Çimərlik mövsümü gəlir...

Bakı:

24 °C

45 %

6 m/s

Əlaqə

AZ RU EN

Ana səhifə / Sosial / Çimərlik mövsümü gəlir...

Çimərlik mövsümü gəlir...

07.06.2024 [10:55]

Hazırlıqlar nə yerdədir?

Çimərlik mövsümünün rəsmi olaraq başlamasına sayılı günlər qalıb. Məlumdur ki, ölkəmizdə çimərlik mövsümü hər il iyun ayının 15-dən başlayır. Ayın 15-nə qədər isə sahillər tullantılardan təmizlənir, dəniz suyunun monitorinqi aparılır, təhlükəsizlik tədbirləri görülür. Bundan başqa, çirklənmə səviyyəsinin yüksək olduğu çimərliklər barədə əhaliyə məlumat verilir.

Əslində ölkəmizdə çimərlik mövsümü o qədər də uzun çəkmir, təxminən 2 aya qədər davam edir. Çünki şimaldan daxil olan soyuq sular Xəzərdə suyun temperaturunu aşağı salır. Ona görə də insanlar çimərlik mövsümünün qısamüddətli olduğunu nəzərə alaraq həmin imkandan mümkün qədər çox yararlanmaq istəyirlər.

İsti havalarda sərinləmək üçün üz tutduğumuz çimərliklərin təmizliyi mühüm rol oynayır. Mövsümə hazırlıq zamanı sahil zolaqları təmizlənir. Amma dənizə üz tutanlar da ətraf mühitin təmizliyinə riayət etməli, tullantıları dənizə və ya çimərlik ərazisinə atmamalıdırlar. Yəni çimərliklərin təmizliyi özümüzdən asılıdır.

Bundan əlavə, təhlükəsizlik qaydalarına əməl olunmalıdır ki, dəniz sahilində istirahət və əyləncə bədbəxt sonluqla nəticələnməsin. Ona görə də nəzarətsiz çimərliklərdən istifadə edilməməlidir, həmçinin hava qaraldıqdan sonra suya girmək olduqca təhlükəlidir.

Hazırlıq işləri görülüb...

Bakı Şəhər İcra Hakimiyyətindən (BŞİH) bildirilib ki, çimərlik mövsümü ilə əlaqədar paytaxtın sahilkənarı ərazilərində yaradılan ictimai çimərliklərdə mövsümə hazırlıq işləri görülüb. BŞİH-dən qeyd olunub ki, çimərlik mövsümü ərəfəsində ictimai çimərliklərdə lazımi təmizlik-abadlıq işləri aparılıb: “Qış ərzində dəniz sahilinə yığılan tullantılar, həmçinin dalğaların sahilə atdığı müxtəlif əşyalar yığışdırılıb, digər təmizlik işləri görülüb. Çimərlik ərazilərinə yeni qum qatı salınıb, buradakı inventarlar, günlüklər, söhbətgahlar, sanitariya qovşaqları və duşlar yoxlanılıb, cari təmir işləri, bir sıra yerlərin rənglənməsi aparılıb. Bu çimərliklərdə avtomobillərin parklanması üçün nəzərdə tutulan meydançalar qaydaya salınıb”.

BŞİH-dən həmçinin bildirilib ki, rəsmi çimərlik olmayan ərazilər də nəzarətdən kənarda qalmayıb: “Rayon icra hakimiyyətləri, kommunal xidmətlər mövsüm ərzində bu ərazilərin təmizliyini nəzarətdə saxlayacaqlar. İctimai çimərliklərdə isə Fövqəladə Hallar Nazirliyinin xilasetmə məntəqələri, həmçinin tibb məntəqələri yaradılıb”.

Təhlükəsizlik tədbirləri də vacibdir

Qeyd edək ki, yayda çimərlik ərazisində dincələnlərin, dənizdə üzənlərin təhlükəsizliyinə Fövqəladə Hallar Nazirliyinin Kiçikhəcmli Gəmilərə Nəzarət və Sularda Xilasetmə Dövlət Xidməti nəzarət edir. Xidmətdən verilən məlumata görə, FHN-nin Kiçikhəcmli Gəmilərə Nəzarət və Sularda Xilasetmə Dövlət Xidməti tərəfindən çimərlik mövsümünə hazırlıqla əlaqədar zəruri təhlükəsizlik tədbirləri görülüb: “Aprel ayından etibarən Abşeron yarımadasında mövcud sahilboyu ərazilərdə aidiyyəti yerli icra hakimiyyəti nümayəndələrinin iştirakı ilə monitorinqlər keçirilib. Monitorinqlər ölkənin digər şəhər və rayonlarının sahilboyu ərazilərində də aparılıb. Monitorinqlər zamanı çimərlik operatorlarına sularda təhlükəsizlik qaydalarını özündə ehtiva edən bildirişlər paylanılır. Daha sonra icra hakimiyyətlərində aidiyyəti qurumların iştirakı ilə işçi müşavirələr keçirilərək monitorinq zamanı aşkar olunmuş nöqsan və çatışmazlıqların həlli üçün müvafiq tapşırıqlar verilir.

Xidmətin balansında olan xilasetmə texnika və vasitələri, həmçinin dalğıc-axtarış əməliyyatlarında istifadə olunacaq avadanlıqlar işlək vəziyyətə gətirilib. İyun ayının 10-dan xidmətin nəzarət etdiyi çimərliklərdə üzmə sərhədlərini müəyyən edən nişanların və ərazidə istirahət edən vətəndaşların təhlükəsizlik qaydaları ilə bağlı maarifləndirilməsi üçün xüsusi lövhələr yerləşdirilib”.

Yeganə BAYRAMOVA

Paylaş:

Baxılıb: 665 dəfə