ADA Universitetinin Məzun Forumu öz işinə başlayıb

Bakı:

28 °C

55 %

7 m/s

Əlaqə

AZ RU EN

Ana səhifə / Elm / ADA Universitetinin Məzun Forumu öz işinə başlayıb

ADA Universitetinin Məzun Forumu öz işinə başlayıb

06.07.2019 [10:19]

İyulun 5-də ADA Universitetində “PWC Azerbaijan” şirkətinin dəstəyi ilə ADA Universitetinin Məzun Forumu öz işinə başlayıb.
AZƏRTAC xəbər verir ki, tədbiri açan Xarici İşlər nazirinin müavini, ADA Universitetinin rektoru, səfir Hafiz Paşayev forumun davamlı maarifləndirmə, innovativ yanaşma, şəbəkələşmə və yeni əməkdaşlıq üçün platforma yaratmaq məqsədilə keçirildiyini bildirib. Qeyd edib ki, ingilis dilində təhsil verən dövlət ali təhsil müəssisəsi olan ADA Universiteti təsis ediləndən bəri bakalavr və magistr proqramları üzrə 1300 nəfərdən çox məzun buraxıb. Onlardan 44-ü müxtəlif ölkələri təmsil edib. ADA Universitetinin məzunları hazırda ən mötəbər təşkilatlarda yüksək vəzifələrdə çalışır və dövlətimizi layiqincə təmsil edirlər. Sevindirici haldır ki, biz bu məzunları ADA-da keçirilən ilk forumda bir araya gətirə bildik. Həmçinin məzunlarımızın müxtəlif dövlət qurumlarımızda təmsil olunmasını görmək bizim üçün çox xoşdur.
“PWC Azerbaijan” şirkətinin partnyoru Fəxri Mustafayev çıxışında təhsil müəssisələri ilə biznes qurumları arasında güclü tərəfdaşlıq qurulmasının əhəmiyyətindən danışıb. O, ADA Universiteti ilə “PWC Azerbaijan” şirkəti arasında uğurlu partnyorluq münasibətləri olduğunu bildirib.
Sonra forumun əsas mövzusu üzrə tanınmış alim, ADA Universiteti rektorunun müşaviri, akademik Roald Saqdeyev çıxış edib. O, təqdimatında rəqəmsal texnologiyanın keçdiyi inkişaf yolu və onların universitet həyatına, müəllim və tələbələrə necə təsir edəcəyi barədə danışıb. Həmçinin müasir dövrdə süni intellekt texnologiyasının, robotların, virtual reallıq texnologiyalarının insanların işgüzar və sosial həyatına gələcəkdə mümkün təsirlərini qeyd edib. Akademik Roald Saqdeyev süni intellekt texnologiyasının daha geniş tətbiq olunduğunu, bu sahədən hətta ölkələrin beynəlxalq münasibətlərinin proqnozlaşdırılmasında, hərbi strategiyalarının hazırlanmasında istifadə olunduğunu bildirib.
Forum işini panel iclaslarla davam etdirib.
ADA Universitetinin prorektoru Fariz İsmayılzadənin moderatorluğu ilə keçirilən iclasda “Qlobal idarəetmə” mövzusu müzakirə olunub. İclasda çıxış edən Azərbaycan Respublikasının Birinci vitse-prezidentinin köməkçisi Emin Hüseynov bildirib ki, müasir dövrdə texnologiyanın sürətlə inkişaf etməsi qlobal idarəetməyə də öz təsirini göstərir. Yeni ixtiralar, müasir texnoloji kəşflər tənzimləyici mexanizmlərin yaradılmasını labüd edir. Ən müasir texnologiyalara sərmayə yatıran böyük şirkətlər rəqabətə daha davamlı olur, kiçik şirkətlər isə bu rəqabətə davam gətirməyərək tədricən iflasa uğrayır. Ona görə də hökumətlər tarazlığın pozulmasını aradan qaldırmaq üçün idarəetmədə yeni mexanizmlər yaratmalıdırlar.
Dövlət Neft Fondunun icraçı direktoru Şahmar Mövsümov qeyd edib ki, texnologiyanın inkişafı nəticəsində robotlar gələcəkdə insan əməyinin tətbiq olunduğu işlərin böyük hissəsini yerinə yetirəcək. Bu da bəzi peşələrin ləğv olunmasına və işsizliyin artmasına gətirib çıxaracaq. Buna görə də hökumətin üzərinə böyük məsuliyyət düşür. Dördüncü sənaye inqilabı insanların yeni texnologiyalarla ayaqlaşması, bu sahədə biliklərinin daha da təkminləşməsi üçün ömürboyu öyrənmək prinsipinin əhəmiyyətini qabarıq göstərir.
BMT-nin Azərbaycandakı rezident əlaqələndiricisi Qulam İshaqzai qlobal idarəetmənin əhəmiyyətindən və təmsil etdiyi təşkilatın bu sahədəki rolundan danışıb. BMT-nin Dayanaqlı İnkişaf Məqsədlərinə nail olunmasında yüksək texnologiyaların rolunu vurğulayan diplomat bu sahədə təşkilatların birgə əməkdaşlığının vacibliyini qeyd edib.
Forum çərçivəsində müasir dövrdə rəqəmsallaşma, diplomatiya, insan kapitalının inkişafı və s. mövzular müzakirə olunub.
İyulun 6-da öz işini davam etdirəcək forum çərçivəsində ADA Universiteti Məzunları Assosiasiyası yaradılacaq.

Paylaş:

Baxılıb: 1510 dəfə