Müxalifət Paşinyanı devirəcəkmi?

Bakı:

23 °C

38 %

2 m/s

Əlaqə

AZ RU EN

Ana səhifə / Siyasət / Müxalifət Paşinyanı devirəcəkmi?

Müxalifət Paşinyanı devirəcəkmi?

20.04.2022 [10:48]

Qərb onu qoruyur, revanşistlər isə...

Nardar BAYRAMLI

Hazırda Ermənistan müxalifətinin paytaxt İrəvanda etiraz aksiyaları davam edir. Azsaylı kütlənin iştirakı ilə keçirilən mitinqdə müxaliflər baş nazir Nikol Paşinyanın Qarabağla bağlı etiraflarına qarşı çıxırlar. Müxalif “Şərəfim var” parlament fraksiyasının rəhbəri, Ermənistan Milli Təhlükəsizlik Xidmətinin keçmiş rəhbəri Artur Vanetsyan müddətsiz etiraz aksiyası elan edib. Vanetsyanın sözlərinə görə, Ermənistan hakimiyyətinin son günlər verdiyi bəyanatlar onların Qarabağın itirilməsi ilə barışdığını göstərir. “Hesab edirəm ki, “Facebook”-da məqalələr, çıxışlar, statuslar yazmaqla heç nəyə nail ola bilməyəcəyimiz kritik an yetişib. Bu hakimiyyətin son günlər verdiyi bəyanatlar göstərir ki, onlar Qarabağı tamamilə Azərbaycana verməyə hazırdırlar, bizim Ermənistanın təhlükəsizliyi ilə bağlı problemimiz var”, - deyən Vanetsyan insanları Paşinyanın küçə etirazları vasitəsilə hakimiyyətdən uzaqlaşdırmağa çağırıb.

A.Vanetsyanın bu çağırışı reallaşa bilərmi? Məsələ ilə bağlı politoloq Ramiz Alıyev qəzetimizə açıqlamasında bildirib ki, erməni müxalifətinin geniş sosial bazası yoxdur. Onun sözlərinə görə, İkinci Qarabağ müharibəsində ağır itkilər verən erməni xalqı yenidən müharibə istəmir: “Biz görürük ki, Ermənistanda əhali müharibənin əleyhinədir. Həm də başa düşürlər ki, qonşularının ərazilərinə göz dikməyin sonu heç də yaxşı olmur. Bu səbəbdən də erməniləri Qarabağ çox da maraqlandırmır. Xatirinizdədirsə, bir neçə dəfə əsgər valideynləri aksiya keçirərək övladlarının Qarabağda hərbi xidmətə göndərilməsinə etiraz edirdilər. Bu fakt sadə ermənilərin Qarabağ ermənilərini ölkələri üçün problem hesab edirlər. Onları normal güzəran, dolanışıq maraqlandırır. Bunun yolu da Türkiyə ilə Azərbaycanla münasibətləri normallaşdırmaqdan keçir. Ona görə də, xalq revanşist müxalifəti qəbul etmir. Bugünlər İrəvanda keçirilən mitinqlərə əhalinin maraq göstərməməsi də buradan qaynaqlanır. Bu baxımdan, Vanetsyanın küçə mitinqləri vasitəsilə Paşinyanı hakimiyyətdən devirmək çağırışı da nəticə verməyəcək. Digər tərəfdən, təcrübə göstərir ki, bu yolla hakimiyyətə gəlməyin heç bir perspektivi yoxdur. Bunu Gürcüstan nümunəsində də demək olar. İllər öncə, Saakaşvili “inqilab” yolu ilə hakimiyyətə gəlmişdi. Amma onun sonunun necə olduğu da hər kəsə bəllidir. Anarxiyanı, xaosu demokratiya hesab edənlər çox yanılırlar. Bu cür situasiyalar yaşamış ölkələr həmişə ciddi zərbə alıblar. Ən çox zərəri isə sadə xalq görür”.

Politoloq qeyd edib ki, Ermənistanda revanşistlər hər fürsətdə Paşinyana qarşı etiraz aksiyaları keçirirlər: “Amma əhalini öz ətraflarına toplamağa çətinlik çəkirlər. Çünki erməni xalqı onların kim olduğunu yaxşı bilir. Revanşistlər hakimiyyətə gəlmək üçün hər cür təxribata da gedə bilər. Belə olan halda, regionda vəziyyət yenidən gərginləşə bilər ki, bu da heç kimin marağında deyil. Bu səbəbdən, Qərb Paşinyanı mümkün daxili problemlərdən qorumağa çalışacaq. Paşinyanın özünün mitinqlər vasitəsilə hakimiyyətə gəlməsinə baxmayaraq, Qərbin ona dəstəyi hakimiyyəti qorumağa kömək edir. Paşinyanın proseslərə münasibəti isə onun Rusiya səfərindən sonra daha da dəqiqləşəcək”.

Paylaş:

Baxılıb: 768 dəfə