“Skandinaviya-Azərbaycan əlaqələrində gənclərin rolu” mövzusunda konfrans təşkil edilib

Bakı:

28 °C

50 %

4 m/s

Əlaqə

AZ RU EN

Ana səhifə / Sosial / “Skandinaviya-Azərbaycan əlaqələrində gənclərin rolu” mövzusunda konfrans təşkil edilib

“Skandinaviya-Azərbaycan əlaqələrində gənclərin rolu” mövzusunda konfrans təşkil edilib

30.10.2018 [08:38]

Oktyabrın 29-da “Azərkitab” Kitab Təbliğatı Mərkəzində “Skandinaviya-Azərbaycan əlaqələrində gənclərin rolu” mövzusunda konfrans keçirilib.
AZƏRTAC xəbər verir ki, Gənc Politoloqlar Mərkəzinin sədri İlkin Əliyev tədbirdə İsveçdə, Norveçdə və ABŞ-da yaşayan 20-dən çox gəncin iştirak etdiyini deyib. Bildirib ki, gənclərin Azərbaycana bu səfərinin əsas məqsədi ölkəmizi tanıtmaq, müstəqil dövlətimizin yürütdüyü daxili və xarici siyasətin mahiyyətini, onun iqtisadi, turizm potensialını, tarixini, mədəniyyətini, ən əsası, gənclərin necə yaşamasını, təhsil almasını onlara göstərməkdən ibarətdir.
Sonra İlkin Əliyev Gənc Politoloqlar Mərkəzinin yaranma tarixi və fəaliyyəti haqqında məlumat verib. Bildirib ki, təşkilat gənclərin hərbi-vətənpərvərlik tərbiyəsində, milli-mənəvi dəyərlərimizin təbliğində fəal iştirak edib. Dövlət və qeyri-hökumət təşkilatları ilə sıx əməkdaşlıq edən qurum Qeyri-Hökumət Təşkilatlarına Dövlət Dəstəyi Şurasının və Gənclər Fondunun qrant layihələri əsasında respublikamızda bir çox layihələr həyata keçirib.
Konfransda iştirak edən Prezident Administrasiyasının İctimai-siyasi məsələlər şöbəsinin sektor müdiri Qafar Əliyev tədbirin əhəmiyyətindən danışıb. O, bu konfransın əslində dostların görüşü olduğunu deyib.
Yeni Azərbaycan Partiyası Siyasi Şurasının üzvü, “İki Sahil” qəzetinin baş redaktoru Vüqar Rəhimzadə bildirib ki, dünyanın müxtəlif yerlərindən gənclərin Azərbaycana gəlmələri, burada görülən işlərlə yaxından tanış olmaları çox əhəmiyyətlidir. O, əmin olduğunu bildirib ki, qonaqlar Azərbaycandan öz ölkələrinə xoş təəssüratlarla qayıdacaqlar. Bu konfransda iştirak edən hər bir gənc öz ölkəsində Azərbaycanın elçisi rolunu oynayacaq.
Baş redaktor gənclərə Azərbaycanın əldə etdiyi uğurlar, ölkəmizdəki multikultural və tolerant mühit barədə ətraflı məlumat verib.
İsveçin “UMAF” Gənclər Təşkilatının sədri Siavoş Derakhti xarici gənclərin Azərbaycana səfərinin və keçirilən konfransın önəmini qeyd edib. O, rəhbərlik etdiyi təşkilatın gördüyü işlər barədə də tədbir iştirakçılarına məlumat verib.
“SƏS” Media Qrupun rəhbəri Bəhruz Quliyev Azərbaycanın inkişafı, ölkəmizdə mətbuat sahəsinə dövlətin göstərdiyi diqqət və qayğı barədə danışıb. O bildirib ki, Ulu öndər Heydər Əliyevin hakimiyyətə qayıdışından sonra Azərbaycanda mətbuatın inkişafında yeni mərhələ başlandı. Ulu öndərin əsasını qoyduğu bu siyasət hazırda Prezident İlham Əliyev tərəfindən uğurla davam etdirilir.
Digər çıxış edənlər Azərbaycan dövlətinin daxili və xarici siyasəti, ölkəmizdə mövcud olan dini tolerantlıq və multikulturalizm mühiti, aparılan uğurlu iqtisadi, siyasi və hüquqi islahatlar, gənclər siyasəti barədə məlumatların, Dağlıq Qarabağ münaqişəsi ilə bağlı həqiqətlərin dünya gənclərinə çatdırılması məqsədilə belə tədbirlərin keçirilməsini yüksək qiymətləndiriblər.
Konfransda gənclərin sualları cavablandırılıb.

Paylaş:

Baxılıb: 563 dəfə