Bakı Slavyan Universitetində “İnformasiya təhlükəsizliyi və müasir media” mövzusunda seminar keçirilib

Bakı:

24 °C

66 %

3 m/s

AZ RU EN

Ana səhifə / Elm / Bakı Slavyan Universitetində “İnformasiya təhlükəsizliyi və müasir media” mövzusunda seminar keçirilib

Bakı Slavyan Universitetində “İnformasiya təhlükəsizliyi və müasir media” mövzusunda seminar keçirilib

30.10.2014 [10:06]

Seminarda “Yeni Azərbaycan” qəzetinin baş redaktoru Hikmət Babaoğlu və “İki sahil” qəzetinin baş redaktoru Vüqar Rəhimzadə iştirak edib
Dünən Bakı Slavyan Universitetinin Jurnalistika və Azərbaycan filologiyası fakültəsinin 4-cü kurs tələbələrinin “Yeni Azərbaycan” qəzetinin baş redaktoru, Əməkdar jurnalist Hikmət Babaoğlu ilə görüşü keçirilib. Görüş “İnformasiya təhlükəsizliyi və müasir media” mövzusuna həsr olunub. Öncə fakültənin dekanı Səfər Məmmədov çıxış edərək indiki dövrdə görüşün mövzusunun çox aktual olduğunu diqqətə çatdırıb və bu görüşün tələbələr üçün faydalı olacağını vurğulayıb.
Çıxış edən “Yeni Azərbaycan” qəzetinin baş redaktoru Hikmət Babaoğlu tələbə-gənclərlə belə görüşlərin keçirilməsinin əhəmiyyətini vurğulayıb. O qeyd edib ki, gələcəyin jurnalistləri olacaq tələbələr bu sahədə mövcud olan reallıqları dərindən mənimsəməyə çalışmalıdırlar: “Yaşadığımız əsr dünyada informasiya əsri kimi səciyyələndirilir. Müasir dövrdə mödern və postmodern cəmiyyətlərdə informasiya başlıca idarəetmə vasitəsi kimi təsbit edildiyindən informasiya subyektləri kommunikasiya texnologiyalarının inkişafına xüsusi diqqət yetirir ki, bu da mütəmadi surətdə informasiya resurslarının artırılmasını və təkmilləşdirilməsini şərtləndirən faktor qismində çıxış edir”.
Baş redaktor çıxışında yeni sosium növü olan informasiya cəmiyyəti, transmilli media institutlarının fəaliyyəti, beynəlxalq informasiya savaşında yeni kibertexnologiyalar və texnoloji innovasiyalardan spesifik strateji vasitə kimi istifadə olunması məsələlərinə toxunub. İnfoimperializm anlayışı barədə məlumat verən Hikmət Babaoğlu bu məfhumu “informasiya resursları və idarəetməsi üzərində qurulan idarəetmə və istismarın ənənəvi hərbi, iqtisadi, mədəni vasitələrlə deyil, məhz informasiya vasitəsilə həyata keçirildiyi siyasət növü” kimi səciyyələndirib.
“İnformasiya cəmiyyəti dedikdə elə bir sosium növü nəzərdə tutulur ki, burada əhalinin böyük hissəsi müasir informasiya texnologiyalarından istifadə etməklə informasiyanın, ən əsası isə onun ali forması olan biliyin istehsalı, saxlanması, emalı və ötürülməsi ilə məşğul olur. Digər mənada, informasiya cəmiyyəti gündəlik elmi və ya işgüzar ünsiyyət də daxil olmaqla bir çox sahə və istiqamətlərdə modern informasiya texnologiyalarına istinad etməklə informasiya dövriyyəsinin təşkil olunduğu sosium növü kimi səciyyələndirilir”, - deyən baş redaktor qloballaşan dünyada informasiya amilindən təsir və təzyiq faktoru kimi istifadə olunması məsələlərinə də toxunub. Hikmət Babaoğlu bildirib ki, infoimperialistlər transmilli media vasitəsilə ayrı-ayrı xalqlara və dövlətlərə qarşı təsir göstərməkdədirlər. Bu amilin informasiya təhlükəsizliyi məsələsini olduqca aktual etdiyini vurğulayan natiq deyib ki, hər bir milli dövlət informasiya təhlükəsizliyinə xüsusi həssaslıqla yanaşmalıdır. “Milli inkişafı təmin edən komponentlərdən biri intellektual resurslardır ki, informasiya cəmiyyətində milli maraqlarımızın müdafiəsi üçün bu faktordan səmərəli istifadə olunmalıdır. Bu gün Azərbaycan, sözün əsl mənasında, “sabitlik adası” kimi səciyyələndirilə bilər. Bu məsələdə yerli və xarici ekspertlərin ümumi rəyi odur ki, Azərbaycanda hökm sürən və ardıcıl səciyyə daşıyan sabitliyin əsasında duran başlıca faktor hakimiyyətin həyata keçirdiyi siyasi kursun milli maraqlara, ümummilli mənafeyə tam cavab verməsidir”, - deyən baş redaktor vurğulayıb ki, informasiya təhlükəsizliyinin əsas istiqaməti beynəlxalq arenada informasiya hücumlarının qarşısının alınması, xüsusilə virtual platformada təxribatların neytrallaşdırılması və digər məqamlardır. Hikmət Babaoğlu bildirib ki, milli media məkanımız informasiya təhlükəsizliyinə ciddi diqqət yetirməli və KİV-lər fəaliyyətində milli və dövlət maraqlarını hər şeydən üstün tutmalıdırlar.
Daha sonra “Yeni Azərbaycan” qəzetinin baş redaktoru Hikmət Babaoğlu tələbələrin suallarını cavablandırıb.
Sonda Bakı Slavyan Universiteti Jurnalistika və Azərbaycan filologiyası fakültəsinin müəllimi, “İki sahil” qəzetinin baş redaktoru Vüqar Rəhimzadə bu görüşün çox səmərəli olduğunu, tələbələrin yeni biliklər əldə etdiyini vurğulayıb. O qeyd edib ki, belə görüşlərin keçirilməsi tələbələrin müasir media məkanı ilə bağlı dünyagörüşlərinin inkişafı baxımından əhəmiyyətlidir.
N.BAYRAMLI

Paylaş:

Baxılıb: 2139 dəfə