Ermənistanda mövcud hakimiyyət opponentlərinə və vətəndaş cəmiyyəti fəallarına qarşı repressiyanı gücləndirir

Bakı:

26 °C

50 %

6 m/s

AZ RU EN

Ana səhifə / Dünya / Ermənistanda mövcud hakimiyyət opponentlərinə və vətəndaş cəmiyyəti fəallarına qarşı repressiyanı gücləndirir

Ermənistanda mövcud hakimiyyət opponentlərinə və vətəndaş cəmiyyəti fəallarına qarşı repressiyanı gücləndirir

05.08.2020 [08:55]

Baş nazir Paşinyanı kəskin tənqid etdikdən sonra Artur Vanetsyanın müxtəlif təzyiqlərə məruz qalması işğalçı ölkədə baş verənlərin siyasi təqib olduğunu sübut edir
Məlum olduğu kimi, baş nazir Nikol Paşinyanın səriştəsizliyi və pandemiya şəraitində fəaliyyətsizliyi Ermənistanda sosial-iqtisadi, həmçinin ictimai-siyasi böhrana səbəb olub. Çıxılmaz durumda olan baş nazir isə ona qarşı çıxış edənləri sıradan çıxarmaq üçün bütün vasitələrə əl atır. Elə işğalçı ölkədə baş verən son hadisələr də N.Paşinyanın ənənəvi olaraq həyata keçirdiyi siyasi repressiyaları davam etdirdiyini ortaya qoyur.
Ermənistan mətbuatının yazdığına görə, siyasi fəaliyyətə başladıqdan sonra hakimiyyəti kəskin tənqid edən Ermənistan Təhlükəsizlik Xidmətinin (TX) keçmiş direktoru, “Hayrenik” (“Vətən”) partiyasının sədri Artur Vanetsyana qarşı qanunsuz silah saxlamaq ittihamı ilə yeni cinayət işi açılıb. “Hraparak” qəzeti yazır ki, Paşinyanın birbaşa koordinasiyası ilə həyata keçirilən budəfəki istintaq işi çərçivəsində A.Vanetsyan TX-də dindirilib. Məsələnin absurdluğu ondadır ki, cinayət işinin açılmasına səbəb olan silah Ermənistan TX-nin silah anbarında tapılıb.
TX-dəki mənbələrisə partiya sədri A.Vanetsyana qarşı cinayət təqibi ilə bağlı yeni təfərrüatları açıqlayıblar. Həmin məlumata əsasən, silah şöbəsinin arsenalında qeydiyyatda olmayan qanunsuz silah aşkarlanıb. Bu hadisəyə görə TX-də axtarış və dindirmələr aparılıb. Öncə silah şöbəsinin rəisi Artak Torosyana tapılan silahın TX-nin keçmiş direktoru A.Vanetsyana aid olduğu barədə ifadə verməsi üçün hədə-qorxu gəliblər. Saxta ifadə verməkdən imtina etdiyi üçün A.Torosyan həbs edilib.
“Hraparak” qəzetinin yazdığına görə, daha sonra TX-nin direktoru Argişti Kərəmyanın birbaşa əmri ilə TX-nin İstintaq Departamentinin rəisi tərəfindən silah şöbəsinin həbsdə olan rəhbəri A.Torosyanın TX-də çalışan həyat yoldaşı dindirilib. Əvvəlcə ona həyat yoldaşını A.Vanetsyanın əleyhinə ifadə vermək üçün razı salmağı təklif ediblər, bunu qəbul etmədiyi üçün hədələyiblər: “Həyat yoldaşın həbs ediləcək, sən işdən qovulacaqsan, yetkinlik yaşına çatmayan üç uşağın ac qalacaq”.
A.Vanetsyan bildirib ki, son 8 ay ərzində siyasi fəaliyyətini dayandırması üçün hakimiyyət ona qarşı cinayət təqibinin bütün vasitələrini sınaqdan keçirib. Hüquq müdafiəçisi Arsen Babayan isə deyib ki, A.Vanetsyana qarşı siyasi təqib həyata keçirilir. Ekspertin fikrincə, N.Paşinyanın birbaşa tabeliyində olan hüquq-mühafizə sistemi uzun müddətdir sübut edir ki, onun əsas funksiyası müxalif siyasi qüvvələrin nümayəndələrini sifariş əsasında təqib etməkdir.
Yeri gəlmişkən, N.Paşinyanın ölkədə yaratdığı diktaturanın mahiyyəti barədə təkcə siyasi xadimlər və ekspertlər deyil, Ermənistanda vətəndaş cəmiyyəti fəalları da həyəcan təbili çalırlar. Məsələn, bütün təzyiq və təqiblərə rəğmən tez-tez virtual aksiyalar təşkil edən ictimai fəal Manuel Manukyan yazır ki, Ermənistanda demokratiya, söz azadlığı, sərbəst toplaşma azadlığı, insanların şikayət etmək hüququ yoxdur.
Beləliklə, görünən odur ki, N.Paşinyan onu tənqid edənlərin əleyhinə bütün siyasi təqib metodlarından istifadə edir. Üstəlik, Ermənistanda mövcud hakimiyyət siyasi opponentlərinə və vətəndaş cəmiyyəti fəallarına qarşı repressiyanı gücləndirməklə məşğuldur.
Q.ZİYƏDDİNOĞLU

Paylaş:

Baxılıb: 751 dəfə