Güclü qadın, yoxsa...Əzilən qadın

Bakı:

33 °C

35 %

3 m/s

Əlaqə

AZ RU EN

Ana səhifə / MEDİA / Güclü qadın, yoxsa...Əzilən qadın

Güclü qadın, yoxsa...Əzilən qadın

06.03.2022 [10:08]

MÜŞFİQƏ

Qadınlar cəmiyyətin zərif üzvü kimi sevilir, seçilir və xüsusi münasibəti tələb edən həssas üzvüdür. Zərif olduqları qədər zəif deyillər, əksinə bəlkə də ən çətin işlərin öhdəsindən layiqincə gəlirlər. Amma bütün qadınlarımız güclüdürlərmi?

Azərbaycan qadınları artıq cəmiyyətin aparıcı qüvvəsinə çevriliblər. Dünyanın bir çox ölkələrinin qadınlarından əvvəl seçib-seçilmək hüququ əldə etməsi, elm, mədəniyyət və digər sahələrdə qazandığı uğurlar Azərbaycan qadınının mədəni və intellektual potensialından xəbər verir. Bu gün Azərbaycan qadınının səsi dünyanın dörd bir tərəfindən gəlir.

Belə qüvvələrimizdən biri bu günlərdə Azərbaycanda Amerika Ticarət Palatasına ilk dəfə qadın prezident seçilən Nərgiz Nəsrullayeva-Müdüroğludur. Nərgiz xanım dövlət və özəl sektorda rəhbər vəzifələrdə çalışıb və 25 illik təcrübəyə malikdir.

O, Harvard Kennedi Məktəbinin məzunudur. Landmark Biznes Mərkəzini təmsil edən qəhrəmanımız 45 milyard dollarlıq aktivi olan Azərbaycan Dövlət Neft Fondunun (ADNF) icraçı direktorunun müşaviri vəzifəsində çalışır. “AmCham Azərbaycan”ın İcraçı direktoru 11 il ərzində Palatanın inkişafında mühüm rol oynayıb.

Qeyd edək ki, Azərbaycanda biznes mühitinin yaxşılaşdırılmasına töhfə verən “AmCham Azərbaycan” 1996-cı ildən ölkədə fəaliyyət göstərir. Hazırda ölkədəki xarici investisiyaların 80%-dən çoxunu təmsil edən 250 üzv şirkəti özündə birləşdirir.

Medalın digər üzü - sığınacağdakı qadınların acı taleyi

“Medalın digər üzünü də görmək lazımdır” deyiblər. Güclü, öz ayaqları üstə duran qadınlarımızla yanaşı, ailə-məişət zorakılığına məruz qalan və sığınacaqlarda yaşayan qadınlarımız da var. Bu gün onlar bayramlarını sığınacaqda keçirməlidirlər. Cəmiyyətdə baş verən cinayətlər, fiziki zorakılıq hallarının çoxalması onları sığınacaqlara sığınmağa məcbur edir. Onlardan kimisinin sevgiyə, kimisinin qayğıya, kimisinin də pul və işə ehtiyacı var.

2002-ci ildən bəri sığınacaqlar cəmiyyətdə baş verən cinayətlərin, zorakılığın qurbanlarının evinə çevrilib. Yüzlərlə qadının hekayəsinə şahid olub. Qəhrəmanlar dəyişsə də, hadisə yeri eynidir.

Belə qadınlarımızdan biri də Mehribandır. Mehriban həmin o dediyimiz medalın digər üzüdür. Onun taleyi sığınacağa üz tutan bir çox qadınların acı həyatına misaldır. Sığınacaqda qalan qadın bir müddət sonra evə qayıtmaq qərarına gəlsə də, körpəsinin gözü qarşısında əri tərəfindən bıçaqlandı. Uşağının əlindən alınması düşüncəsi belə ona ölümə bərabər idi. Acı sonluq baş verdi. Mehriban vəfat etdi, onu bıçaqlayan ər həbsə düşdü. Körpənin taleyi isə hələ bundan sonra yazılacaq...

Tənha qadın, susma danış!

Hazırda sığınacağa yerləşdirilən qadınlardan biri ilə sizi tanış etmək istərdik. Adı şərti olaraq Gülzar (Cəfər Cabbarlının qadın qəhrəmanlarından olan Gülzarın adına xitabən) seçilib. Gülzarın 54 yaşı var. Doğulub, boya-başa çatdığı Salyan rayonundan Cəlilabada gəlin köçən qadının başına həyatın olmazın oyunları gəlib: “Ailə qurandan sonra döyülməyə məruz qalmışam. İki körpə uşaqla hansı şəraitdə yaşayacağımı bilmirdim. Hələ zülmün içində bərkiməmişdim. Sonradan həyat yoldaşım öz xalası qızı ilə də evləndi. Uşaqları mənim əlimdən aldı, özümü də gətirib atamın evində qoydu. Bir müddət qohumların qapılarında yaşadım. Sonra yoldaşımın avtomobil qəzası keçirib vəfat etməsi xəbərini aldım”.

Gülzar deyir ki, keçmiş həyat yoldaşı dünyasını dəyişəndən sonra qaynı onun evini satıb özünü isə ruhi xəstəxanaya yerləşdirib. Daha sonra qocalar evinə sığınmalı olub: “Xəstəxanadan çıxandan sonra övladlarımın yanına getdim. Oğlum məni əvvəl qəbul etməsə də, sonra məni evə buraxdı. Bir müddət onlarla yaşadıqdan sonra vəziyyətin dözülməz olduğunu gördüm. Onların dolanışığı həddən artıq çətin idi. Özümü onlara yük kimi hiss etdim və yenidən Bakıya qayıtdım”.

Gülzar sığınacaq sayəsində özünə iş tapsa da, ahıl yaşında əzizlərindən, nəvələrindən uzaq ömür sürür.

Göründüyü kimi, hər qadının öz taleyi var. Mütəxəssislərin sözlərinə görə, problemlərin təməlində təhsilsizlik dayanır. Qızların təhsildən yayındırılaraq erkən yaşda ərə verilməsi indi Azərbaycanın bir sıra regionlarının acı reallığıdır. Qadının cəmiyyətdə öz layiqli yerini tutması üçün təhsil alması mütləqdir.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Gender, ailə və demoqrafiya məsələlərinin işıqlandırılması” istiqaməti üzrə hazırlanmışdır

Paylaş:

Baxılıb: 1148 dəfə