Koronavirusla mübarizədə bütün vətəndaşlar məsuliyyətli olmalıdırlar

Bakı:

29 °C

42 %

3 m/s

Əlaqə

AZ RU EN

Ana səhifə / Sosial / Koronavirusla mübarizədə bütün vətəndaşlar məsuliyyətli olmalıdırlar

Koronavirusla mübarizədə bütün vətəndaşlar məsuliyyətli olmalıdırlar

30.07.2020 [09:55]

Ekspertlər hesab edirlər ki, hazırda müvafiq qaydalara riayət etməklə müsbət tendensiyanı qorumaq mümkündür
Məlum olduğu kimi, bütün dünyanı cənginə almış yeni növ koronavirus (COVID-19) infeksiyasının Azərbaycanda yayılması ilə bağlı mövcud sanitar-epidemioloji vəziyyəti təhlil edən Nazirlər Kabineti ölkə üzrə xüsusi karantin rejiminin uzadılması barədə qərar qəbul edib. Eyni zamanda, mövcud sanitar-epidemioloji vəziyyətə uyğun olaraq Bakı, Cəlilabad, Gəncə, Masallı, Mingəçevir, Sumqayıt, Yevlax şəhərlərində və Abşeron, Bərdə, Goranboy, Göygöl, Xaçmaz, Siyəzən və Şəki rayonlarında sərtləşdirilmiş xüsusi karantin rejimi avqustun 5-dək uzadılıb. Qeyd edək ki, xüsusi karantin rejimi şəraitində müvafiq qərarlar məhz ölkə vətəndaşlarının sağlamlığı və təhlükəsizliyi nəzərə alınaraq qəbul edilir. Buna görə də Nazirlər Kabineti yanında Operativ Qərargahın müəyyən etdiyi qaydaların vətəndaşlar tərəfindən icrasının zəruriliyi mühüm əhəmiyyət kəsb edir. Ekspertlərin fikrincə, pandemiya ilə mübarizənin səmərəliliyi üçün vətəndaşlar mütləq qoruyucu vasitələrdən istifadə etməli, eyni zamanda məhdudlaşdırıcı tələblərin yerinə yetirilməsinə ciddi yanaşmalıdırlar.
Məsələ ilə bağlı Milli Məclisin deputatı Afət Həsənova bildirib ki, ölkəmizdə koronavirusla mübarizə istiqamətində görülən tədbirlər, o cümlədən sərt karantin rejiminin iyunun 21-dən etibarən yenidən tətbiqi artıq öz müsbət nəticələrini verməkdədir. Onun sözlərinə görə, son günlərin statistikasına nəzər salsaq yoluxanların sayında azalmanın, sağalanların sayında isə artımın müşahidə olunduğunun şahidi oluruq. Əlbəttə ki, bu çox sevindirici haldır və indiyə qədər görülən işlərin nəticəsidir. Lakin bu müsbət tendensiyanın davam etdirilməsi və uğurlu sonluğa çatmaq üçün hər bir vətəndaş öz üzərinə düşən məsuliyyəti sona qədər yerinə yetirməlidir. Yəni görülən işlərin tam müsbət nəticə verməsi üçün ictimaiyyətin bütün üzvlərinin dəstəyi olduqca vacibdir.
Bununla belə, millət vəkili qeyd edib ki, ölkəmizdə koronavirusla bağlı müsbət tendensiyanın müşahidə edilməsi heç bir halda insanlarımızı arxayınlaşdırmamalıdır: “Unutmamalıyıq ki, pandemiya hələ bitməyib. Təəssüflər olsun ki, koronavirus bütün dünyanı ciddi təhdidlə üz-üzə qoymaqda davam edir. Bu baxımdan əldə olunan müsbət nəticələri sona qədər davam etdirmək üçün və uğurlu sonluğa çatmaq üçün hər kəs karantin rejiminin qaydalarına riayət etməlidir”.
“Yeni növ koronavirus infeksiyasının ölkəmizdə geniş yayılmasının qarşısını almaq üçün ilk günlərdən dövlət bütün addımları atır”. Bu fikirləri isə Milli Məclisin deputatı Müşfiq Məmmədli deyib.
M.Məmmədli bildirib ki, hazırda Bakıda və digər bır sıra bölgələrimizdə sərt karantin rejiminin davam etməsi də insanların sağlamlığına və təhlükəsizliyinə xidmət edir. Onun sözlərinə görə, COVID-19 pandemiyası şəraitində ölkə əhalisinin birlik və həmrəylik göstərməsi vacib şərtdir. Ona görə də qarşıdakı müddətdə virusun geniş yayılmaması, insanlar arasında daha təhlükəli fəsadlar yaratmaması üçün hər bir vətəndaşın karantin rejiminin qaydalarına ciddi şəkildə əməl etməsi olduqca vacibdir. Bu təhlükə hələ də var və əgər insanlar səhlənkarlıq edərlərsə, infeksiya yenidən geniş şəkildə yayıla bilər. Bu səbəbdən, vətəndaşlar daha diqqətli olmalı, özünütəcridə daha çox önəm verməlidirlər.
“Bilirsiniz ki, karantin rejiminin uzadılması nəticəsində son günlər yoluxma sayında azalma, xəstəlikdən sağlamaların sayı isə artım müşahidə olunur. Bu müsbət tendensiyanın davam etməsi üçün vətəndaşlar qaydalara əməl etməlidirlər. İctimai nəqliyyatda, ofislərdə və digər yerlərdə maskadan istifadə olunmalıdır. Tibbi maska, bir yarım-iki metr məsafə və dezinfeksiya vasitələri insanları 95 faiz yoluxmadan qoruyur. Eləcə də gigiyenik qaydalara əməl edilməli, insanlarla təmasda ən azı 2 metr sosial məsafə saxlanmalıdır. Bu, özümüzün, yaxınlarımızın, bütövlükdə cəmiyyətimizin qorunması üçündür. Hər birimiz bu qaydalara əməl etməklə virusa tam qalib gəlməliyik”, - deyə deputat qeyd edib.
Nardar BAYRAMLI

Paylaş:

Baxılıb: 608 dəfə