Aysel Məmmədova: Biz müəllimlər də balalarımızın xoşbəxt gələcəyi üçün əlimizdən gələni etməliyik

Bakı:

19 °C

72 %

3 m/s

Əlaqə

AZ RU EN

Ana səhifə / Sosial / Aysel Məmmədova: Biz müəllimlər də balalarımızın xoşbəxt gələcəyi üçün əlimizdən gələni etməliyik

Aysel Məmmədova: Biz müəllimlər də balalarımızın xoşbəxt gələcəyi üçün əlimizdən gələni etməliyik

18.07.2019 [09:16]

Təhsil Nazirliyi müəllimlərin işə qəbulu üzrə müsabiqədə yüksək bal toplayan müəllimlərin adlarını açıqlayıb
Məlum olduğu kimi, iyulun 16-da ibtidai sinif üzrə müəllimlərin işə qəbulu imtahanlarında yüksək nəticə qeydə alınıb. Belə ki, namizədlərdən Aysel Məmmədova imtahanda 58 bal toplayıb.
Beləliklə, “Yeni Azərbaycan” qəzeti olaraq yüksək bal toplayan müəllimləri oxucularımızla tanış edirik. Ümumtəhsil müəssisələrinə müəllimlərin işə qəbulu üzrə müsabiqənin test mərhələsində iştirak edən Aysel Xanlar qızı Məmmədova ona təqdim olunan sualları düzgün cavablandıraraq 58 bal toplayıb. Məlumat üçün bildirək ki, Aysel Məmmədova Azərbaycan Dövlət Pedaqoji Universitetinin ibtidai təhsilin pedaqogikası və metodikası ixtisası üzrə təhsil alıb. Daha sonra özəl kursların birində fəaliyyətini davam etdirib. 2015-ci ildə 45 bal toplayan Aysel 2016-da yenidən özünü sınayıb və nəticədə 55 bal toplayıb: A.Məmmədova Səbail rayonu, 50 saylı tam orta məktəbə qəbul olub. Mehdiabadda yaşadığı üçün buraya dəyişim edib. Yüksək nəticə göstərən müsahibimiz imtahan təəssüratlarını qəzetimizin oxucuları ilə bölüşüb: “İmtahanda yüksək nəticə göstərəcəyimə əmin idim. Orta səviyyəli suallar idi. Heç bir hazırlıq kurslarına getmədən özüm 58 bal topladım. Sırf imtahan üçün yox, savadlı müəllim olmaq üçün hər zaman əzmlə çalışmışam. Seçimimi isə daha mərkəzi yerlərdə yerləşən məktəblərdən yana edəcəyəm. Vakansiyaları gözləyirəm”.
“Müəllimlik şərəfli peşədir. Öyrətmək eşqi məni bu peşəni seçməyə sövq etdi. Düşünürəm ki, şagirdləri də dərsə həvəsləndirmək bizim vəzifəmizdir. Mənim şagirdlərim dərslərimə çox böyük həvəs göstərirlər. Çalışıram ki, dərslərimi əyləncəli və fərqli üslubda keçirim ki, şagirdlərim dərslərini sevərək öyrənsinlər. İki övladım var. Xatırladım ki, qızımın ibtidai sinif müəlliməsi özüm olmuşam. Onu digər şagirdlərimdən heç vaxt seçməmişəm. Hər biri mənim övladımdır. Biz şagirdlərlə yanaşı, valideynlərlə də daim ünsiyyətdə oluruq. Hər bir valideynin narahatlığını dərk edir, bu məsuliyyətli vəzifəni layiqincə yerinə yetirməyə çalışırıq. Belə bir deyim var, o şagird şanslıdır ki, onun qarşısına yaxşı müəllim çıxıb. Biz müəllimlər də balalarımızın xoşbəxt gələcəyi üçün əlimizdən gələni etməliyik”, - deyə A.Məmmədova söyləyib.
Qeyd edək ki, müəllimlərin işə qəbulu üzrə imtahanlar iyulun 24-dək davam edəcək.
MÜŞFİQƏ

Paylaş:

Baxılıb: 515 dəfə