Yağışdan sonra çıxan “təhlükə”

Bakı:

25 °C

50 %

1 m/s

Əlaqə

AZ RU EN

Ana səhifə / Sosial / Yağışdan sonra çıxan “təhlükə”

Yağışdan sonra çıxan “təhlükə”

19.11.2021 [10:58]

Göbələkdən zəhərlənənlərin sayı niyə artıb?

Payız-qış fəsli, xüsusilə də, yağışların yağması və göbələk mövsümünün başlaması ilə zəhərlənmə hallarında artım müşahidə olunur. Yağışdan sonra çıxan göbələk kimi zəhərlənmələr də artıb. Əfsuslar olsun ki, vətəndaşların məlumatsızlığı, göbələyin zəhərli olub-olmadığını ayırd etməkdə çətinlik çəkməsi faciə ilə sonlanır.

Elə Qax rayonunda bir ailənin dörd fərdinin göbələkdən zəhərlənməsi, onlardan iki azyaşlının dünyasını dəyişməsi, bu hadisədən nə az, nə çox bir gün sonra Zaqatala rayonunda da 3 nəfər - ata, ana və övladının zəhərlənməsi bu məsələdə bir daha ciddi siqnal oldu.

Həmçinin noyabrın 4-də Qax rayonunda sutka ərzində daha iki ailə göbələkdən zəhərlənib. Həmin şəxslər ərizələrində də meşə sahəsindən yığdıqları göbələyi yedikdən sonra vəziyyətlərinin pisləşdiyini bildiriblər.

Verilən məlumata görə, göbələkdən zəhərlənmə halları yalnız bölgələrdə deyil, paytaxtda da qeydə alınıb. Belə ki, noyabrın ilk həftəsində Kliniki Tibbi Mərkəzin Toksikologiya şöbəsinə zəhərlənmə ilə bağlı müraciət edən 49 nəfərdən 8-i göbələkdən zəhərlənib.

Baş toksikoloq: İnsanlar meşədən toplanılmış göbələyi yeməməli, göbələk alarkən mütləq diqqətli olmalıdırlar

Ətrafımızda zəhərlənmə ehtimalını nəzərə alıb göbələk yeməyənlər də var. Bəs göbələksevərlər nə etməlidir?

Kliniki Tibbi Mərkəzin Toksikologiya şöbəsinin müdiri, baş toksikoloq Azər Maqsudov göbələkdən zəhərlənmə halları ilə bağlı qəzetimizə açıqlama verərkən bildirib ki, Qax və Zaqatala rayonlarından xəstəxanaya müraciət edənlərin sayında artım var. Belə ki, son bir ay ərzində sözügedən rayonlardan göbələkdən zəhərlənmə diaqnozu ilə 30 nəfər xəstəxanaya göndərilib. Mütəxəssisin sözlərinə görə, insanlar meşədən toplanılmış göbələyi yeməməli, göbələk alarkən mütləq diqqətli olmalıdırlar. Yeməli göbələyin içərisinə bir tək zəhərli göbələyin qarışması belə bütün ailənin zəhərlənməsinə və məhvinə səbəb ola bilər: “Amma marketdə satılan, qablaşdırılmış göbələklər zərərsiz hesab edilir. Lakin məhsulu alarkən etiket məlumatları, yəni saxlanma tarixi mütləq nəzərdən keçirilməlidir. Məhsulun yararlılıq müddəti ötdükdə, düzgün şəraitdə saxlanmadığı halda da zəhərlənmə qaçınılmazdır. Göbələkdən zəhərlənməyə şübhə yarandığı halda dərhal həkimə müraciət etmək lazımdır”.

Bak toksikoloq, həmçinin ağır qida toksiki infeksiyası qrupuna aid olan botulizm xəstəliyi haqqında da məlumat verib. Bildirilib ki, botulizm düzgün konservləşdirilməmiş qida məhsullarının - balıq, ət konservləri, meyvə-tərəvəz və s. qəbulu nəticəsində yaranır. Evdar xanımların tutmalar hazırlayarkən sanitar-gigiyenik qaydalara düzgün riayət etmələri tövsiyə olunur.

MÜŞFİQƏ

Paylaş:

Baxılıb: 949 dəfə