfər çərçivəsində aparılan müzakirələr və imzalanan sənədlər münasibətlərin gələcək inkişaf istiqamətlərini müəyyənləşdirən mühüm hadisə kimi dəyərləndirilir.

Son illərdə beynəlxalq münasibətlər sistemində baş verən dəyişikliklər regional əməkdaşlığın əhəmiyyətini daha da artırıb. Xüsusilə Avropa ilə Asiyanı birləşdirən nəqliyyat marşrutlarının aktuallaşması Xəzər regionunun strateji əhəmiyyətini yüksəldib. Bu baxımdan Azərbaycan və Türkmənistan arasında əməkdaşlıq təkcə ikitərəfli münasibətlər çərçivəsində deyil, daha geniş coğrafiyada sabitliyin və iqtisadi inkişafın təmin olunması baxımından mühüm önəm kəsb edir. Dövlət başçılarının görüşü çərçivəsində nəqliyyat, logistika, enerji və regional əməkdaşlıq məsələlərinin geniş müzakirə olunması bunun əyani göstəricisidir. İyunun 22-də keçirilən görüşlərdə tərəflər əməkdaşlığın bütün istiqamətləri üzrə fikir mübadiləsi aparıb və gələcək fəaliyyət istiqamətlərini müəyyənləşdiriblər.

Prezident İlham Əliyevin bəyanatında diqqət çəkən əsas məqamlardan biri Azərbaycanın Mərkəzi Asiya Dövlət Başçılarının Məşvərət Şurasında iştirakına Türkmənistan tərəfindən göstərilən dəstək oldu. Dövlət başçısı bunu tarixi hadisə kimi qiymətləndirib. Bu gün Xəzər dənizi ətrafında formalaşan yeni əməkdaşlıq modeli Mərkəzi Asiya ilə Cənubi Qafqaz arasında iqtisadi və siyasi inteqrasiyanın genişlənməsinə şərait yaradır. Azərbaycan və Türkmənistan bu prosesdə aparıcı rol oynayan dövlətlər sırasındadır.

Müasir dünyada nəqliyyat-kommunikasiya xətləri dövlətlərin geoiqtisadi imkanlarını müəyyən edən əsas amillərdən biridir. Azərbaycan və Türkmənistan bu sahədə böyük potensiala malikdir. Prezident İlham Əliyevin qeyd etdiyi kimi, bu gün dünyada öz aralarında əməkdaşlıq edən ölkələri birləşdirən çox etibarlı, təhlükəsiz nəqliyyat marşrutları o qədər də çox deyil. Bu baxımdan Xəzər üzərindən keçən marşrutların inkişafı xüsusi əhəmiyyət daşıyır. Azərbaycan və Türkmənistan yükdaşımaların artırılması, logistika imkanlarının genişləndirilməsi və üçüncü ölkələrdən tranzit yüklərin cəlb olunması istiqamətində fəaliyyətlərini daha sıx əlaqələndirmək barədə razılığa gəliblər. Bu əməkdaşlıq Orta Dəhlizin inkişafına, Avropa ilə Asiya arasında ticarət əlaqələrinin genişlənməsinə və regionun beynəlxalq əhəmiyyətinin artmasına mühüm töhfə verir.

Azərbaycan və Türkmənistan zəngin enerji ehtiyatlarına malik dövlətlərdir. Xəzər hövzəsinin enerji potensialı hər iki dövlət üçün mühüm strateji üstünlük yaradır. Səfər çərçivəsində enerji sahəsində əməkdaşlıq perspektivləri də müzakirə olunub. İki dövlət arasında enerji sektorunda əməkdaşlığın genişləndirilməsinə dair sənədlərin imzalanması bu istiqamətdə yeni imkanlar yaradır. Enerji sahəsində əməkdaşlıq təkcə iqtisadi dividendlər deyil, həm də regional enerji təhlükəsizliyinin möhkəmləndirilməsi baxımından əhəmiyyətlidir.

Azərbaycan və Türkmənistan arasında münasibətlər yalnız siyasi və iqtisadi maraqlarla məhdudlaşmır. Humanitar əlaqələr də əməkdaşlığın mühüm istiqamətlərindən biridir. Son dövrdə qarşılıqlı Mədəniyyət Günlərinin keçirilməsi, yaradıcı kollektivlərin səfərləri, şəhərlərin qardaşlaşması və mədəni layihələrin həyata keçirilməsi xalqlar arasında münasibətlərin daha da yaxınlaşmasına xidmət edir. Dövlətimizin başçısı qeyd edib: “Bakı və Aşqabad Arkadağ və Füzuli kimi, qardaş şəhərlərdir. Bütün bunlar bizim birliyimizin nümayişidir. Əməkdaşlığımızı konkret məzmunla zənginləşdirməyə və qarşılıqlı fəaliyyətimizi dərinləşdirməyə çalışırıq”.

Türkmənistan Prezidenti Sərdar Berdiməhəmmədovun Azərbaycana dövlət səfəri bir daha nümayiş etdirdi ki, iki ölkə arasında münasibətlər strateji tərəfdaşlıq səviyyəsində inkişaf edir. Tarixi və mədəni yaxınlıq, siyasi etimad, nəqliyyat-logistika əməkdaşlığı, enerji layihələri və humanitar əlaqələr bu tərəfdaşlığın əsas sütunlarını təşkil edir. İki ölkə qarşıdakı illərdə də əməkdaşlığın yeni istiqamətlərini müəyyənləşdirərək regional sabitliyin, iqtisadi inkişafın və türk dünyasında həmrəyliyin möhkəmlənməsinə mühüm töhfələr verməyə davam edəcəklər.

Paylaş:

Baxılıb: 272 dəfə