Azərbaycanın daha bir reytinq qiymətləndirməsində mövqeyi yüksəlib

Bakı:

29 °C

57 %

3 m/s

Əlaqə

AZ RU EN

Ana səhifə / Gündəm / Azərbaycanın daha bir reytinq qiymətləndirməsində mövqeyi yüksəlib

Azərbaycanın daha bir reytinq qiymətləndirməsində mövqeyi yüksəlib

16.12.2009 [09:54]

Yeni reytinqin əldə olunması beynəlxalq maliyyə bazarlarında Azərbaycana etimadın daha da yüksəlməsinə təminat verməklə yanaşı, həm də iri şirkətlərin ölkəmizə investisiya qoyuluşlarını artıracaq
Dünyanın daha bir nüfuzlu təşkilatı hazırladığı yeni reytinq qiymətləndirməsində respublikamızın mövqeyini yüksəldib. “Standard ənd Poor’s” beynəlxalq reytinq agentliyi Azərbaycanda biznes mühitinin yaxşılaşdırılması, idxal-ixrac əməliyyatları ilə bağlı ticarət qaydalarının sadələşdirilməsi, sahibkarlıq sektorunda rəqabət qabiliyyətinin təmin olunması, tikinti və digər bölmələrdə “bir pəncərə” sisteminin və əmlakın qeydiyyatının aparılmasında vahid mexanizmin tətbiq edilməsi, investorların hüquq və maraqlarının qorunması, gömrük rəsmiləşdirilməsi və digər parametrlər üzrə islahatların davam etdirilməsini yüksək dəyərləndirib. Təşkilat qeyd olunan indikatorları qiymətləndirərək Azərbaycanın investisiya reytinqini “sabit”dən “pozitiv”ə yüksəldib.
“Standard ənd Poor’s”un açıqladığı təhlil-hesabatda respublikamızın uzunmüddətli suveren kredit reytinq göstəricisi bir bənd yüksəldilərək “BB+” reytinqi ilə qiymətləndirilib. Qurum, eyni zamanda, ölkəmizin qısamüddətli kredit reytinqini “B” səviyyəsində təsdiqləyib. “Standard ənd Poor’s”un analitik qrupunun şərhində qeyd olunur ki, investisiya sahəsində həyata keçirilən tədbirlər və bu bölmədə sərmayə cəlbediciliyinin yüksəldilməsi Azərbaycanın maliyyə sabitliyinin möhkəmlənməsinə təkan verib, xarici investorların ölkəyə marağının artmasına zəmin yaradıb. “Standard ənd Poor’s” bu qənaətdədir ki, respublikamızda biznesə olan marağın yüksəlməsi əlverişli investisiya mühitinin formalaşmasını daha da stimullaşdırır. Dünya maliyyə böhranı bir çox dövlətlərdə iri və orta şirkətlərlə yanaşı, kiçik müəssisələrin də bağlanmasına səbəb olsa da respublikamızda bu tendensiya müşahidə olunmayıb. Azərbaycanda ötən il iqtisadi fəallıq aşağı düşməyib, əksinə, daha da yüksəlib. Buna görə də yeni yaradılmış sahibkarlıq subyektlərinin fəaliyyətini dayandırması qeydə alınmayıb. ölkəmizdə istər fiziki, istərsə də hüquqi şəxs qismində fəaliyyət göstərən sahibkarlıq subyektlərinin sayının artması iqtisadi aktivliyin nəticəsi sayıla bilər.
Azərbaycanın dünyanın ən nüfuzlu maliyyə və reytinq təşkilatları tərəfindən ardıcıl olaraq yüksək qiymətləndirilməsinin başlıca səbəbi hökumətin həyata keçirdiyi davamlı islahatların geniş miqyas alması və dinamik inkişafı şərtləndirən kompleks addımların atılması ilə bağlıdır. Bu qurumlar respublikamızda inkişaf tempinin davamlılığına diqqət çəkərək makroiqtisadi sabitlik göstəriciləri üzrə yüksək nəticələr əldə edilməsini, maliyyə sabitliyinin və uzunmüddətli inkişaf strategiyasının təmin olunmasını hökumətin həyata keçirdiyi məqsədyönlü siyasətin uğurlarının təzahürü kimi dəyərləndirir. Dünya Bankı, Beynəlxalq Maliyyə Korporasiyası, Asiya İnkişaf Bankı, Avropa Yenidənqurma və İnkişaf Bankı, “Fitç İbka” və digər beynəxalq maliyyə qurumlarının qiymətləndirmələrində, eləcə də proqnozlarında Azərbaycandakı maliyyə sabitliyi və makroiqtisadi dinamika, iqtisadi inkişaf və digər indikatorlar təqdir olunur. ümumilikdə Azərbaycanın inkişaf etmiş ölkə statusuna malik olması qeyd olunan beynəlxalq təşkilatların rəylərində başlıca yer tutur, ölkəmizdə davam edən bu dinamik inkişafın 2010-cu ildə müşahidə ediləcəyinə əminlik ifadə edilir. Qeyd olunan təşkilatların ekspertləri ölkəmizdə həyata keçirilən islahatların çoxşaxəli olmasını və qeyri-neft bölmələri üçün daha yüksək artım meyilləri yaratmasını dəyərləndirərək Azərbaycan iqtisadiyyatının qarşıdakı illərdə pozitivliyi ilə bağlı proqnozlar irəli sürürlər.
Onu da qeyd edək ki, “Standard ənd Poor’s”la yanaşı, “Fitç İbka” reytinq agentliyi də Azərbaycanda sabit maliyyə meyillərinin müşahidə olunduğunu bəyan edib. “Fitç İbka” bir müddət əvvəl 2009-cu ilə dair açıqladığı reytinq cədvəlində maliyyə böhranı ilə bağlı bir sıra dövlətlərin reytinq göstəricilərini aşağı qiymətləndirsə də ölkəmizlə bağlı yekun rəy müsbət olub. Bu təşkilatın mütəxəssislərinin fikrincə, 2010-cu ildə proqnozlaşdırılan inkişaf dinamikası respublikamızın reytinqinin yüksəlməsi üçün əlverişli zəmin yaradacaq. “Fitç İbka”nın mütəxəssisləri hesab edirlər ki, gələn il ölkəmizdə maliyyə sabitliyi möhkəm olmaqla ümumilikdə makroiqtisadi vəziyyətə mühüm təsir göstərəcək. 2010-cu ildə Azərbaycanın xarici tərəfdaşları ilə ticarət münasibətləri aktiv şəkildə davam edəcək və respublikamızın tədiyyə balansı müsbət saldo ilə nəticələnəcək. Bu isə ümumi daxili məhsulun 14 faiz nisbətində olacaq.
ümumiyyətlə, “Standard ənd Poor’s”, eləcə də “Fitç İbka” və digər reytinq təşkilatlarının müəyyən etdiyi kredit reytinqləri Azərbaycan üçün iqtisadi perspektiv baxımından mühüm əhəmiyyət kəsb edən amil kimi səciyyələndirilə bilər. Belə ki, “BB+” reytinqinin əldə olunması ölkəmizə beynəlxalq maliyyə bazarlarında etimadın daha da yüksəlməsinə təminat verməklə yanaşı, həm də iri şirkətlərin Azərbaycana investisiya qoyuluşlarını artıracaq.
ELBRUS CƏFƏRLİ

Paylaş:

Baxılıb: 1390 dəfə