Bələdiyyə seçkiləri ilə əlaqədar mətbuat konfransı təşkil olunub

Bakı:

13 °C

76 %

12 m/s

Əlaqə

AZ RU EN

Ana səhifə / Siyasət / Bələdiyyə seçkiləri ilə əlaqədar mətbuat konfransı təşkil olunub

Bələdiyyə seçkiləri ilə əlaqədar mətbuat konfransı təşkil olunub

28.01.2025 [17:05]

Yanvarın 28-də Mərkəzi Seçki Komissiyasının (MSK) sədri Məzahir Pənahov bələdiyyə seçkiləri ilə əlaqədar mətbuat konfransı keçirib.

AZƏRTAC xəbər verir ki, media subyektlərinin nümayəndələri tərəfindən operativ və geniş şəkildə işıqlandırılan mətbuat konfransında bələdiyyə seçkilərinə son hazırlıq işləri barədə yekun statistik göstəricilər təqdim olunub və məlumatlar verilib.

Tədbirdə çıxış edən Məzahir Pənahov bildirib ki, seçkilərin hazırlanıb keçirilməsinə məsul orqan kimi MSK bələdiyyə seçkilərinin təyin edildiyi ilk gündən prosesi Seçki Məcəlləsinin və digər qanunvericilik aktlarının tələblərinə uyğun təşkil etməyə çalışıb. O, MSK-nın atdığı bütün addımların şəffaf şəkildə həyata keçirildiyini, bu işdə media nümayəndələrinin də prosesləri müşahidə etdiyini diqqətə çatdırıb.

Seçicilərin öz konstitusion hüquqlarını reallaşdırmaları üçün bütün lazımi şəraitin yaradıldığını deyən MSK-nın sədri qeyd edib ki, seçkilər zamanı respublika üzrə 685 bələdiyyəyə 8 min 71 üzv seçiləcək. Bələdiyyə seçkiləri 118 dairəni əhatə edəcək. Azərbaycanda mövcud olan 125 dairənin 7-si işğaldan azad edilmiş ərazilərdə yerləşdiyi üçün bu proseslərdə iştirak etmir. Ümumilikdə həmin dairələrdən başqa digər 4 dairədə də məcburi köçkün vətəndaşlarımız var.

Sədr deyib ki, seçkilər ümumilikdə 5846 məntəqəni əhatə edəcək. Bunlardan 5734-ü daimi, 112-si müvəqqəti əsaslarla yaradılan məntəqələrdir.

“Bələdiyyə seçkilərində səsvermə hüququ olan seçicilərin sayı 5 milyon 961 min 987 nəfərdir. Seçkilərlə əlaqədar bütün seçici siyahıları dəqiqləşdirilib və məntəqələrdən asılıb. Seçkilərdə şəffaflığın təmin edilməsi üçün 1000 məntəqədə veb-kameralar quraşdırılıb. Sevindiricidir ki, indiyə qədər veb-kameraların fəaliyyəti ilə bağlı heç bir problem yaranmayıb. Veb-kamera praktikasının müəllifliyi Azərbaycana məxsusdur”, - deyə Məzahir Pənahov vurğulayıb.

Bələdiyyə seçkilərində qeydə alınan namizədlərin 31 faizinin qadınlar olduğunu deyən sədr əlavə edib ki, namizədlərin 82 faizi ali təhsillidir.

O bildirib ki, 685 bələdiyyəyə seçkilər üzrə çap olunmuş bülletenlərə adı daxil edilən 16 min 92 namizədin 8424-ü 23 siyasi partiya tərəfindən irəli sürülüb. Ümumilikdə 6 milyon 52 min 721 seçki bülleteni çap olunub. Seçkilərdə 23 siyasi partiyanın üzvləri namizəd kimi qeydə alınıb ki, bu da Azərbaycanda bələdiyyə seçkilərinə marağın artmasının göstəricisidir.

Diqqətə çatdırılıb ki, bələdiyyə seçkilərini izləmək üçün qeydiyyatdan keçən yerli müşahidəçilərin sayı 70 min 625 nəfərdir.

MSK sədri vurğulayıb ki, seçkilər Seçki Məcəlləsinin tələbinə tam uyğun olmalıdır. O, Mərkəzi Seçki Komissiyasının seçkilərlə əlaqədar müxtəlif maarifləndirmə tədbirləri, təlimlər keçirdiyini də diqqətə çatdırıb.

Qeyd edilib ki, seçki günü səsvermə səhər saat 08:00-da başlayacaq, axşam saat 19:00-da başa çatacaq.

Paylaş:

Baxılıb: 431 dəfə