İzmirdə Həsən bəy Zərdabiyə həsr olunan simpozium keçirilib

Bakı:

24 °C

59 %

6 m/s

Əlaqə

AZ RU EN

Ana səhifə / Sosial / İzmirdə Həsən bəy Zərdabiyə həsr olunan simpozium keçirilib

İzmirdə Həsən bəy Zərdabiyə həsr olunan simpozium keçirilib

15.10.2024 [14:53]

Türkiyənin İzmir şəhərində Azərbaycan mədəniyyət və sənət günləri keçirilir. Tədbirlər Türkiyədəki səfirliyimizin nəzdindəki Azərbaycan Mədəniyyət Mərkəzinin təşkilatçılığı və Azərbaycan Respublikası Mədəniyyət Nazirliyinin dəstəyi ilə baş tutub.

AZƏRTAC xəbər verir ki, Ege Universitetində “Türk dünyasının modernləşməsi II: Türk dünyasında mətbuat” mövzusunda beynəlxalq simpozium təşkil olunub. Ege Universiteti, bu ali təhsil müəssisəsinin Ədəbiyyat fakültəsinin türk dili və ədəbiyyatı bölümü, Yunus Əmrə İnstitutu, Türkiyədəki səfirliyimizin nəzdindəki Azərbaycan Mədəniyyət Mərkəzi, Avrasiya Yazıçılar Birliyi və digər qurumların birgə təşkilatçılığı ilə keçirilən simpozium Azərbaycan milli mətbuatının banisi Həsən bəy Zərdabiyə həsr olunub. Tədbirdə Türkiyə, Azərbaycan, Özbəkistan, Qazaxıstan, Qırğızıstandan çoxsaylı ədəbiyyatşünas alim, milli mətbuat tarixinə dair tədqiqatçılar iştirak edirlər.

Tədbirdə çıxış edən Ege Universitetinin Ədəbiyyat fakültəsinin dosenti Yılmaz Özkaya, universitetin rektorunun müavini professor Mehmet Ersan və başqaları Türkiyə Cumhuriyyətinin qurucusu Mustafa Kamal Atatürkün “Azərbaycanın sevinci sevincimiz, kədəri kədərimizdir” və Ümummilli Lider Heydər Əliyevin “Bir millət, iki dövlət” kəlamlarının ölkələrimiz arasındakı birlikdə xüsusi yeri olduğunu vurğulayıblar. Bildirilib ki, iki qardaş ölkə arasında dünyaya nümunə olan bu həmrəylik hazırda dövlət başçılarımız sayəsində uğurla davam etdirilir. Natiqlər ölkələrimiz arasındakı mədəni-ədəbi əlaqələrdən danışıb, ortaq miraslarımız arasında ədəbiyyatımızın xüsusi yeri olduğunu qeyd ediblər.

Mərasimdə çıxış edən səfirliyimizin nəzdindəki Azərbaycan Mədəniyyət Mərkəzinin direktoru Samir Abbasov Türk dünyası arasındakı mədəni-ədəbi əlaqələrdən danışıb, simpoziumun alimlərimiz və ədəbiyyatşünaslarımız arasında ədəbi əlaqələri genişlənməsinə böyük töhfə verəcəyinə inamını ifadə edib.

Simpoziumun Türk dünyasının maariflənməsində xüsusi xidmətləri ilə seçilən, milli mətbuatımızın banisi, maarifçi Həsən bəy Zərdabiyə həsr olunmasını yüksək qiymətləndirən Samir Abbasov Azərbaycan və Türk dünyasında ədəbiyyatımızın inkişafında xüsusi yeri olan tanınmış ziyalılarımız və maarifçilərimizin rolundan danışıb.

Mərkəzin rəhbəri belə bir önəmli simpoziuma ev sahibliyi etdiyi üçün Ege Universitetinə təşəkkürünü bildirib.

Tədbir mövzu ilə bağlı panel iclasda məruzələrlə davam etdirilib.

Paylaş:

Baxılıb: 727 dəfə