Avropa Şurası səhvini düzəldəcəkmi?

Bakı:

11 °C

54 %

7 m/s

Əlaqə

AZ RU EN

Ana səhifə / Siyasət / Avropa Şurası səhvini düzəldəcəkmi?

Avropa Şurası səhvini düzəldəcəkmi?

26.09.2024 [12:14]

Təşkilat erməni lobbisinin əlində alətə çevrilməməlidir

Azərbaycanın xarici işlər naziri Ceyhun Bayramov BMT Baş Assambleyasının 79-cu sessiyasının yüksək səviyyəli həftəsi çərçivəsində sentyabrın 24-də Avropa Şurasının baş katibi Alen Berse ilə görüşüb. Görüşdə Azərbaycan və Avropa Şurası arasında mövcud gündəlikdə duran məsələlər, habelə cari regional vəziyyət müzakirə olunub.

Ceyhun Bayramov Avropa Şurasının baş katibi ilə görüşüb

Azərbaycanın dialoq və qarşılıqlı hörmətə əsaslanaraq hər zaman Avropa Şurasının təsisatları ilə əməkdaşlığa açıq olduğu bildirilib. Buna baxmayaraq, Avropa Şurası Parlament Assambleyasının (AŞPA) cari ilin yanvar ayında Azərbaycan nümayəndə heyətinin etimadnaməsinin təsdiq etməməsinə dair qərarının əsassız və açıq şəkildə qərəzli olmaqla yanaşı, dialoqa xidmət etmədiyi vurğulanıb. Tərəflər arasındakı bütün fikir ayrılıqlarının dialoq, qarşılıqlı hörmət və anlaşma vasitəsilə həll edilməli olduğu, Azərbaycan tərəfinin Avropa Şurası və onun təsisatlarından gözləntisinin də məhz bundan ibarət olduğu bildirilib.

Nazir Ceyhun Bayramov, həmçinin qarşı tərəfə postmünaqişə dövründə mövcud vəziyyət və reallıqlar barədə ətraflı məlumat verib, Azərbaycan və Ermənistan arasında sülh prosesinin gedişatından bəhs edib.

AŞPA ikili standartlar “məkanı”dır

Məlumdur ki, hazırda Azərbaycanla Avropa Şurası arasında münasibətlər kifayət qədər soyuqdur. Bunun səbəbi isə təşkilatın ölkəmizə qarşı qərəzidir. Azərbaycanın dinamik inkişafı, regional və beynəlxalq miqyasda etibarlı tərəfdaş kimi tanınması, xüsusilə ərazi bütövlüyünü və suverenliyini bərpa etməsi bəzi xarici dairələr tərəfindən narahatlıqla qarşılanır. Azərbaycanın artan gücünün, müstəqil siyasətinin narahatlıqla qarşılanması səbəbindən həmin dairələr müxtəlif vasitələrlə ölkəmizə təsir etməyə çalışırlar. Onlar ölkəmizə qarşı təzyiq mexanizmi formalaşdırmaq üçün müxtəlif ölkələr və təşkilatlar çərçivəsində “qara piar” kampaniyası aparır və Azərbaycana qarşı əsassız sənədlər qəbul edirlər. Belə ki, bir qisim təşkilatlar hesabat və ya bəyanatlarında qeyri-obyektiv məlumatları dövriyyəyə buraxmaqla ölkəmizi hədəfə alır və dünya ictimaiyyətini çaşdırmaqla mənfi ictimai rəy formalaşdırmağa çalışırlar.

Bu təşkilatlardan biri də Avropa Şurasıdır. Xatırladaq ki, həmin təşkilat dəfələrlə ölkəmizə qarşı qeyri-obyektiv mövqe sərgiləyib, qurumun Parlament Assambleyası isə əsassız qətnamələr qəbul edib. İslamofobiyanın kök saldığı beynəlxalq təşkilatlardan biri olan Avropa Şurası Parlament Assambleyası tərəfindən 2024-cü ilin yanvar ayında Azərbaycan nümayəndə heyətinin etimadnaməsinin qəbul və ratifikasiya olunmaması ölkəmizə qarşı qərəzin daha bir bariz nümunəsidir. Təşkilatda iki müsəlman ölkəsindən biri olan Azərbaycan AŞPA-dakı islamofob ritorikaya cavab olaraq təşkilatdakı fəaliyyətini dayandırdı.

Dövlətimiz milli maraqlarımızı qoruyur

Ümumiyyətlə, müstəqil Azərbaycan özünün milli maraqlar üzərində qurulan xarici siyasətində beynəlxalq təşkilatlarda təmsilçiliyə böyük önəm verir. Bunun nəticəsidir ki, hazırda respublikamız həm geniş İslam dünyasında, həm də Avropanın müxtəlif təşkilatlarında uğurla təmsil olunur. AŞPA kimi ikili standartlardan çıxış edən qurumlar isə qarşılıqlı münasibətlərə xələl gətirir. Xaricdəki erməni lobbisinin təsirlərinə məruz qalan AŞPA ölkəmizə münasibətdə adekvat olmayan davranışlar sərgiləyib. Azərbaycan özünün ərazi bütövlüyünü və suverenliyini bərpa etdikdən sonra təşkilat tərəfindən ölkəmizə qarşı qərəzli qərarlar qəbul olunub. Ötən ilin sentyabrında Qarabağ erməniləri könüllü surətdə Ermənistana köç etdikləri halda, AŞPA ölkəmizi əsassız olaraq etnik təmizləmədə ittiham edib. Bu kimi qərəz fonunda yanvar ayında məlum qərar verilib. Buna cavab olaraq Azərbaycan nümayəndə heyəti qurumda fəaliyyətini dayandırmaqla yanaşı, həmin qərara səs verən avropalı deputatların ölkəmizə girişinə qadağa qoyulub.

Azərbaycanın tələbi...

Real mənzərəni Prezident İlham Əliyev bu ayın əvvəlində İtaliyaya səfəri zamanı Beynəlxalq Çernobbio Forumunda “Yeni geosiyasi şəraitdə Azərbaycanın rolu” adlı sessiyada ona ünvanlanan sualları cavablandırarkən ifadə edib. Dövlətimizin başçısının bildirdiyi kimi, biz bu gün Ukraynanın etməyə çalışdığından fərqli heç bir şey etməmişik. Ukrayna bu gün Qərbin çox geniş dəstəyinə rəğmən uğursuz şəkildə ərazi bütövlüyünü bərpa etməyə çalışır. Biz özümüz isə heç bir dəstək olmadan ərazi bütövlüyümüzü bərpa etdik. Biz öz torpağımızda döyüşdük və hər hansı təcavüzə əl atmadıq. “Buna səs verənlər bizi Avropa Şurasında görmək istəməyənlərdir. Yəni Azərbaycanın qərarı adekvat idi. Bizim qərarımız buna cavab idi. Onlar tərəfindən qərarın dəyişdiriləcəyi və bizim hüquqlarımızı bərpa etdikləri təqdirdə, gələn ilin yanvar ayında belə bir fürsət olacaqdır, bizim tətbiq etdiyimiz qadağa aradan qaldırılacaq. ...Bizim nümayəndə heyətimizin fəaliyyəti bərpa edilməlidir və o zaman bu qadağa aradan qaldırılacaq”, - deyə Prezident İlham Əliyev vurğulayıb.

Beləliklə, Azərbaycanın Avropa Şurası qarşısında haqlı tələbi aydındır. Bu tələb yernə yetirildikdən sonra əməkdaşlıq bərpa ediləcək. BMT Baş Assambleyasının 79-cu sessiyası çərçivəsində xarici işlər naziri Ceyhun Bayramov da dövlətimizin mövqeyini bir daha Avropa Şurasının baş katibinə çatdırıb. İndi seçim bu təşkilatdadır. Qərarı onlar verməlidir.

Nardar BAYRAMLI

Paylaş:

Baxılıb: 517 dəfə