Ermənistanda kriminal vəziyyət həddindən artıq pisləşib

Bakı:

25 °C

56 %

6 m/s

Əlaqə

AZ RU EN

Ana səhifə / Dünya / Ermənistanda kriminal vəziyyət həddindən artıq pisləşib

Ermənistanda kriminal vəziyyət həddindən artıq pisləşib

25.01.2019 [09:47]

Paşinyanın düşünülməmiş şəkildə apardığı siyasət nəticəsində cəmiyyətdə təhlükəli meyillər güclənir
Ermənistanda yeni hökumətin formalaşmasını yubadan Nikol Paşinyanın hakimiyyətinin hər ötən günü onun mənimsədiyi idarəçilik metodlarının bir-bir iflasa uğraması ilə nəticələnir. Sosial-iqtisadi sahədə heç bir irəliləyiş əldə edə bilməyən baş nazirin “xidməti” artıq aclıq və səfalət içində yaşayan əhalinin bir hissəsini oğurluq, talan kimi cinayətlərə əl atmağa sövq edir. Bu ilin sentyabrında elan olunan amnistiya isə ölkədə kriminal vəziyyəti daha da gərginləşdirib.
Ermənistandakı kriminal durumun dəhşətli məcraya yönəldiyini hüquq-mühafizə orqanlarının hər gün yaydığı məlumatlar da təsdiq edir. Erməni mətbuatının yazdığına görə, vəziyyətin idarəolunmaz hala gəldiyi N.Paşinyanın diqqətinə çatdırılıb və Ermənistan Polis Xidmətinin rəisi Valeri Osipyanın vəzifədən uzaqlaşdırılması gündəmdədir. “Jamanak” (“Zaman”) qəzetinin yazdığınan görə, onu Mütəşəkkil cinayətkarlıqla mübarizə baş idarəsinin rəisi Arsen Ayvazyan əvəz edəcək. Erməni mediası onu da yazır ki, əslində indiki vəziyyətin aradan qaldırılmasında polis orqanına kimin rəhbərlik etməsi o qədər də rol oynamayacaq. Ona görə ki, vəziyyətin bu həddə çatması bir-birinə zəncirvari olaraq bağlı olan səbəblərdən qaynaqlanır.
Bu səbəblərə gəlincə, əvvəla, hakimiyyəti ələ keçirdikdən sonra N.Paşinyanın keçmiş kriminal rejimin mənsubu olan, cinayət yolu ilə varlanmış bəzi şəxslərə qarşı polis və təhlükəsizlik xidmətlərinin əməliyyatlar aparmasına göstəriş verməsi, bir neçəsinin həbs olunması əhalidə ümid yaratsa da, onların gah həbs olunması, gah da girov müqabilində buraxılması halları N.Paşinyanın qətiyyətsizliyini ortaya qoydu.
Bu qeyri-ciddi mübarizənin fonunda N.Paşinyanın səriştəsiz və tamamilə yersiz şəkildə amnistiya elan etməsi kriminal düşüncəyə malik və bu qəbildən hərəkətləri məqbul hesab edən minlərlə elementin küçələrə hakim kəsilməsinə gətirib çıxarıb. Bununla yanaşı, cəzasını çəkməyən yüzlərlə cinayətkarın Ermənistanda azadlığa buraxılması cinayətlərin məişət soyğunçuluğu səviyyəsində artmasına səbəb olub. Statistika xidmətinin məlumatına görə, ötən il Ermənistanda cinayətkarlığın səviyyəsinin 13%, xüsusən də ağır cinayətlərin sayının 30% artmasında sözügedən amilin böyük rolu olub.
Erməni mətbuatının yazdığına görə, yeni hakimiyyət dövründə cinayətkar ünsürlər daha cəsarətli olublar və onlar əvvəllər vəzifədə olan və ya hazırkı yüksəkvəzifəli şəxslərin özlərinə və əmlakına hücum edirlər. Məsələn, Vanadzor rayonunda kriminal dəstə tərəfindən Ermənistanın İstintaq Komitəsinin sədrinin məsləhətçisinin minik avtomobili oğurlanıb, Lori rayon prokurorunun mənzili qarət edilib. Ermənistanın təkcə regionlarında deyil, Yerevan və Gümrü şəhərlərində hər gün mütəmadi olaraq atəş səsləri eşidilir. Ararat vilayətinin eks-qubernatorunun oğlu oğruların hücumuna məruz qalıb.
Bütün bu səbəblərə görə ABŞ başda olmaqla, bir çox Qərb dövləti Ermənistanı təhlükəsiz ölkələrin siyahısında görmür. Bu durum N.Paşinyanın vəd etdiyi xarici sərmayənin də cəlb edilməsinin mümkünsüzlüyünü ortaya qoyur. Çünki heç bir xarici sərmayədar yeni islahatlar aparılmadığı, biznes mühitinin yaradılmadığı, üstəlik həyatının təhlükədə olduğu, qohumlarının girov götürüldüyü, cəngəllik qanunları ilə idarə olunan ölkəyə pul qoymayacaq.
Beləliklə, indiki hakimiyyətin islahatlar aparmaq əvəzinə, yürütdüyü düşünülməmiş siyasət nəticəsində ölkədəki kriminal vəziyyət təhlükəli həddə çatıb. Buna görə də ekspertlər hesab edirlər ki, digər amillərin təsiri nəticəsində dövlət reketçiliyinin kriminal reketçiliklə əvəz olunması prosesi Ermənistan cəmiyyəti üçün dəhşətli təhlükələr vəd edir.
Qaşqay ZİYƏDDİNOĞLU

Paylaş:

Baxılıb: 2562 dəfə