Yunanıstanda Azərbaycan nümayəndə heyətinin iştirakı ilə keçirilən Yay Olimpiya Məktəbinin açılış mərasimi olub

Bakı:

25 °C

50 %

1 m/s

AZ RU EN

Ana səhifə / Siyasət / Yunanıstanda Azərbaycan nümayəndə heyətinin iştirakı ilə keçirilən Yay Olimpiya Məktəbinin açılış mərasimi olub

Yunanıstanda Azərbaycan nümayəndə heyətinin iştirakı ilə keçirilən Yay Olimpiya Məktəbinin açılış mərasimi olub

06.08.2013 [08:33]

Heydər Əliyev Fondunun təşəbbüsü, Azərbaycan Respublikası Gənclər və İdman Nazirliyinin və Beynəlxalq Olimpiya Akademiyasının (BOA) birgə təşkilatçılığı ilə Yunanıstanda məşqçi-müəllimlər, fəal gənclər və könüllülər üçün təşkil olunmuş Yay Olimpiya Məktəbi davam edir.
Avqustun 4-də Qədim Olimpiya şəhərində yerləşən Beynəlxalq Olimpiya Akademiyasında (BOA) məktəbin açılış mərasimi keçirilib.
Əvvəlcə Olimpiya himni səsləndirilib.
BOA-nın direktoru Dionissis Gangas və BOA-nın dekanı, Yunanıstandakı Peleponnese Universitetinin vitse-rektoru Konstantinos Georiadis iştirakçıları salamlayıblar. Akademiyanın yaranma tarixi və fəaliyyəti barədə ətraflı məlumat verən natiqlər 2015-ci ildə Azərbaycanda keçiriləcək birinci Avropa Oyunlarının əhəmiyyətini yüksək qiymətləndiriblər.
Bildiriblər ki, Azərbaycanda Olimpiya Hərəkatı inkişafdadır. İdmançılar Olimpiya Oyunlarında uğurlu nəticələr əldə ediblər. Bunun üçün Azərbaycanda lazımi infrastruktur mövcuddur. Bütün bunlar da ölkədə idmana göstərilən dövlət qayğısının nümunəsidir.
Azərbaycan nümayəndə heyətinin rəhbəri, Gənclər və İdman Nazirliyinin elm və təhsil şöbəsinin müdiri Vüqar Əhmədov ölkəmizdə idmana göstərilən dövlət qayğısından danışıb və yüksək qonaqpərvərliyə görə BOA-nın rəhbərliyini öz minnətdarlığını bildirib.
Sonra qədim Olimpiya Oyunları və BOA-nın fəaliyyətindən bəhs olunan videoçarx nümayiş olunub.
BOA-nın dekanı, Yunanıstandakı Peleponnese Universitetinin vitse-rektoru Konstantinos Georiadis “1961-2013: Beynəlxalq Olimpiya Akademiyasının tarixi” və BOA-nın arxeoloqu Vassiliki Tzaçrista “Qədim Olimpiya Oyunlarının tarixi” mövzularında məruzələrlə çıxış ediblər.
Sonda iştirakçıların sualları cavablandırılıb.
İştirakçılar BOA-nın yaxınlığında müasir Olimpiya Oyunlarının keçirilməsində mühüm rol oynamış fransalı pedaqoq Baron Pyer de Kubertenin şərəfinə ucaldılmış abidəni ziyarət ediblər.
Fransalı pedaqoqun ürəyi məhz bu abidənin altında dəfn edilib. Mərasimdə abidə önünə əklil qoyulub və Azərbaycan nümayəndə heyətinin rəhbəri Vüqar Əhmədov BOA-nın direktoruna xatirə hədiyyələrini təqdim edib.
BOA-nın tikilməsində böyük xidmətləri olmuş alman və yunanıstanlı mühəndislərin şərəfinə ucaldılmış abidə də ziyarət olunub.

Paylaş:

Baxılıb: 2430 dəfə