Milli qurtuluş Azərbaycanın müstəqilliyini dönməz və əbədi edib

Bakı:

11 °C

58 %

6 m/s

Əlaqə

AZ RU EN

Ana səhifə / Siyasət / Milli qurtuluş Azərbaycanın müstəqilliyini dönməz və əbədi edib

Milli qurtuluş Azərbaycanın müstəqilliyini dönməz və əbədi edib

07.06.2012 [01:00]

Prezident İlham Əliyev: Əgər xalqın iradəsi ilə 1993-cü ildə Heydər Əliyev yenidən artıq müstəqil Azərbaycanın Prezidenti kimi hakimiyyətə gəlməsəydi, ölkəmizin gələcək taleyi çox böyük fəlakətlərlə üzləşə bilərdi
Azərbaycan dövləti müstəqilliyini bərpa etdikdən sonra çətin sınaqlarla üz-üzə qalmışdı. Xüsusilə, 1991-1993-cü illərdə baş verən hadisələr tariximizdə xüsusi yer tutur. O mənada ki, həmin illərdə, xüsusilə 1993-cü ilin iyun ayında baş verən hadisələr daim xatırlanmalı və bundan sonra belə hadisələrin təkrarlanmasına imkan verilməməlidir.
Sovetlər birliyinin dağılmasından sonra Azərbaycanın yeni düzəndə irəliləməsi üçün proqramlar, layihələrə və hər şeydən önəmlisi düşünən beyinlərə ehtiyacı var idi. Amma həmin dövrdə bu “beyinlər” dövlət üçün düşünmürdü. Prezident Aparatı dövlətin idarə olunduğu ünvan olmaqdan çıxıb, şəxsi mübahisələrin, dava-dalaşların qaynaq nöqtəsinə çevrilmişdi. Bunun fonunda ölkədə bütün istiqamətləri əhatə edən dərin böhran davam edirdi. İnflyasiya 1800 faizə çatmış, dövlət büdcəsinin kəsiri 100 dəfəyə qədər artmışdı. ölkənin borcları durmadan artır, vətəndaşların əməkhaqlarının və pensiyalarının dəyəri düşürdü.
Belə çətin bir məqamda Azərbaycan hakimiyyəti vəziyyəti daha da kritikləşməsinə yol açan məntiqsiz qərarlar verir, silahlı birləşmələri demək olar ki, zorla vətəndaş qarşıdurmasına sürükləyirdi. 1993-cü il iyunun 4-də Gəncədə sabiq korpus komandiri və AXC-Müsavat hakimiyyətinin Qarabağ üzrə xüsusi nümayəndəsi Surət Hüseynovun rəhbərlik etdiyi 709-cu briqadanın ləğvi ilə bağlı qərar imzalandı. O zamankı müdafiə naziri Dadaş Rzayevin imzaladığı bu əmrə və təhvil-təslim olması barədə qərara tabe olmayan Surət Hüseynov tabeçiliyində olan qoşun hissəsinin Bakıya doğru istiqamət götürməsi əmrini verdi. Gəncədə, o cümlədən, Bakıya qədər bəzi rayonlarda silahlı qarşıdurmalar yaşanırdı. Vəziyyət get-gedə pisliyə doğru dəyişirdi. 709-cu briqadanı tərk-silah etmək üçün Gəncəyə göndərilən Milli Qvardiya hissələri ilə Surət Hüseynovun rəhbərliyi altında olan silahlı birlik arasında döyüş oldu.
709 saylı hərbi hissənin komandiri Surət Hüseynov dövlətin silahlı dəstələrinə güc gələrək paytaxta doğru irəliləməyə başladı. Həmin gün bir-birinə silah işlətməklə hər iki tərəf ölkədə vətəndaş müharibəsinə gedən təhlükəli yolun əsasını qoydular. Artıq dövlətin qorunması üçün heç bir şey edə bilməyən, səriştəsizliyi ilə Azərbaycan dövlətçiliyini və milləti uçurumun kənarına sürükləyən AXC-Müsavat hökuməti vəziyyəti kritik vəziyyətə gətirib çıxarmışdı. Zor gücü ilə hakimiyyətə gəlmiş bu komanda yarıtmaz, səriştəsiz fəaliyyəti ilə ölkəni parçalanıb məhv olmaq təhlükəsinə məhkum etmişdi. Vəziyyət elə bir dərəcəyə çatmışdı ki, qarşıdurmanın reallaşacağı təqdirdə xalqın və dövlətin taleyinin necə olacağı sual altında idi. ölkə isə Ermənistan ilə müharibə aparırdı. Ordumuzun əsgərləri düşmənlə üz-üzə qaldığı halda cəbhə xəttindən Bakıya istiqamətləndirdikləri zirehli maşınların və silahların gücü ilə hakimiyyəti zəbt etmiş bu insanlar ölkənin tam iflic vəziyyətə düşməsində böyük rol oynamışdılar. Müharibə gedən ölkədə qeyri-nizami ordunun, vahid komandanlığın olmaması ilə yanaşı, Müdafiə Nazirliyi hərbi təhlükəsizlik məsələləri ilə məşğul olmaq əvəzinə ambisiyalı savaş aparır, şəxsi maraqların girovuna çevrilirdi. Maraqlıdır ki, AXC-dən ayrılan bütün partiyalar öz silahlı dəstələrini yaradır, partiya sədrləri, hətta parlamentdə belə özlərini batalyon komandiri kimi aparırdı. Siyasi böhrandan istifadə edərək hakimiyyətə gəlmək istəyən bu siyasi qüvvələrin hakimiyyət hərisliyi həmin könüllü birləşmələrin Bakıya gətirilməsinə səbəb olmuşdu və düşmənlə üz-üzə duran ön xətt şüurlu şəkildə zəiflədilirdi.
AXC-Müsavat hakimiyyətinin bu siyasəti ölkəmizi məhv olmaq təhlükəsi ilə üz-üzə qoymuşdu, Məhz xalqın tələbi ilə ikinci dəfə hakimiyyətə qayıdan ümummilli lider Heydər Əliyev müstəqil Azərbaycanı məhv olmaq təhlükəsindən xilas etdi.
28 May-Respublika Günü münasibətilə rəsmi qəbulda çıxış edən Prezident İlham Əliyev həmin dövrdə baş verən hadisələrlə bağlı bildirib: “Əfsuslar olsun ki, o illərdə hakimiyyətdəki insanlar vəzifə borcunu ləyaqətlə yerinə yetirə bilməmişlər və beləliklə, Sovet İttifaqının dağılması ərəfəsində Azərbaycan böyük çətinliklərlə üzləşmişdir. Bizə qarşı elan edilməmiş müharibə başlamışdır. Torpaqlarımız işğal olunmağa başlamışdır. Müstəqilliyimizin ilk illərində, xüsusilə 1992-1993-cü illərdə Şuşa, Laçın və Kəlbəcərin işğalı nəticəsində Dağlıq Qarabağla Ermənistan arasında coğrafi bağlantı, əlaqə yaranmışdır ki, bu, ondan sonrakı müharibə dövrünə də çox mənfi təsir göstərmişdir.
Bir sözlə, müstəqilliyimizin ilk illəri ölkəmiz üçün çox ağır keçirdi, müstəqil inkişafımız əslində şübhə altında idi. Əgər xalqın iradəsi ilə 1993-cü ildə Heydər Əliyev yenidən artıq müstəqil Azərbaycanın Prezidenti kimi hakimiyyətə gəlməsəydi, ölkəmizin gələcək taleyi çox böyük fəlakətlərlə üzləşə bilərdi. 1993-cü ildə bütün xoşagəlməz halların qarşısı alındı, ölkədə sabitlik yarandı, inkişaf başlandı. Dövlətçiliyimizin əsasları qoyuldu və ölkəmizin ümumi inkişaf strategiyası müəyyən edildi. Bu strategiya həm xarici, həm də daxili siyasəti əhatə edirdi. Azərbaycanı müasir, demokratik ölkə kimi görmək Ulu öndərin arzusu idi. Onun fəaliyyəti, səyləri nəticəsində bu gün Azərbaycan, sözün əsl mənasında, inkişafda olan, inkişaf edən müasir, dünyəvi, demokratik ölkədir”.
1993-cü ildə Ulu öndər Heydər Əliyevin hakimiyyətə qayıtmasını xalqımız Milli Qurtuluş Günü kimi bayram edir. Həqiqətən də, bu qayıdış xalqın və dövlətin məhv olmaqdan xilası, qurtuluşu idi. Milli qurtuluş Azərbaycanın müstəqilliyini dönməz və əbədi edib. Yaşadığımız tarix bu faktı təsdiq edir.
Nardar BAYRAMLI

Paylaş:

Baxılıb: 851 dəfə