Diaspor gənclərinin iştirakı ilə videokonfrans keçirilib

Bakı:

27 °C

69 %

4 m/s

Əlaqə

AZ RU EN

Ana səhifə / Sosial / Diaspor gənclərinin iştirakı ilə videokonfrans keçirilib

Diaspor gənclərinin iştirakı ilə videokonfrans keçirilib

02.02.2025 [17:24]

2 Fevral – Azərbaycan Gəncləri Günü münasibətilə Diasporla İş üzrə Dövlət Komitəsinin təşkilatçılığı ilə Diaspor Gənclərinin Yay Düşərgələrinin iştirakçılarının videokonfransı təşkil olunub. “Konstitusiya və Suverenlik İli” çərçivəsində keçirilən videokonfransda 51 ölkədən 200-dən çox gənc iştirak edib.

Dövlət Komitəsindən AZƏRTAC-a bildirilib ki, Komitənin sədri Fuad Muradov konfransda Azərbaycan dövlətinin diaspor fəaliyyətində gənclərin rolunun önəmindən danışıb. Dövlətin diqqət və qayğısı nəticəsində milli məfkurəyə sadiq, dünyanın qabaqcıl gəncliyi ilə inteqrasiya etməyə qadir gənc nəsil yetişdiyini bildirib. Həmçinin bu gün Azərbaycan gəncinin milli-mənəvi dəyərlərə əsaslanan cəmiyyətin möhkəmləndirilməsi işində öz bacarığını əsirgəmədiyini qeyd edib. Eyni zamanda, zəngin mədəni irsimizin qorunub saxlanması və təbliği istiqamətində mühüm addımlar atıldığı diqqətə çatdırılıb.

F.Muradov hər il Azərbaycanın müxtəlif bölgələrində yay düşərgələrinin təşkil olunduğunu xatırladıb. O, dünyanın dörd bir yanından yüzlərlə azərbaycanlı, eləcə də əcnəbi gəncin bu düşərgələrdə iştirak etdiyini və ölkəmizlə daha yaxından tanış olmaq, onun tarixini, ənənələrini, mədəniyyətini öyrənmək imkanı qazandığını vurğulayıb.

Görüşdə bu günədək keçirilən Diaspor Gənclərinin Yay düşərgələri haqqında videoçarx nümayiş olunub.

Azərbaycan Respublikasında 2025-ci ilin “Konstitusiya və Suverenlik İli” elan edilməsi, “2 Fevral – Azərbaycan Gəncləri Günü”, “Azərbaycanın gənclər siyasəti”, “Diaspor gənclərinin şəbəkələşməsində yay düşərgələrinin rolu”, “Strateji hədəflər və vəzifələr”, Azərbaycan Diasporuna Dəstək Fondunun gənclərlə bağlı qrant müsabiqəsi, gənclərlə əlaqədar həyata keçiriləcək layihələr, eyni zamanda, düşərgə iştirakçılarının vahid platformada birləşməsi və s. məsələlər barədə müzakirələr aparılıb.

Çıxış edən gənclər bu cür konfransların təşkilinin dünyanın müxtəlif ölkələrində yaşayan azərbaycanlı gənclər arasında əlaqələrin inkişafına təkan verdiyini nəzərə çatdırıblar. Gənclərlə keçirilən videokonfransı gələcəkdə daha mütəşəkkil Azərbaycan diasporunun formalaşmasına töhfə kimi qiymətləndiriblər. Həmçinin Prezident İlham Əliyevə və Birinci vitse-prezident Mehriban Əliyevaya dünya azərbaycanlılarına göstərdikləri həssas münasibət və qayğıya görə minnətdarlıqlarını bildirib, hər zaman Azərbaycanın sevincinə sevinib, kədərinə şərik olacaqlarını bəyan ediblər.

Qeyd edək ki, indiyə qədər Şəki, Şamaxı, Şuşa, Naxçıvan və Laçında Diaspor Gənclərinin Yay düşərgələri keçirilib.

Paylaş:

Baxılıb: 981 dəfə