Fransanın KİV nümayəndələri məcburi köçkünlərin həyat şəraiti ilə tanış olub

Bakı:

26 °C

65 %

9 m/s

Əlaqə

AZ RU EN

Ana səhifə / Sosial / Fransanın KİV nümayəndələri məcburi köçkünlərin həyat şəraiti ilə tanış olub

Fransanın KİV nümayəndələri məcburi köçkünlərin həyat şəraiti ilə tanış olub

08.10.2016 [10:09]

Ermənistan-Azərbaycan, Dağlıq Qarabağ münaqişəsi və qoşunların təmas xəttindəki vəziyyət barədə reportaj hazırlamaq məqsədilə ölkəmizdə səfərdə olan Fransanın məşhur “l’Opinion” qəzetinin müxbiri Klod Löbian, “Institute European Perspective and Security” beyin mərkəzinin direktoru Emanüel Düpüi və “TTU” qəzetinin baş redaktoru Qiyen Monsuən oktyabrın 7-də Abşeron rayonunun Masazır qəsəbəsi ərazisində məcburi köçkünlər üçün salınmış qəsəbədə yaradılan şəraitlə tanış olublar.
Qaçqınların və Məcburi Köçkünlərin İşləri üzrə Dövlət Komitəsindən AZƏRTAC-a bildiriblər ki, qurumun sədr müavini Fuad Hüseynov, Ermənistan-Azərbaycan, Dağlıq Qarabağ münaqişəsi nəticəsində illərdir qaçqın və məcburi köçkün vəziyyətində yaşayan soydaşlarımızın həyatı ilə tanış olub, bu barədə təmsil etdikləri mətbu orqanlarda reportajlar hazırlamaq məqsədilə ölkəmizə gəldiklərinə görə əcnəbi jurnalistlərə təşəkkürünü bildirib.
Məlumat verilib ki, doğma yurdlarını tərk etmiş bu insanların bütün problemlərinin həllini Azərbaycan hökuməti öz üzərinə götürüb. Qaçqınların və məcburi köçkünlərin məşğulluq, təhsil, yaşayış, tibbi, sosial təminatı ilə əlaqədar hərtərəfli tədbirlərin həyata keçirilməsi məqsədilə Azərbaycan Prezidentinin Sərəncamı ilə Dövlət Proqramı və ona Əlavələr təsdiq edilib. Azərbaycan hökuməti tərəfindən indiyədək məcburi köçkünlər üçün bütün sosial-texniki infrastruktura malik 95 yaşayış kompleksi salınıb, 50 min ailənin və ya 250 min nəfərdən çox məcburi köçkünün mənzil-məişət şəraiti yaxşılaşdırılıb. Qaçqın və məcburi köçkünlərin sosial problemlərinin həlli üçün son 23 ildə təxminən 6 milyard ABŞ dollarından çox vəsait sərf olunub.
F.Hüseynov, həmçinin diqqətə çatdırıb ki, Ermənistanın təcavüzkar siyasəti nəticəsində münaqişə həll olunmadığından bu gün on millərlə soydaşımız hələ də yataqxanalarda, tikintisi yarımçıq qalmış binalarda ağır şəraitdə yaşayırlar. Onların mənzil problemlərinin həlli istiqamətində Azərbaycan dövləti mərhələli şəkildə tədbirlər həyata keçirir.
Xarici KİV nümayəndələri 540 yerlik 33 nömrəli Zəngilan rayon tam orta məktəbdə yaradılan şəraitlə tanış olub, 280 yerlik uşaq bağçasında təhsil alan balacaların əl işlərinə baxıblar. Qonaqlar körpələrin ifasında xalqlar arasında sülhü və dostluğu tərənnüm edən mahnıları dinləyiblər.
Əcnəbi jurnalistlər məhəllədə məskunlaşmış məcburi köçkünlərin həyat şəraiti ilə da tanış olublar. Zəngilandan olan məcburi köçkün Ərşad Piriyevin mənzilindəki çay süfrəsi ətrafında söhbət zamanı qonaqların diqqətinə çatdırılıb ki, bu gün Azərbaycan dövləti qaçqın və məcburi köçkün həyatı yaşayan vətəndaşlarına hərtərəfli qayğı və diqqət göstərir, onların problemlərinin həllini daim diqqət mərkəzində saxlayır. Bütün bunlara baxmayaraq, məcburi köçkünlər doğma yurdlarına qayıtmaq arzusu ilə yaşayırlar. Onlar əmindirlər ki, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə bu arzuları tezliklə reallaşacaq.

Paylaş:

Baxılıb: 666 dəfə