Azərbaycan–Laos dostluğu: qarşılıqlı etimad və əməkdaşlığın yeni perspektivləri

Bakı:

23 °C

73 %

12 m/s

Əlaqə

AZ RU EN

Ana səhifə / Arxiv / Azərbaycan–Laos dostluğu: qarşılıqlı etimad və əməkdaşlığın yeni perspektivləri

Azərbaycan–Laos dostluğu: qarşılıqlı etimad və əməkdaşlığın yeni perspektivləri

19.10.2026 [11:49]

Müasir beynəlxalq münasibətlər sistemində dövlətlər arasında dostluq əlaqələrinin qorunması və yeni əməkdaşlıq imkanlarının yaradılması xüsusi əhəmiyyət daşıyır. Azərbaycanın xarici siyasətində də müxtəlif regionları təmsil edən ölkələrlə qarşılıqlı hörmət və ortaq maraqlar əsasında münasibətlərin inkişaf etdirilməsi mühüm yer tutur. Prezident İlham Əliyevin oktyabrın 13-də Laos Xalq Demokratik Respublikasının Prezidenti Thonqlun Sisulitin Azərbaycana səfəri zamanı mətbuata verdiyi bəyanat bu baxımdan diqqətəlayiqdir. Dövlət başçısının “Laos bizim üçün dost ölkədir” fikri Azərbaycan-Laos münasibətlərinin əsas mahiyyətini ifadə etməklə yanaşı, mövcud dostluğun konkret əməkdaşlıq layihələri ilə zənginləşdirilməsinin vacibliyini də ortaya qoyur.

Azərbaycan və Laos coğrafi baxımdan bir-birindən uzaqda yerləşsələr də, diplomatik münasibətlərin inkişafı üçün ortaq siyasi iradə və qarşılıqlı maraqlar mövcuddur. İki ölkə arasında 1995-ci ildə qurulan diplomatik əlaqələr ötən illər ərzində əməkdaşlıq üçün zəmin yaradıb. Laos Prezidentinin Azərbaycana səfəri isə bu münasibətlərin inkişafına yeni təkan vermək, qarşılıqlı əlaqələri daha sistemli və nəticəyönümlü istiqamətə yönəltmək baxımından əhəmiyyətlidir. Səfər çərçivəsində aparılan danışıqlar göstərir ki, tərəflər siyasi dialoqun möhkəmləndirilməsi ilə yanaşı, iqtisadi və humanitar sahələrdə də əməkdaşlığın genişləndirilməsində maraqlıdırlar.

Prezident İlham Əliyevin bəyanatında tarixi əlaqələrə istinad edilməsi xüsusi məna daşıyır. Dövlət başçısı Heydər Əliyevin 1986-cı ildə Laos Xalq İnqilab Partiyasının IV qurultayında iştirakını xatırladıb. Bu fakt Azərbaycanla Laos arasında münasibətlərin tarixi təcrübəsinin olduğunu nümayiş etdirir. Tarixi əlaqələrin xatırlanması yalnız keçmişə ehtiram deyil, həm də həmin təcrübədən istifadə etməklə gələcək münasibətlərin inkişaf etdirilməsi baxımından əhəmiyyətlidir.

İkitərəfli əlaqələrin gələcək inkişafında iqtisadi əməkdaşlıq əsas istiqamətlərdən biri kimi çıxış edir. Prezident İlham Əliyev mövcud ticarət dövriyyəsinin ölkələr arasındakı potensialı tam əks etdirmədiyini vurğulayaraq bu sahədə imkanların geniş olduğunu diqqətə çatdırıb. Bu yanaşma iqtisadi münasibətlərin yeni mərhələyə keçirilməsinin vacibliyini göstərir. Siyasi əlaqələrin möhkəm təməli iqtisadi əməkdaşlığın inkişafı üçün əlverişli şərait yaratsa da, real nəticələrə nail olmaq üçün biznes subyektlərinin fəallığı, investisiya təşəbbüsləri və konkret layihələrin həyata keçirilməsi zəruridir.

Azərbaycanın iqtisadi inkişaf təcrübəsi, enerji infrastrukturu, nəqliyyat imkanları və investisiya sahəsindəki potensialı Laosla əməkdaşlığın genişləndirilməsi üçün yeni perspektivlər açır. Eyni zamanda, Laos bazarının öyrənilməsi və qarşılıqlı iqtisadi maraqların müəyyənləşdirilməsi Azərbaycan şirkətlərinin beynəlxalq fəaliyyətinin genişləndirilməsinə töhfə verə bilər. Prezident İlham Əliyevin Azərbaycan investorlarının Laosda təqdim olunacaq layihələri nəzərdən keçirməyə hazır olduğunu bildirməsi iqtisadi əməkdaşlığa praktik yanaşmanın göstəricisidir. Bakıda Azərbaycan-Laos Biznes Forumunun keçirilməsi təşəbbüsü də işgüzar dairələr arasında əlaqələrin gücləndirilməsi və yeni tərəfdaşlıqların qurulması baxımından mühüm əhəmiyyət daşıyır.

Əməkdaşlığın perspektivləri yalnız ticarət və investisiya ilə məhdudlaşmır. Enerji, kənd təsərrüfatı, mədən sənayesi və nəqliyyat sahələrində qarşılıqlı təcrübə mübadiləsi hər iki ölkə üçün faydalı nəticələr verə bilər. Bu istiqamətlərdə əməkdaşlığın inkişafı iqtisadi əlaqələrin şaxələndirilməsinə, yeni bazar imkanlarının araşdırılmasına və qarşılıqlı faydalı təşəbbüslərin reallaşdırılmasına şərait yaradar. Bunun üçün dövlət qurumları ilə yanaşı, sahibkarların və müvafiq sahələr üzrə mütəxəssislərin də əməkdaşlıq prosesinə cəlb edilməsi vacibdir.

Azərbaycan-Laos münasibətlərinin digər mühüm istiqaməti humanitar əlaqələrdir. Vaxtilə çoxsaylı laoslu tələbələrin Azərbaycanda təhsil alması iki xalq arasında formalaşmış əlaqələrin əhəmiyyətini göstərir. Prezident İlham Əliyevin bu ənənənin davam etdirilməsi və laoslu tələbələr üçün təqaüd imkanlarının yaradılması ilə bağlı fikirləri təhsil sahəsində əməkdaşlığın genişləndirilməsi baxımından diqqətəlayiqdir. Gənclər arasında əlaqələrin gücləndirilməsi, elmi və mədəni mübadilənin inkişafı xalqların bir-birini daha yaxından tanımasına, qarşılıqlı etimadın möhkəmlənməsinə xidmət edə bilər.

Bəyanatda diqqət çəkən məsələlərdən biri də mina təhlükəsi ilə mübarizədir. Azərbaycan və Laos bu problemin ağır humanitar nəticələri ilə üzləşmiş ölkələr kimi təcrübə mübadiləsində maraqlı ola bilərlər. Mina təhlükəsinin aradan qaldırılması, müasir texnologiyaların tətbiqi və mütəxəssislərin biliklərinin artırılması istiqamətində əməkdaşlıq insanların təhlükəsizliyinin təmin olunmasına və ərazilərin iqtisadi dövriyyəyə qaytarılmasına töhfə verə bilər.

Səfər çərçivəsində imzalanmış sənədlər və Birgə Bəyanat iki ölkə arasındakı münasibətlərin gələcək inkişaf istiqamətlərini müəyyənləşdirmək baxımından əhəmiyyətlidir. Lakin əməkdaşlığın səmərəliliyi əldə olunmuş razılaşmaların icrasından, konkret layihələrin hazırlanmasından və tərəflər arasında davamlı dialoqun qorunmasından asılı olacaq. Məhz bu amillər siyasi səviyyədə ifadə olunan niyyətlərin iqtisadi və humanitar sahələrdə real nəticələrə çevrilməsinə imkan verəcək.

Prezident İlham Əliyevin Laosla münasibətlərə dair bəyanatı Azərbaycanın beynəlxalq əlaqələrinin coğrafi və iqtisadi baxımdan genişləndirilməsi siyasəti kontekstində əhəmiyyət daşıyır. “Laos bizim üçün dost ölkədir” ifadəsi iki dövlət arasında mövcud münasibətlərin siyasi mahiyyətini əks etdirir. Bu dostluğun gələcək inkişafı isə qarşılıqlı maraqların düzgün müəyyənləşdirilməsi, iqtisadi təşəbbüslərin reallaşdırılması və humanitar əlaqələrin möhkəmləndirilməsi ilə bağlıdır. Laos Prezidentinin Azərbaycana səfəri ölkələr arasında dialoqun dərinləşdirilməsi üçün yeni imkanlar yaradaraq dostluğun daha geniş və praktik əməkdaşlıq müstəvisinə keçirilməsi istiqamətində mühüm addım kimi dəyərləndirilə bilər.

Nicat Əsədli

YAP Ordubad rayon təşkilatının əməkdaşı

Paylaş:

Baxılıb: 85 dəfə

Xəbər lenti

Hamısına bax