Azərbaycan hərb meydanında olduğu kimi, diplomatiya cəbhəsində də üstün mövqedə olduğunu sübut etdi

Bakı:

24 °C

56 %

4 m/s

AZ RU EN

Ana səhifə / Siyasət / Azərbaycan hərb meydanında olduğu kimi, diplomatiya cəbhəsində də üstün mövqedə olduğunu sübut etdi

Azərbaycan hərb meydanında olduğu kimi, diplomatiya cəbhəsində də üstün mövqedə olduğunu sübut etdi

20.01.2021 [10:02]

Ekspertlər qeyd edirlər ki, Moskva görüşünün nəticəsi olaraq üçtərəfli bəyanatın imzalanması həm Azərbaycan, həm də bütün region ölkələri üçün mühüm əhəmiyyət kəsb edən addımdır
Məlum olduğu kimi, yanvarın 11-də Moskvada Azərbaycan Prezidenti İlham Əliyevin, Rusiya Prezidenti Vladimir Putinin və Ermənistanın baş naziri Nikol Paşinyanın iştirakı ilə üçtərəfli görüş keçirilib. Görüşün nəticəsi olaraq üçtərəfli bəyanat imzalanıb. Ekspertlər qeyd edirlər ki, üçtərəfli bəyanatın imzalanması həm Azərbaycan, həm də bütün region ölkələri üçün əhəmiyyət kəsb edən mühüm addımdır.
Məsələyə münasibət bildirən Milli Məclisin Beynəlxalq münasibətlər və parlamentlərarası əlaqələr komitəsinin sədr müavini, YAP-ın Beynəlxalq əlaqələr şöbəsinin müdiri Sevinc Fətəliyevanın sözlərinə görə, Moskva görüşü Azərbaycanın tarixi zəfəri və Ermənistanın kapitulyasiyasından sonra üç ölkə liderinin ilk birbaşa danışıqları idi: “Görüşün yekunu olaraq bölgədəki vəziyyətin inkişafına dair imzalanmış birgə bəyanatda tərəflər 10 noyabr Bəyanatının regiondakı bütün iqtisadi və nəqliyyat kommunikasiyalarının açılmasını nəzərdə tutan 9-cu bəndinin həyata keçirilməsinə dair üçtərəfli İşçi Qrupun yaradılması barədə razılıq əldə ediblər. İmzalanan bəyanatdan da görünür ki, görüş Azərbaycanın maraqları çərçivəsindən kənara çıxmayıb. Bununla da Azərbaycan sübut etdi ki, hərb meydanında olduğu kimi, diplomatiya meydanında da üstün mövqedədir və güzəştə getmək niyyəti yoxdur”.
S.Fətəliyeva deyib ki, Moskva görüşü Azərbaycan tərəfinin öz maraqlarını təmin etməsi baxımından uğurlu olub: “Prezident İlham Əliyevin görüşdən sonra verdiyi bəyanatda qeyd etdiyi kimi, kommunikasiyaların bərpası Azərbaycan, Ermənistan, Rusiya və digər region dövlətlərinin maraqlarına cavab verir. Beynəlxalq kommunikasiyaların bərpası regionun inkişafında dinamizm yaratmaqla bərabər, həm də etibarlı təhlükəsizliyə xidmət edəcək. Bu, faktiki olaraq “Mehri dəhlizi” - Naxçıvana, daha sonra Türkiyəyə dəmir yolunun açılması üzrə işlərin başlaması deməkdir. Açılacaq kommunikasiya xətləri “Şərq-Qərb” nəqliyyat dəhlizinin tərkib hissəsi olacaq”.
Milli Məclisin deputatı Şahin İsmayılov isə deyib ki, Azərbaycanın ərazi bütövlüyünü bərpa etməsi region üçün yeni çağırışlar yaradıb: “İndiki mərhələdə bölgədə sülhə dəstək vermək və iqtisadi prosesləri sürətləndirmək bütövlükdə Cənubi Qafqaz regionu üçün faydalı olacaq. Onsuz da əvvəlki dövrlərdə bölgədəki nəhəng layihələrin icrası birbaşa Azərbaycanın iradəsindən asılı idi. Müharibədən qalib çıxmağımız isə mövqeyimizi daha da gücləndirdi”.
Deputatın sözlərinə görə, imzalanmış sənədlərdən imtina etmək Ermənistanın bir dövlət kimi mövcudluğunu sual altına qoya bilər: “Onsuz da iqtisadiyyatı demək olar ki, məhv olmuş bu dövlətin çox ciddi problemləri var. Əhalinin həyat səviyyəsi hər keçən gün ağırlaşır. Ermənistan nə qədər tez yaranmış yeni reallıqları qəbul etsə, bu, onlar üçün o qədər faydalı olacaq. Bunun isə çox sadə yolu var, düşünməyi bacarmaq və ənənəvi türk düşmənçiliyindən imtina etmək. Zaman artıq bizim xeyrimizə işləyir. Ermənistanın normal gələcəyi birbaşa olaraq onun öz qonşuları ilə münasibətlərindən asılıdır. Ona görə də Ermənistan üçün imzalanmış sənədlərə əməl etmək yeganə qurtuluş yoludur”.
Qaşqay ZİYƏDDİNOĞLU

Paylaş:

Baxılıb: 615 dəfə