“İnformasiya cəmiyyətinin inkişafında medianın rolu” mövzusunda konfrans-seminar keçirilib

Bakı:

27 °C

45 %

4 m/s

Əlaqə

AZ RU EN

Ana səhifə / Siyasət / “İnformasiya cəmiyyətinin inkişafında medianın rolu” mövzusunda konfrans-seminar keçirilib

“İnformasiya cəmiyyətinin inkişafında medianın rolu” mövzusunda konfrans-seminar keçirilib

19.03.2016 [10:13]

Martın 18-də Bakıda Qlobal Karyera İnstitutunun, İstanbul Yeni Yüzyıl Universitetinin və Azərbaycan Mətbuat Şurasının birgə təşkilatçılığı ilə “İnformasiya cəmiyyətinin inkişafında medianın rolu” mövzusunda konfrans-seminar keçirilib.
Tədbirdə çıxış edən Mətbuat Şurasının sədri, Milli Məclisin deputatı Əflatun Amaşov Azərbaycan-Türkiyə münasibətlərinin inkişafı, hər iki ölkənin mətbuat nümayəndələri arasında təcrübə mübadiləsinin aparılması baxımından bu konfrans-seminarın əhəmiyyətini qeyd edib. Türkiyənin Azərbaycanın müstəqilliyini tanıyan ilk dövlət olduğunu deyən millət vəkili Əflatun Amaşov Azərbaycanla bağlı həqiqətlərin dünyaya çatdırılmasında qardaş ölkənin mühüm rolunu vurğulayıb.
Azərbaycanın və Türkiyənin mətbuat nümayəndələri arasında təcrübə mübadiləsinin əhəmiyyətini qeyd edən Mətbuat Şurasının sədri artıq 2007-ci ildən iki ölkənin jurnalistlərinin müştərək layihələr, tədbirlər keçirdiklərini diqqətə çatdırıb. Bildirib ki, məhz həmin dövrdən etibarən türkdilli xalqların jurnalistlərinin forumları, konfransları təşkil olunur, geniş və səmərəli fikir mübadiləsi aparılır.
“Yeni Azərbaycan” qəzetinin baş redaktoru, Milli Məclisin deputatı Hikmət Babaoğlu isə postmodern cəmiyyətlərdə medianın mühüm güc və ya təsir vasitəsi kimi çıxış etdiyini deyib. O, müasir dövrdə güc nümayişinin və ya tətbiqinin media vasitəsilə həyata keçirildiyini, məhz bu baxımdan informasiya cəmiyyətlərində manipulyasiya hallarına yol verildiyini bildirib: “Bu gün media beynəlxalq münasibətlərdə elə bir vasitəyə çevrilib ki, ən az hərbi güc qədər mühüm rol oynayır. Beynəlxalq münasibətlərin əsas aktoru olan milli dövlətləri hərbi güclə deyil, “yumşaq güc”lə - media vasitəsilə də yıxmaq mümkündür və bu, hazırda beynəlxalq münasibətlər sistemində geniş tətbiq olunur”.
Millət vəkili Hikmət Babaoğlu “bir millət, iki dövlət” olan Azərbaycan və Türkiyənin milli təhlükəsizliklərinin identiklik təşkil etdiyini vurğulayaraq, bu baxımdan belə tədbirlərin əhəmiyyətini qeyd edib.
Qlobal Kariyera İnstitutunun direktoru Orxan Həsənoğlu 18 mart - Çanaqqala zəfəri günü münasibətilə tədbir iştirakçılarını təbrik edərək müasir informasiya cəmiyyətində mövcud proseslərdən danışıb. Müasir dövrdə ciddi informasiya müharibəsinin aparıldığını vurğulayan Orxan Həsənoğlu bu prosesdə medianın mühüm rol oynadığını söyləyib. O bildirib ki, dünyada texnologiyalar sürətlə inkişaf edir. Bu baxımdan biz istər-istəməz bu proseslərin içərisində oluruq. Sosial medianın inkişafı dövründə hər kəs artıq informasiya istehsalçısına çevrilir. Müasir dövrdə təhsilin və medianın mühüm rol oynadığını qeyd edən Orxan Həsənoğlu cəmiyyətin formalaşmasında mətbuatın önəmini xüsusi vurğulayıb, tədbirin işinə uğurlar arzulayıb.
Medianın cəmiyyətləri istiqamətləndirəcək mühüm güc vasitəsi olduğunu bildirən İstanbul Yeni Yüzyıl Universitetinin jurnalistika fakültəsinin dekanı, professor Aysel Aziz “İnformasiya cəmiyyətinin inkişafında medianın rolu” mövzusunda təqdimatla çıxış edib, müasir dünyada informasiya cəmiyyətinin aktual məsələlərindən danışıb.
O qeyd edib ki, informasiya cəmiyyətinə keçid prosesi 1990-cı illərdə internetin kəşfi ilə başladı: “Bununla da, hər kəsin özünü təqdim etdiyi nəhəng informasiya şəbəkəsi - Netvork ortaya çıxdı. Bu prosesdə medianın internetə keçidi kütləvi informasiya vasitələrinin xarakterini və fəaliyyətini dəyişdirdi, qəzetlərin yenidən qurulmasına, radio-televiziyaların internet üzərindən yayımlanmasına səbəb oldu”.
Sonda iştirakçılara sertifikatlar təqdim olunub.

Paylaş:

Baxılıb: 672 dəfə