17 beynəlxalq konfrans...

Bakı:

25 °C

61 %

5 m/s

Əlaqə

AZ RU EN

Ana səhifə / Siyasət / 17 beynəlxalq konfrans...

17 beynəlxalq konfrans...

17.12.2024 [09:06]

Bakı Təşəbbüs Qrupu hesabat açıqlayıb

Azərbaycan müstəmləkəçiliyə və neokolonializmə qarşı mübarizə aparan xalqları dəstəkləyir. Dövlətimiz bu mövqeyini bütün beynəlxalq platformalarda bəyan edib. Bakı Təşəbbüs Qrupunun (BTQ) yaradılması da bu məqsədə xidmət edir. Belə ki, Bakı Təşəbbüs Qrupu Qoşulmama Hərəkatının ötən il iyulun 5-6-da Bakıda keçirilmiş nazirlər toplantısı çərçivəsində baş tutan tədbirin nəticəsi olaraq yaradılıb. Yarandığı vaxtdan Bakı Təşəbbüs Qrupu ölkəmizdə və xaricdə, o cümlədən BMT müstəvisində həmin xalqların hüquqları ilə bağlı çoxlu sayda beynəlxalq konfrans təşkil edib.

Qrup tərəfindən 7-dən çox hesabat hazırlanıb

Yeri gəlmişkən, Dekolonizasiya Günü münasibətilə geniş hesabatın təqdimatı zamanı Bakı Təşəbbüs Qrupunun icraçı direktoru Abbas Abbasov bildirib ki, bu il təşkilat tərəfindən 17 beynəlxalq konfrans keçirilib. Bu konfransların əksəriyyəti BMT-nin mənzil qərargahında reallaşdırılıb. Onun sözlərinə görə, Bakı Təşəbbüs Qrupu tərəfindən 7-dən çox hesabat hazırlanıb və beynəlxalq təşkilatlara təqdim olunub. Həmçinin, Bakı Təşəbbüs Qrupu 2024-cü ildə 5 memorandum imzalayıb. BTQ beyin mərkəzi kimi xarici tədqiqatçılarla sıx əməkdaşlıq edir, dekolonizasiya sahəsində tanınmış araşdırmaçılarla birgə işlər görür.

A.Abbasov diqqətə çatdırıb ki, bu xüsusda, xarici tədqiqatçılar tərəfindən iki sanballı hesabat hazırlanıb: “Tədqiqatın məqsədlərindən biri materik Fransanın dənizaşırı əraziləri ilə eyni idarəçiliyə və qanunvericiliyə baxmayaraq kəskin fərqləndiyini, bu xüsusda Fransa hökumətinin məqsədyönlü diskriminasiya siyasəti yürütdüyünü oxuculara göstərməkdir. Gəlir səviyyələri, iqtisadi struktur, xarici borc, idxal və ixrac, enerji istehsalı və infrastruktur kimi əsas iqtisadi göstəricilərə diqqət yetirməklə bu araşdırma hər bir regionun üzləşdiyi fərqli çətinlikləri və imkanları təqdim edir”.

BTQ-nin sıx əməkdaşlıq etdiyi regionların sayı 18-ə çatıb

İcraçı direktor gələn il keçiriləcək tədbirlərin formatında dəyişiklik olacağını, alternativ addımlar barədə də düşünüldüyünü söyləyib. Hazırda Qrupun sıx əməkdaşlıq etdiyi regionların sayının 18-ə çatdığını bildirən A.Abbasov bunun da müsbət və mənfi yönlərinin mövcud olduğunu deyib. Gələn il Bakı Təşəbbüs Qrupunun coğrafi mövqeyini genişləndirmək planlarından danışan A.Abbasov vurğulayıb ki, BTQ 2025-ci ildən Reünyon ilə əməkdaşlığa başlaya bilər.

Fransanın müstəmləkəçi siyasəti pislənilir

“İqtisadi bərabərsizliklər və inkişafa dair çağırışlar: Fransanın bəzi dənizaşırı əraziləri ilə ABŞ-ın asılı ərazilərinin müqayisəli təhlili”ndə də materik Fransa ilə onun dənizaşırı əraziləri, faktiki müstəmləkələri olan Yeni Kaledoniya və Fransız Polineziyası arasındakı iqtisadi, eləcə də əhalinin sosial vəziyyəti və həyat şəraiti, gəlirləri, logistik imkanları və sair fərqlərin müqayisələri aparılıb”. Bu fikirləri isə hesabatın təqdimatı zamanı Bakı Təşəbbüs Qrupunun şöbə müdiri Elgün Hacıyev söyləyib. O bildirib ki, Fransa iqtisadiyyatı istehsal, xidmət və texnologiya kimi sənayelərin əhəmiyyətli töhfələri ilə yüksək şaxələnib. Bunun əksinə olaraq, Yeni Kaledoniya və Fransız Polineziyasının iqtisadiyyatı materik Fransa ilə müqayisədə məhdud diversifikasiyalı turizm, mədənçıxarma və kənd təsərrüfatı kimi xüsusi sektorlardan yüksək asılılıqla xarakterizə olunur. Bundan əlavə, Fransada adambaşına düşən ümumi daxili məhsul nisbətən çox olsa da, onun xaricdəki əraziləri daha yüksək işsizlik səviyyəsi, adambaşına düşən gəlirin aşağı olması kimi problemlərlə üzləşir.

“Tədqiqat, həmçinin Fransanın dənizaşırı ərazilərinin enerji istehsalı imkanlarını araşdırır. Bildirilir ki, xüsusilə Yeni Kaledoniya mədən sənayesindən, Fransız Polineziyası isə turizm və enerji idxalından asılıdır”, - deyə şöbə müdiri qeyd edib.

N.BAYRAMLI

Paylaş:

Baxılıb: 656 dəfə