Dövlət gənclərin inkişafı üçün geniş imkanlar yaradır

Bakı:

27 °C

48 %

2 m/s

Əlaqə

AZ RU EN

Ana səhifə / Sosial / Dövlət gənclərin inkişafı üçün geniş imkanlar yaradır

Dövlət gənclərin inkişafı üçün geniş imkanlar yaradır

20.12.2014 [12:11]

Həbibə Sadıqlı: Biz bilirik ki, dövlətimiz hər zaman gənclərimizin yanındadır
Müstəqil Azərbaycan Respublikasının daxili siyasi kursunun mühüm istiqamətlərindən birini də gənclər siyasəti təşkil edir. Gəncliyin inkişafına böyük əhəmiyyət verən dövlətimiz gənclərə geniş imkanların yaradılmasına, onlarda milli şüurun, yüksək vətənpərvərlik ruhunun formalaşdırılmasına xüsusi diqqət yetirir. Görülən effektiv tədbirlərin, göstərilən yüksək səviyyəli diqqət və qayğının nəticəsidir ki, hazırda idarəetmə strukturlarında, o cümlədən, Milli Məclisdə, bələdiyyə qurumlarında çalışan gənc kadrların sayı hiss olunacaq dərəcədə artır. Habelə, müxtəlif dövlət orqanlarına vakant yerlər üzrə keçirilən müsabiqələrdə gənclərin irəli çəkilməsi onların dövlət idarəçiliyinə fəal cəlb olunması deməkdir. Gənclərin inkişafına xüsusi diqqət və qayğı göstərən Yeni Azərbaycan Partiyasının (YAP) Sədri, Azərbaycan Prezidenti İlham Əliyevin müvafiq sərəncamları ilə 2007-ci ilin “Gənclər ili” elan edilməsi, “Azərbaycan gəncliyi 2011-2015-ci illərdə Dövlət Proqramı”nın təsdiq edilməsi gənclərin ictimai fəaliyyətinin, yaradıcılığının və təşəbbüslərinin dövlət tərəfindən dəstəklənməsinin bariz göstəriciləridir.
Məhz bunların nəticəsidir ki, özünün inkişaf dövrünü yaşayan Azərbaycan gəncliyi cəmiyyətin ən dinamik təbəqəsi qismində çıxış edir, milli dəyərlərə və maraqlara müvafiq səmərəli fəaliyyət göstərir. Bütün bunlar, eyni zamanda, gənclər təşkilatlarının fəaliyyətinə xüsusi stimul və töhfələr verir. Bu mənada Azərbaycan Respublikası Prezidenti yanında Gənclər Fondu gənclərin intellektual potensialından istifadə olunması, onların elmi-intellektual və digər sahələrdə fəallığının artırılması baxımından müstəsna əhəmiyyət daşıyır. Ölkəmizdə yüzlərlə gənc, gənclər təşkilatları müxtəlif ideya və təkliflərlə Fonda müraciət edirlər. Prezident İlham Əliyevin 19 dekabr 2011-ci il tarixli Fərmanı ilə yaradılan Azərbaycan Gənclər Fondu dövlət başçısı tərəfindən təsdiq olunan “Azərbaycan Gəncliyi 2011-2015-ci illərdə Dövlət Proqramı” çərçivəsində gənclərin layiqli və intellektual vətəndaş kimi yetişməsi üçün bir sıra maraqlı layihələrin həyata keçirilməsinə dəstək verir.
Azərbaycan Tələbə Gənclər Təşkilatları İttifaqı tərəfindən Bakı Ali Neft Məktəbində həyata keçirilən “Business brains” layihəsi bunlardan biridir. Layihənin rəhbəri Həbibə Sadıqlı bizimlə söhbəti zamanı bildirdi ki, həyata keçirdiyi layihə Gənclər Fondunun maliyyə dəstəyi ilə baş tutub: “Mən şəxsən Gənclər Fondu tərəfindən bu cür layihələrin dəstəklənməsinin ölkəmizdə biznes sahəsində uğur qazanmaq istəyən gənclərə olan diqqətin nəticəsi kimi qiymətləndirirəm. Qeyd edim ki, həyata keçirdiyimiz layihədə 80 nəfərdən çox gənc iştirak edirdi. Layihənin həyata keçirildiyi müddət ərzində biz tələbələrə biznes sahəsində təcrübi biliklər üzrə təlimlər təşkil etdik. Belə ki, bu çərçivədə “Marketing-view from inside”, “Biznes layihələrdə məqsəd və hədəflərin müəyyən edilməsi”, “Biznes layihələrdə büdcə resurslarının idarə edilməsi - Foundraising”, “Business rhetorics”, “Quality assurance in business - Biznesdə keyfiyyətin təminatı” adlı təlimlər həyata keçirildi. Sonda isə layihə iştirakçılarına sertifikatlar təqdim edildi. Qeyd etmək istəyirəm ki, bu tədbirlərdə həm gənclər, həm də təlimçilər böyük fayda əldə etdilər. Belə ki, gənclər biznesdə marketinq işinin təşkili zamanı əldə edəcəkləri imkanlar və qarşılaşa biləcəkləri problemlərlə bağlı zəngin bilik əldə etdilər. Layihəni reallaşdıranlar isə bu istiqamətdə gələcək fəaliyyətləri üçün zəngin təcrübə, gənclərlə apardıqları diskussiyalar əsasında isə biznes mühitinin öyrənilməsi ilə bağlı elmi tədqiqat üçün zəngin material əldə edə bildilər. Biz gənclər bizlərin inkişafı üçün lazımi şərait yaratdığına görə dövlətimizə öz dərin minnətdarlığımızı bildiririk. Bilirik ki, dövlətimiz hər zaman gənclərimizin yanındadır”.
Oktay

Paylaş:

Baxılıb: 1079 dəfə