Səbail rayonunun məktəbliləri üçün Qusarda yeni yay düşərgəsi yaradılıb

Bakı:

10 °C

81 %

7 m/s

Əlaqə

AZ RU EN

Ana səhifə / Sosial / Səbail rayonunun məktəbliləri üçün Qusarda yeni yay düşərgəsi yaradılıb

Səbail rayonunun məktəbliləri üçün Qusarda yeni yay düşərgəsi yaradılıb

13.08.2015 [10:04]

Səbail rayonunda yeniyetmə və gənclərin yay istirahətinin təşkili istiqamətində növbəti layihə həyata keçirilir. Bu dəfə Səbail rayon İcra Hakimiyyəti Müdafiə Nazirliyi ilə birgə “Gənc Heydərçilər” hərbi-vətənpərvərlik təmayüllü yay düşərgəsi təşkil edib.
Rayon İcra Hakimiyyətindən AZƏRTAC-a bildiriblər ki, düşərgəyə rayonun təhsildə və idmanda fərqlənən, müxtəlif fənn olimpiadalarında, müsabiqələrdə qalib olan və idman yarışlarında nailiyyətlər əldə edən, oxuduqları orta məktəbin ictimai işlərində fəallıq göstərən 150-dən çox yuxarı sinif şagirdi cəlb edilib. Ən əsası isə bu düşərgənin Qusardakı “N” saylı hərbi hissəsində keçirilməsidir. Burada “Gənc Heydərçilər” üçün xüsusi əsgər kazarması ayrılıb. Yeniyetmələr düşərgənin fəaliyyəti dövründə hərbi nizamnamənin tələblərinə uyğun dərslər keçəcək, hərbi hissənin poliqonunda təlimlərdə iştirak edəcək, ordumuzun silah və texnikası ilə yaxından tanış olacaqlar.
Layihə təşkilatçıları tərəfindən Səbail rayon İcra Hakimiyyətində düşərgəyə yola salınacaq uşaqlar, onların valideynləri ilə görüş keçirilib.
Görüşdə çıxış edən rayon İcra Hakimiyyətinin başçısı Asif Əsgərov Prezident İlham Əliyevin və Heydər Əliyev Fondunun prezidenti Mehriban Əliyevanın gənc nəslin Vətənə məhəbbət, Azərbaycan dövlətçiliyinə sədaqət ruhunda tərbiyə olunması istiqamətində gördükləri işlərdən, həyata keçirdikləri layihələrdən danışıb, yeniyetmə və gənclərin asudə vaxtlarının səmərəli təşkili istiqamətində icra olunan sosial layihələr barədə məlumat verib.
Qeyd edilib ki, ötən ildən bəri Müdafiə Nazirliyi ilə birgə yeni layihə - “Gənc Heydərçilər” düşərgəsi təşkil olunub. Hərbi hissədə şagirdlərin yaşaması, qidalanması, təlimlərdə iştirakı və istirahəti üçün hər cür şərait yaradılıb. Təcrübəli tibbi heyət uşaqların sağlamlığının keşiyində duracaq.
Düşərgədə uşaqların təlim-tərbiyə işləri ilə rayonun orta məktəblərində çalışan idman və ibtidai-hərbi hazırlıq müəllimləri və onlarla yanaşı, hərbi hissənin zabitləri, çavuş və əsgərlərindən ibarət qrup məşğul olacaq. İstirahət günlərində şagirdlərin Qusar rayonunun görməli yerlərinə, meşələrə, tarixi guşələrə gəzintiləri təşkil ediləcək.
Tədbirdə çıxış edən valideynlər, ictimai birliklərin rəhbərləri, istirahətə gedən uşaqlar yeniyetmələrin mənalı və yaddaqalan yay istirahəti üçün yaradılan şəraitə görə təşkilatçılara minnətdarlıqlarını bildiriblər.

Paylaş:

Baxılıb: 782 dəfə