Nəsimi rayonunda Xocalı faciəsinin 23-cü ildönümünə həsr olunan tədbir keçirilib

Bakı:

19 °C

88 %

0 m/s

Əlaqə

AZ RU EN

Ana səhifə / Siyasət / Nəsimi rayonunda Xocalı faciəsinin 23-cü ildönümünə həsr olunan tədbir keçirilib

Nəsimi rayonunda Xocalı faciəsinin 23-cü ildönümünə həsr olunan tədbir keçirilib

24.02.2015 [11:17]

Yeni Azərbaycan Partiyası (YAP) Nəsimi rayon təşkilatı və Nəsimi rayon İcra Hakimiyyətinin birgə təşkilatçılığı ilə Xocalı faciəsinin 23-cü ildönümünə həsr olunan “Justice for Khojaly” flaşmobunun təqdimat mərasimi keçirilib. Tədbirdə Nəsimi rayon ərazisində yerləşən idarə və müəssisələrin, eləcə də, ali və orta məktəblərin nümayəndələri iştirak ediblər. Təqdimat mərasimində əvvəlcə “Justice for Khojaly” flaşmobu nümayiş olunub. Daha sonra rayon ərazisində yerləşən H.Sarabski adına mədəniyyət evinin kollektivinin ifasında Xocalı faciəsini əks etdirən kompozisiya göstərilib.
Tədbirdə çıxış edən Nəsimi rayon İcra Hakimiyyətinin başçısı Nəsib Məhəməliyev Xocalı faciəsinin XX əsrin ən dəhşətli soyqırımı hadisələrindən biri olduğunu vurğulayıb. Xocalı soyqırımını bəşəriyyət tarixində yaşanmış ən qanlı qətliamlardan biri kimi xarakterizə edən N.Məhəməliyev vurğulayıb ki, bu soyqırımı erməni millətçiliyinin iç üzünün açılmasında önəmli bir mərhələni təşkil edir. Rayon İcra Hakimiyyətinin başçısı xatırladıb ki, 1992-ci ildə ölkəmizdə hakimiyyətdə olan siyasi qüvvələr bu faktın dünya ictimaiyyətinə çatdırılmasına nail ola bilməmiş, dünya Xocalıda baş verən dəhşətli qətliamlardan xəbər tutmamışdı.
Natiq qeyd edib ki, məhz Ulu öndər Heydər Əliyevin respublikada təkrar hakimiyyətə gəlişindən sonra Xocalı soyqırımına siyasi qiymət verildi və onun təşkilatçılarının adları dünya ictimaiyyətinə açıqlandı.
N.Məhəməliyev vurğulayıb ki, bu gün isə yürüdülən düzgün siyasət və aparılan məqsədyönlü təbliğatın sayəsində artıq bir çox ölkələrin parlamentlərində Xocalı faciəsi soyqırımı kimi tanınıb, beynəlxalq təşkilatlar Ermənistanı təcavüzkar dövlət kimi təsdiqləyiblər. Xocalı faciəsinin dünyaya təbliğində “Justice for Khojaly” flaşmobunun böyük faydası olacağına inandığını söyləyən N.Məhəməliyev bu işdə əməyi keçən hər kəsə öz təşəkkürünü bildirib.
“Justice for Khojaly” flaşmobunun qışın soyuq və şaxtalı günlərində, açıq havada 1500-dən artıq fəalın iştirakı ilə çəkildiyini xatırladan YAP Nəsimi rayon təşkilatının sədri, Milli Məclisin deputatı Məlahət İbrahimqızı 4 saat davam edən çəkilişlərdə gənclərimizin belə fəallıq göstərmələrini onlarda Vətən sevgisinin necə də böyük olması ilə əlaqələndirib.
“Xalqımız bu faciəni heç bir zaman unutmayacaq. Çünki Xocalı faciəsi zamanı sadə, əliyalın, köməksiz insanlar erməni vəhşiliyinin qurbanı olublar. Biz hamılıqla çalışmalıyıq ki, dünya bu faciəyə biganə qalmasın”, - deyən Məlahət İbrahimqızı bu məqsədlə çəkilən “Justice for Khojaly” flaşmobunun “YouTube” və digər sosial şəbəkələrdə yerləşdiriləcəyini bildirib.
“Bu gün bizim bir nömrəli vəzifəmiz Xocalı soyqırımını dünyaya təbliğ etməkdir. Nə qədər ki, ermənilər öz işğalçılıq siyasətlərindən əl çəkməyiblər, biz bu mübarizəmizi davam etdirməliyik”, - deyən təşkilat sədri xalqımızın bu faciəsini dünya ictimaiyyətinə daha dolğun şəkildə çatdırmaq üçün gəncləri daha fəal olmağa çağırıb.
Səlim LOĞMANOĞLU

Paylaş:

Baxılıb: 768 dəfə