Başlıbel, Fərrux, Edilli...

Bakı:

22 °C

37 %

4 m/s

Əlaqə

AZ RU EN

Ana səhifə / Siyasət / Başlıbel, Fərrux, Edilli...

Başlıbel, Fərrux, Edilli...

06.06.2023 [10:30]

Növbəti kütləvi məzarlıq Şuşada aşkar edilib

NARDAR

Ermənistanın işğalçı siyasəti dövründə azərbaycanlıların qətlə yetirilməsi və kütləvi şəkildə dəfn edilməsini sübut edən daha bir məzarlıq Şuşa şəhərində aşkarlanıb. İyunun 2-də aparılan qazıntılar zamanı kütləvi məzarlıq Şuşa həbsxanasının ərazisində müəyyən edilib. Məzarlıqda ilkin olaraq dörd nəfərin nəşinin qalıqları tapılıb.

Qeyd edək ki, Şuşada aşkar edilmiş məzarlıq insanlıq əleyhinə törədilən ən dəhşətli cinayətlərdən biridir. Bu fakt qanunsuz olaraq Şuşa həbsxanasında saxlanılmış azərbaycanlıların həmin həbsxanada dəhşətli işgəncələrə, qeyri-insani rəftara məruz qalması ilə bağlı ehtimalları və şahid ifadələrini bir daha təsdiqləyir. Şuşada aşkarlanan bu insan qalıqlarını Başlıbel, Fərrux və Edilli istiqamətlərində aşkarlanmış kütləvi məzarlıqların davamı kimi adlandırmaq olar.

İyunun 3-də kütləvi məzarlığın aşkarlandığı əraziyə media nümayəndələrinin səfəri zamanı jurnalistlərə açıqlama verən Hərbi Prokurorluğun Xüsusi İstintaq şöbəsinin rəisi Emil Tağıyev bildirib ki, torpaqlarımız işğaldan azad olunandan sonra Birinci Qarabağ müharibəsi dövründə itkin düşmüş şəxslərin meyit qalıqlarının axtarışı prosesinə başlanılıb. Şuşa türməsinin ərazisində aşkarlanan meyit qalıqlarının Birinci Qarabağ müharibəsi dövründə burada saxlanılan azərbaycanlılara aid olduğu ehtimal olunur. Onun sözlərinə görə, ötən dövr ərzində Şuşa rayonunun Daşaltı kəndində, Xocavənd rayonunun Edilli kəndində, Xocalı rayonunun Fərrux kəndində, Füzuli rayonunun Yuxarı Seyidəhmədli kəndində, Kəlbəcərdə, Ağdamda və digər yaşayış məntəqələrində kütləvi məzarlıqlardan ümumilikdə 400-dən çox insan meyit qalıqları aşkarlanıb. Həmin insan qalıqlarının Birinci Qarabağ müharibəsi dövründə itkin düşmüş şəxslərlə eyniləşdirmə aparılması məqsədilə məhkəmə tibbi kriminalistik ekspertizası ilə yanaşı, 200-dən artıq məhkəmə monekulyar genetik ekspertizası təyin edilib.

Azərbaycan Respublikasının İnsan hüquqlari üzrə müvəkkili (ombudsman) Səbinə Əliyeva da Şuşa həbsxanası ərazisində kütləvi məzarlığın aşkarlanmasına münasibət bildirib. Təəssüflə bildirilib ki, Ermənistanın beynəlxalq humanitar hüququn tələblərini pozmaqla törətdiyi cinayətlərə dair faktların sayı bununla məhdurlaşmır. Belə ki, işğaldan azad edilmiş ərazilərimizdə daha öncə aşkarlanmış kütləvi dəfn yerləri ilə bağlı da Ombudsman tərəfindən dünya ictimaiyyətinə müraciətlər ünvanlanıb, Xocavənd rayonunun Edilli kəndində tapılmış məzarlıqlarda aparılmış yerində araşdırmaların nəticələrinə dair ayrıca hesabat hazırlanıb.

Vurğulanıb ki, azad olunmuş ərazilərimizdə davamlı olaraq kütləvi məzarlıqların aşkar edilməsi Ermənistanın azərbaycanlılara qarşı həyata keçirdiyi soyqırımı və etnik təmizləmə siyasətini bir daha sübut edir. Eyni zamanda, Ermənistanın Birinci Qarabağ müharibəsi dövründə itkin düşmüş dörd minə yaxın azərbaycanlının taleyi barədə hər hansı məlumat verməməsi uzun illərdir həmin şəxslərin ailə üzvlərinin dərin iztirab çəkməsinə səbəb olmaqdadır. Ermənistan tərəfi bu məsələdə də öz məsuliyyətindən boyun qaçıraraq kütləvi dəfn yerləri barədə məlumatların təqdim edilməsindən yayınıb.

“Azərbaycan ombudsmanı olaraq, bir daha dünya ictimaiyyətini beynəlxalq hüquq normalarının, insan hüquq və azadlıqlarının kobudcasına pozulmasını sübut edən bu kimi hallarla bağlı Ermənistana qarşı zəruri tədbirlər görməyə və itkin düşmüş soydaşlarımızın taleyi barədə məlumatların əldə edilməsi ilə əlaqədar dəstək verməyə çağırıram”, - deyə S.Əliyeva qeyd edib.

Paylaş:

Baxılıb: 545 dəfə