Milli dəyərlərimiz!

Bakı:

0 °C

80 %

10 m/s

Əlaqə

AZ RU EN

Ana səhifə / MEDİA / Milli dəyərlərimiz!

Milli dəyərlərimiz!

05.09.2023 [11:40]

Keçmişimizlə bu günümüzün mənəvi “körpüsü”...

Yeganə BAYRAMOVA

Hər bir milləti dünyada tanıdan və digər xalqlardan fərqləndirən vacib xüsusiyyətlərdən biri onun adət və ənənələrə, yüksək mənəvi dəyərlər sisteminə malik olmasıdır. Dünyanın ən qədim xalqlarından olan Azərbaycan xalqı da özünün zəngin milli, əxlaqi və mənəvi dəyərləri ilə bəşər sivilizasiyasına əvəzsiz töhfələr verib. Xalqımız özünəbənzər adət və ənənələri, yüksək mənəviyyatı, dövlətçilik tarixi ilə daim diqqətləri cəlb edib. Min illər boyu formalaşan və xalqımızın yüksək mənəvi dəyərlərə malik olduğunu göstərən təkraredilməz adət və ənənələr millətimizin keçmişi ilə bu günü və gələcəyi arasında sarsılmaz bir mənəvi körpü rolunu oynamaqdadır.

Güclü dövlətçilik quruculuğu ilə adət-ənənələr və onların formalaşdırdığı milli dəyərlər sistemi arasında sıx vəhdət var. Bu baxımdan hər bir dövlətin gücü adət və ənənələrin cəmiyyəti əxlaqi, milli vətənpərvərlik baxımından düzgün istiqamətə yönəltməsindən asılıdır. Daha dəqiq desək, güclü və qüdrətli dövlətin meydana çıxmasında adət və ənənələr münasibətlərin tənzimləyicisi, istiqamətvericisi funksiyası ilə önəmli rol oynayır.

Mövzunu “Yeni Azərbaycan”a dəyərləndirən sosioloq Sahib Altayın sözlərinə görə, dövlətin və xalqın var olması üçün onun dövlətçilik ənənələrinin, elm və mədəniyyətinin, eləcə də milli dəyərlərinin qorunması vacibdir. O, qeyd edib ki, bu gün Azərbaycanın dövlətçilik tarixi və elm-mədəniyyəti uğurla təbliğ edilir, milli-mənəvi dəyərlərimizə dövlət səviyyəsində yüksək qiymət verilir: “Azərbaycanda milli adət-ənənələr mühafizə olunur və inkişaf etdirilir. Xalqımızın milli dəyərlərinə və mədəni irsinə bağlılığı dövlətçilik tarixinin qorunması üçün ən böyük töhfədir. Bunun nəticəsidir ki, bu gün Azərbaycan xalqının əksər nümayəndələri tariximizin müxtəlif mərhələləri, həmçinin 30 illik müstəqillik dövrü barədə kifayət qədər məlumatlıdırlar. Hesab edirəm ki, müstəqillik dövründə milli-mənəvi dəyərlərin qorunmasına söykənən təbliğat işi əsasən 44 günlük Vətən müharibəsində öz bəhrəsini verib. Qeyd etmək yerinə düşər ki, Vətən müharibəsində heç zaman Qarabağda olmayan, həmin əraziləri yalnız mətbuatdan və dərsliklərdən tanıyan yeni nəsil Ali Baş Komandanın rəhbərliyi altında Zəfər çaldı. Bu, Azərbaycan gəncliyinin, eləcə də xalqının tariximizə olan diqqəti kimi dəyərləndirilməlidir”.

S.Altay bildirib ki, Azərbaycan gəncləri dünyanın hər yerində ölkəmizlə bağlı həqiqətləri yayır. Həmçinin, öyrəndikləri təcrübələri Azərbaycanda tətbiq edirlər: “Azərbaycan dövlətçiliyi həyatın bütün sahələrində, o cümlədən gənclər üçün hər cür şərait yaradıb. Ona görə də gənclərimiz və hər birimiz dövlətçilik tarixinin, milli adət-ənənələrin, elm və mədəniyyətin təbliği ilə bağlı əlimizdən nə gəlirsə etməliyik”.

Sosioloqun qənaətincə, Azərbaycanda ailə institutu tarixən möhkəm olub, milli dəyərlərimizin əsas sütunu olan qocaya, qadına, uşağa hörmət xalqın bir çox nümayəndələri tərəfindən şüurlu şəkildə icra edilir: “Əlbəttə ki, bu mənada müəyyən boşluqlar da müşahidə edilir ki, onları qloballaşmanın nəticəsi kimi qəbul etmək lazımdır. Bəzən Avropa dəyərlərinin mənimsənilməsi və Avropaya inteqrasiya adı altında milli adət-ənənələrə zidd olan elementlərin təbliği təəssüf doğurur. Yəni milli dəyərlərimizlə uzlaşmayan elementlərin təbliği qəbuledilməzdir. Lakin biz istəsək də, istəməsək də, bu prosesin içindəyik və qloballaşmanın dalğası ilə üz-üzə qalmaq məcburiyyətindəyik. Sözsüz ki, qloballaşma nəticəsində bir çox xalqların, etnik qrupların dilləri və adət-ənənələri itib gedəcək. Deməli, yalnız o dövlətlər və xalqlar öz dilini, adət-ənənələrini qoruyub saxlaya biləcəklər ki, onlar öz tarixini yaşadır, milli-mənəvi dəyərlərini, elm-mədəniyyətini və folklorunu daim təbliğ edir. Milli kimliyini mühafizə edərək gənc nəslə ötürən cəmiyyət bir xalq və dövlət kimi daim mövcudluğunu qoruya bilər. Ona görə də hər bir Azərbaycan vətəndaşı dövlətçilik tarixinin, milli adət-ənənələrinin, elm və mədəniyyətinin təbliğinə ciddi önəm verməlidir”.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycanın dövlətçilik tarixinin, milli adət-ənənələrinin, elm və mədəniyyətinin təbliği” istiqaməti üzrə hazırlanmışdır

Paylaş:

Baxılıb: 794 dəfə