Ermənistanda siyasi gərginlik səngimir

Bakı:

14 °C

77 %

9 m/s

Əlaqə

AZ RU EN

Ana səhifə / Dünya / Ermənistanda siyasi gərginlik səngimir

Ermənistanda siyasi gərginlik səngimir

05.08.2021 [08:47]

Məlum olduğu kimi, VIII çağırış Ermənistan parlamentinin öz işinə başlamasından sonra ölkədaxili siyasi ehtiraslar parlament zalına transfer olunub. Parlamentin rəhbər strukturlarına seçkilərdə müxalifətin böhran yaratmaq cəhdləri davam edib. Erməni mediası yazır ki, hakimiyyətin namizədlərinin seçkisini boykot edən müxalifət parlament binasının kənarında və daxilində hərbçilərin yerləşdirilməsinə qarşı da kəskin münasibət bildirir.
Qeyd edək ki, müxalifətin parlamentin işini pozmaq cəhdlərinin fonunda vitse-spikerlərin seçkisi davam etdirilib. “News.am” yazır ki, hakim “Vətəndaş müqaviləsi” fraksiyasının namizədləri Ruben Rubinyan avqustun 3-də və Hakop Arşakyan isə avqustun 4-də parlamentin sədr müavinləri seçiliblər.
Qeyd edildiyi kimi, jurnalistlərin parlamentin zalına girişinin qadağan edilməsi, binaya hərbçilərin yerləşdirilməsi müxalif deputatlar arasında narazılıq yaradıb. “Hraparak” qəzeti yazır ki, yeni parlamentin iclasında hakimiyyət jurnalistlərin sərbəst hərəkətini məhdudlaşdırmaq üçün “bütöv bir qoşun batalyonu” yerləşdirib. Qəzet yazır ki, parlament aparatının informasiya departamentinin sabiq rəhbəri Arsen Babayan isə qeyd edib ki, heç bir halda ölkənin parlamenti hərbiləşdirilmiş orqan olduğu təəssüratını yaratmamalıdır: “Mediada parlamentin dəhlizlərinə nəzarət edən ondan çox hərbi geyimli zabit gördüm. Çox xoşagəlməz mənzərə idi”.
Bu arada, “Şərəfim var” fraksiyasının deputatı Taquhi Tovmasyan parlamentdə daim silahlı şəxslərlə qarşılaşdıqlarını, hərbi geyimli şəxslərin çantasını özü ilə iclas zalına aparmasını qadağan etdiklərini deyib. Onun sözlərinə görə, təhlükəsizliyin gücləndirilməsi tədbirləri, kişilərin qadın deputatlara yaxınlaşması və yoxlama aparmağa çalışması anlaşılmaz və qəbuledilməzdir.
Yeri gəlmişkən, yeni parlamentdə iqtidarın vəziyyətinin əlverişli olmayacağına diqqət çəkən “Past” qəzeti iddia edir ki, son günə qədər hakimiyyətin köhnə parlamenti növbədənkənar iclasa yığması N.Paşinyanın qanunverici orqandan arxayın olmamasından qaynaqlanır: “Mütəxəssislər əmindirlər ki, növbəti parlamentdə ciddi problemlərlə üzləşəcəyini və heç bir qanun layihəsini belə asanlıqla qəbul etdirə bilməyəcəyini başa düşən hakimiyyət qısa müddətdə VII çağırış parlamentdə maksimum sayda çox qanun layihəsini qəbul etdirməyə çalışıb”.
Bu arada, qeyd edildiyi kimi, müxalifətin böhran yaratmaq cəhdlərinə baxmayaraq baş nazir Nikol Paşinyan hökumətin formalaşdırılmasını davam etdirir. Belə ki, baş nazirin təqdimatı ilə Ermənistan prezidenti Armen Sarkisyan hökumətdə yeni təyinatları təsdiq edib. “Panorama.am” yazır ki, ötən gün A.Sarkisyan Mher Qriqoryanı baş nazirin müavini, Anahit Avanesyanı səhiyyə naziri, Andranik Piloyanı fövqəladə hallar naziri, Vahram Dumanyanı təhsil, elm, mədəniyyət və idman naziri, Vahan Kerobyanı iqtisadiyyat naziri, Karen Andreasyanı ədliyyə naziri və Tiqran Xaçatryanı maliyyə naziri vəzifələrinə təsdiq edib.
Qaşqay ZİYƏDDİNOĞLU

Paylaş:

Baxılıb: 795 dəfə