Hikmət Babaoğlu: Milli maraqların təmin olunması intensiv dialoq və fəal diplomatik münasibətlərdən keçir

Bakı:

31 °C

37 %

5 m/s

AZ RU EN

Ana səhifə / Siyasət / Hikmət Babaoğlu: Milli maraqların təmin olunması intensiv dialoq və fəal diplomatik münasibətlərdən keçir

Hikmət Babaoğlu: Milli maraqların təmin olunması intensiv dialoq və fəal diplomatik münasibətlərdən keçir

13.09.2018 [09:15]

Müasir beynəlxalq münasibətlər sistemində milli maraqların təmin olunması hər bir ölkənin və onun liderinin qarşısında duran əsas vəzifələrdən biridir. Milli maraqların təmin olunması, heç şübhəsiz ki, intensiv dialoq və fəal diplomatik münasibətlərdən keçir. Bu mənada, Azərbaycan Respublikasının Prezidenti İlham Əliyevin beynəlxalq münasibətlər sisteminin aktoru olan müxtəlif dövlətlərə müntəzəm səfərləri həm ölkəmizin dünyaya inteqrasiyasını təmin edir, həm də milli maraqların təmin olunmasına xidmət göstərir. Prezident İlham Əliyevin Rusiya, Qırğızıstan və Xorvatiyaya səfərləri zamanı keçirdiyi görüşlər və əldə olunmuş nəticələr də qarşılıqlı faydalı münasibətlərin inkişafı, o cümlədən milli maraqların təmin olunması baxımından olduqca əhəmiyyətlidir.
Bu fikirləri AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu deyib. O qeyd edib ki, Prezident İlham Əliyevin Rusiyaya rəsmi səfəri nəticəsində ölkələrimiz arasında ikitərəfli münasibətlərdə yeni səhifə açıldı. Prezident İlham Əliyevin Xorvatiyaya rəsmi səfərinin də həm iki ölkə arasında münasibətlərin, həm də Azərbaycan-Avropa İttifaqı əlaqələrinin inkişafı baxımından mühüm əhəmiyyətə malik olduğunu deyən H.Babaoğlu vurğulayıb ki, səfər çərçivəsində müxtəlif sahələri əhatə edən əməkdaşlığın inkişafına dair aktual məsələlər müzakirə edildi. Bu, hər iki ölkənin milli maraqlarının təmin olunması və qarşılıqlı faydalı əməkdaşlığın dərinləşdirilməsi baxımından böyük önəm kəsb edir. Prezident İlham Əliyevin Qırğız Respublikasının Çolpon-Ata şəhərində Türkdilli Dövlətlərin Əməkdaşlıq Şurasının VI Zirvə görüşündə iştirakı da mühüm əhəmiyyətə malikdir. Ümumiyyətlə, artıq ənənə halını alan bu tipli görüşlər çoxtərəfli diplomatik münasibətlərin, mədəni, iqtisadi və humanitar əlaqələrin inkişafına xidmət edir. Macarıstanın da bu görüşdə iştirak etdiyini nəzərə alaraq qeyd edə bilərik ki, bu format daha da genişlənir, gələcəkdə daha effektiv əməkdaşlıq və tərəfdaşlıq platformasına çevrilmək potensialına malikdir.
“Bütün bu səfərlərin ortaq cəhəti ondan ibarətdir ki, onların əsasında Azərbaycanın ikitərəfli münasibətlərinin inkişafı, dünyaya inteqrasiya etməsi və ölkəmizin ərazi bütövlüyünün təmin olunması məsələsində beynəlxalq dəstəyin əldə olunması məqsədləri dayanır”, - deyən Milli Məclisin deputatı vurğulayıb ki, bu istiqamətdə həyata keçirilən intensiv diplomatik təmaslar uğurlu nəticələr verir. Xüsusilə də Prezident İlham Əliyevin ATƏT-in Minsk qrupunun həmsədr dövlətlərindən biri olan Rusiya Federasiyasına səfər etməsi, bu dövlətin Cənubi Qafqazdakı nüfuzundan və Dağlıq Qarabağ münaqişəsinin həlli imkanlarından istifadə etməsi məsələsini aktuallaşdırması olduqca mühümdür.
Hikmət Babaoğlu bildirib ki, Azərbaycan Prezidenti tərəfindən həyata keçirilən fəal tərəfdaşlıq və əməkdaşlıq diplomatiyası yeni perspektivlər müəyyənləşdirməklə bərabər, eyni zamanda, ölkəmizin dünya iqtisadiyyatına uğurla inteqrasiya etməsinə və beynəlxalq siyasi proseslərdə söz sahibi olan dövlətlərdən birinə çevrilməsinə xidmət edir.

Paylaş:

Baxılıb: 686 dəfə