Türkiyə Ali Məhkəməsinin nümayəndə heyəti Korrupsiyaya Qarşı Mübarizə Baş İdarəsində olub

Bakı:

24 °C

52 %

10 m/s

Əlaqə

AZ RU EN

Ana səhifə / Siyasət / Türkiyə Ali Məhkəməsinin nümayəndə heyəti Korrupsiyaya Qarşı Mübarizə Baş İdarəsində olub

Türkiyə Ali Məhkəməsinin nümayəndə heyəti Korrupsiyaya Qarşı Mübarizə Baş İdarəsində olub

20.04.2016 [10:12]

Ölkəmizdə səfərdə olan Türkiyə Respublikası Ali Məhkəməsinin sədri İsmail Rüştü Ciritin rəhbərlik etdiyi, Türkiyə Ali Məhkəməsinin baş prokuroru Mehmet Akarca və digər məsul əməkdaşlardan ibarət nümayəndə heyəti aprelin 19-da Azərbaycan Respublikasının Baş Prokuroru yanında Korrupsiyaya qarşı Mübarizə Baş İdarəsində olub.
Baş prokuror Zakir Qaralov qonaqları salamlayaraq Prezident İlham Əliyevin siyasi iradəsinə uyğun olaraq ölkəmizdə korrupsiyaya qarşı mübarizə sahəsində həyata keçirilən qanunvericilik və institusional, cinayət təqibi və qabaqlayıcı tədbirlər barədə, habelə Baş İdarənin strukturu və fəaliyyət istiqamətlərinə dair ətraflı məlumat verib.
Baş Prokurorluğun mətbuat xidmətindən AZƏRTAC-a bildiriblər ki, Zakir Qaralov korrupsiyaya qarşı mübarizədə beynəlxalq əməkdaşlığın önəmi və qarşılıqlı təcrübənin paylaşılmasının vacibliyi nəzərə alınaraq bu sahədə ixtisaslaşmış beynəlxalq təşkilatlarla əlaqələrin qurulmasına və daha da inkişaf etdirilməsinə daim böyük önəm verildiyini diqqətə çatdırıb. Baş prokuror korrupsiyaya qarşı mübarizə sahəsində əməkdaşlığın daha da möhkəmləndirilməsi məqsədilə iki ölkənin prokurorluqları arasında imzalanmış Anlaşma Memorandumunun əhəmiyyətini xüsusi qeyd edib.
Sonra qonaqlar Baş Prokuror yanında Korrupsiyaya Qarşı Mübarizə Baş İdarəsinin milli memarlıq üslubunda və müasir standartlar səviyyəsində inşa edilmiş inzibati binasında müxtəlif səviyyəli konfransların və tədbirlərin keçirilməsi üçün nəzərdə tutulmuş iclas zalları, normativ-hüquqi aktlarla zəngin və digər dövlət orqanlarının elektron kitabxanalarına çıxışla təmin edilmiş kitabxana, kriminalistika otağı, müasir proqram təminatı ilə təchiz edilmiş 161 saylı “Qaynar xətt” əlaqə mərkəzi, dövlət orqanlarının məlumat bazalarına çıxışı olan informasiya-kommunikasiya şəbəkəsi və əməliyyatların idarə edilməsi mərkəzi, vətəndaşların qəbulu otağı ilə yaxından tanış olublar.
Baş İdarədə yaradılmış yüksək iş şəraitindən məmnunluğunu ifadə edən İsmail Rüştü Cirit ölkəmizdə korrupsiyaya qarşı mübarizə sahəsində əldə edilmiş nailiyyətləri yüksək qiymətləndirib.
Görüşdə qonaqlara korrupsiya qarşı mübarizə sahəsində ixtisaslaşan beynəlxalq təsisatlar, habelə digər ölkələrin müvafiq qurumları ilə yaradılmış işgüzar münasibətlər barədə məlumat verilib. Görülmüş işlər böyük marağa səbəb olduğundan əməkdaşlığın gələcəkdə daha sıx aparılması məsələləri müzakirə edilib.
Qonaqlara korrupsiyaya qarşı mübarizə sahəsində ölkəmizdə həyata keçirilmiş tədbirlər, Baş Prokuror yanında Korrupsiyaya Qarşı Mübarizə Baş İdarəsinin fəaliyyətini əks etdirən buklet, bülleten və kitabçalar təqdim olunub.

Paylaş:

Baxılıb: 573 dəfə