Nurəngiz Gün yaradıcılığına işıq saçan “Səksən yaşın səksən anı” miniatür kitabı

Bakı:

24 °C

63 %

1 m/s

Əlaqə

AZ RU EN

Ana səhifə / Mədəniyyət / Nurəngiz Gün yaradıcılığına işıq saçan “Səksən yaşın səksən anı” miniatür kitabı

Nurəngiz Gün yaradıcılığına işıq saçan “Səksən yaşın səksən anı” miniatür kitabı

24.11.2018 [10:57]

Noyabrın 23-də Miniatür Kitab Muzeyində tanınmış şair Nurəngiz Günün 80 illik yubileyi münasibətilə yeni çap olunmuş “Səksən yaşın səksən anı” miniatür kitabının təqdimat mərasimi keçirilib.
AZƏRTAC xəbər verir ki, tədbiri açan muzeyin təsisçisi və yaradıcısı, Əməkdar mədəniyyət işçisi Zərifə Salahova kitab barədə fikirlərini bölüşüb. Bildirib ki, miniatür kitab 2018-ci ildə “İndigo” mətbəəsində 100 nüsxə tirajla çapdan çıxıb. Ölçüsü 75x60 millimetr olan kitab 268 səhifədən ibarətdir. Səksən şeirin yer aldığı nəşrə 80 ədəd rəngli və ağ-qara fotoşəkil daxil edilib.
Şairənin qızı, Milli Məclisin deputatı Jalə Əliyeva 80 illik yubileyi münasibətilə il ərzində Nurəngiz Günə həsr olunmuş tədbirlərdən, onun həyat və yaradıcılığını əks etdirən məqalələrdən, monoqrafiyalardan danışıb: “Onun haqqında sağlığında, xüsusilə də haqq dünyasına qovuşduqdan sonra onlarla dəyərli elmi, publisistik məqalələr, esselər, şeirlər yazılıb. Filologiya üzrə fəlsəfə doktoru Bahar Bərdəli doktorluq işi, Maşallah Məftun “Güllərin soyqırımı” poemasını, filologiya üzrə fəlsəfə doktoru Esmira Fuad monoqrafiya hazırlayıb. Miniatür Kitab Mərkəzinin tərtib etdiyi “Səksən yaşın səksən anı” miniatür kitab da Nurəngiz Günün əziz xatirəsinə həsr olunmuş tədbirlər silsiləsindəndir”.
Milli Məclisin deputatı Elmira Axundova Nurəngiz Günlə bağlı məqalə yazdığını söyləyib, onu hər zaman hörmətlə xatırlayacağını bildirib. O deyib: “Keçmiş sovet dönəmində hər yaradıcı adamın istədiyi kimi yanaşması çox çətin idi. Amma o, bacardı. Çox səmimi bir insan olmaqla yanaşı, maddi sərvətlər arxasınca qaçmadı. Onun özünəməxsus yolu vardı. Fərqli metodlardan yazmasına baxmayaraq, qələmi ilə sevildi. Özünü daha çox masa arxasında xoşbəxt hiss edən şairənin şeirlərinin dili sadə olmaqla yanaşı, çox axıcı idi. Onda daxili və zahiri gözəllik vəhdət təşkil edirdi, bütöv insan olması şeirlərində öz əksini tapıb”.
Tədbirdə Xalq yazıçısı Çingiz Abdullayev, tanımış şair, Bədii Tərcümə Mərkəzinin direktoru Səlim Babullaoğlu, Mədəniyyət Nazirliyinin sektor müdiri Cəmil Quliyev, filologiya üzrə fəlsəfə doktorları Bahar Bərdəli, Esmira Fuad və başqaları çıxışlarında Nurəngiz Günü böyük ehtiram və sevgi ilə anaraq, onun xatirəsini yaşatdığı üçün qızı Jalə Əliyevaya təşəkkür ediblər.
Çıxışlarda ədəbiyyata “Tanrı” povesti ilə gələn Nurəngiz Gün istedadlı şair, publisist və gözəl insan kimi xarakterizə edilib.
Bildirib ki, ədəbiyyatımızda öz yeri olan istedadlı şairin şeirlərində qəm və kədər notları üstünlük təşkil edib. Şeirlərindəki həmin motivlər, təbii ki, xalqımızın başına gətirilən müsibətlərdən qaynaqlanırdı. 20 Yanvar faciəsi, Xocalı soyqırımı, Qarabağ dərdi şairin yaradıcılığında yeni bir səhifə açmışdı. Onun “Xocalı simfoniyası” bu mövzuda yazılmış ən təsirli əsərlərdən biridir.
Nurəngiz Gün həm yaradıcılığı, həm də yüksək mədəniyyəti ilə insanları özünə cəlb edib. Onun işğalda olan torpaqlarımızın dərdləri ilə baş-başa qalaraq yazdığı və bizləri də bu həsrətin oduna yandırdığı bir sıra şeirləri, poemaları öz fəlsəfi-lirik, psixoloji mahiyyəti baxımından düşündürücüdür. Tanınmış poeziya ustasının ürəyindəki yanğı, ağrı-acı, Vətən təəssübkeşliyi bütün şeirlərinə hopub. Nurəngiz Günün şeirlərindəki bu ağrı Qarabağ dərdi, itirilmiş torpaqlarımızın həsrətidir. Bu həsrət onu yatmağa da qoymur, yuxusunu ərşə çəkir, qəlbini göyüm-göyüm göynədir. Şairə torpağını, xalqını, millətini sevən bir ziyalı idi.
Sonda şairənin qızı Jalə Əliyeva tədbirin təşkilatçılarına və iştirakçılarına təşəkkürünü bildirib.

Paylaş:

Baxılıb: 1064 dəfə