Böyük Qayıdışın təntənəsi…

Bakı:

26 °C

50 %

9 m/s

Əlaqə

AZ RU EN

Ana səhifə / Sosial / Böyük Qayıdışın təntənəsi…

Böyük Qayıdışın təntənəsi…

23.11.2023 [11:30]

Laçına köçənlərin sayı 1326 nəfər oldu!

Yeganə BAYRAMOVA

44 günlük Vətən müharibəsində qazanılan şanlı Zəfərdən sonra dövlətimizin qarşısında dayanan ən mühüm hədəflərdən biri işğaldan azad edilmiş ərazilərimizin bərpasını və keçmiş məcburi köçkünləri doğma yurdlarına qayıdışını təmin etməkdir. Döyüş meydanında düşməni diz çökdürən və kapitulyasiyaya məruz qoyan qalib Azərbaycan bərpa və quruculuq işlərini də qısa müddətdə və yüksək səviyyədə həyata keçirmək əzmindədir. Ötən dövrdə reallaşdırılan layihələr onu deməyə əsas verir ki, respublikamız işğaldan azad olunmuş ərazilərin bərpası, soydaşlarımızın məskunlaşdırılması ilə bağlı qarşıya qoyulan vəzifələrin öhdəsindən layiqincə gəlməkdədir.

Ötən il Prezident İlham Əliyevin müvafiq Sərəncamı ilə təsdiq edilən “Böyük Qayıdış”la bağlı 2022-2026-cı illəri əhatə edən Dövlət Proqramı işğaldan azad edilmiş torpaqlarımıza yenidən həyatın qaytarılmasında mühüm rola malikdir.

Daha 81 nəfər Laçına köçdü

Ölkə başçısının tapşırığına uyğun olaraq, yenidən qurulan Laçın şəhərinə keçmiş məcburi köçkünlərin qayıdışı davam edir. Köçürülən ailələr Laçın şəhərində vaxtilə yaşadıqları, işğala son qoyulduqdan sonra dövlətimizin başçısının göstərişi əsasında bərpa edilən və ya yenidən tikilən evlərdə məskunlaşacaqlar.

Dünən növbəti köç karvanı Bakının Qaradağ rayonundakı “Qobu park 3” yaşayış kompleksindən yola salınıb. Bu mərhələdə Laçın şəhərinə daha 21 ailə - 81 nəfər köçürülür. Hər ötən gün gözəlləşən Laçında artıq 346 ailə məskunlaşıb. Şəhərdə həyat öz axarı ilə davam edir. Eyni zamanda, Laçına köçürüləcək ailələrin məskunlaşması üçün tikinti və bərpa işləri davam etdirilir. Bununla da Laçın şəhərinə köçürülənlərin sayı 1326 nəfərə çatıb.

Hisslərim təsviredilməzdir…

Laçın sakini, Birinci Qarabağ müharibəsinin iştirakçısı Ramiz Umudov doğma torpağına qovuşması ilə bağlı təəssüratlarını bölüşüb: «Hisslərim təsviredilməzdir. Bu qayıdış həyatımın ən böyük, misli görünməmiş hadisəsidir.

Bir tərəfdən qayıtdığıma görə sevinir, digər tərəfdən şəhid verdiyimizə görə üzülürəm. Bu günləri bizə nəsib etmiş şəhidlərə rəhmət, qazilərə cansağlığı diləyirəm”.

Çox xoşbəxtəm...

Laçın sakini Ülviyyə Atakişiyeva Laçını 12 yaşında valideynləri ilə birlikdə tərk edib: “Uşaqlığımı qoyub gəldiyim torpaqlara, doğma yurduma qayıdıram. Uşaqların yaddaşından heç nə çıxmadığı üçün o günləri qanlı-qadalı günlər kimi xatırlayıram. Qaçqın həyatı çox ağırdır. Kiçik bir dəhlizdə 5-10 ailənin bir yerdə yaşaması çox çətindir.

İndi isə şükürlər olsun ki, öz doğma torpağıma, yurduma geri dönürəm. Buna görə çox xoşbəxtəm. Bu günlərimizi şəhidlərimizə borcluyuq. Allah şəhidlərimizi rəhmət eləsin, qazilərimizə can-sağlığı versin. Dövlətimizə təşəkkürümüzü bildiririk ki, torpaqlarımızı işğaldan azad edib, evlərimizi təmir edib və qayıtmağımıza şərait yaradıb. Hətta evimiz əvvəlkindən belə daha yaxşı təmir olunub”.

Torpaq həsrətinə Laçında son qoyacağam...

Laçın sakini Bayramov Nəsibin sözlərinə görə, 25 yaşında düşmənlərin torpaqlarımızı işğal etməsi nəticəsində Laçını tərk etməli olub: “Torpaq həsrətinə həmişəlik olaraq Laçında son qoyacağam və bunun üçün çox sevinirəm. Torpaqlarımızın müdafiəsində 4 qardaş iştirak etmişik. Bir qardaşım döyüşlərdə şəhid olub. Allah bütün şəhidlərimizə rəhmət eləsin, qazilərimizə can-sağlığı versin. Allah Prezidentimizi qorusun”.

Laçını ağlaya-ağlaya tərk etmişdim...

Laçın sakini Cəmilə Bayramovanın sözlərinə görə, doğma yurdu olan Laçına qayıdır: “Buna görə Prezidentimizə dərin təşəkkürümüzü bildiririk. Allah şəhidlərimizə rəhmət eləsin, qazilərimizə can-sağlığı versin. 24 yaşımda ailəmizlə birlikdə Laçını ağlaya-ağlaya tərk etmişəm. Bu gün isə sevinə-sevinə həyat yoldaşım, oğlum və qızımla birlikdə Laçına dönürük. Orada yaşayıb, orada çalışacağıq.

Sevincimizin həddi-hüdudu yoxdur

Laçın sakini Rəşad Əsədov bildirib ki, uzun illər yataqxana şəraitində yaşamaq çox çətindir: “Bu gün uşaq ikən tərk etdiyim Laçına ailəmlə birlikdə dönürəm. 31 ildən sonra yurda qayıtmaq sevincimizin həddi-hüdudu yoxdur. Laçında sökülmüş evimiz artıq təmir olunub. İndi öz yurdumda, ev-eşiyimdə yaşamağa getdiyim üçün çox sevinirəm”.

83 yaşında Laçına qayıtdı...

Laçın sakini Vaqif Şükürovun sözlərinə görə, tarixdə indiyə kimi belə bir hadisə təkrarlanmayıb ki, bir dövlətin 20% ərazisi başqa bir dövlət tərəfindən 28 il işğal olunsun və 28 il işğaldan sonra o ərazi geri alınsın: “Əslində bunun özü bir möcüzə sayıla bilər. 83 yaşımda doğma yurdum Laçını görmək, Laçında yaşamaq məndə ruh yüksəkliyi yaradır. Bütün keçmiş məcburi köçkünlərin öz yurdlarına qayıdaraq yaşamalarını arzulayıram”.

Bundan böyük sevinc ola bilməz

Laçın sakin Rauf Şahsuvarov bildirib ki, Laçın günü-gündən dirçəlməkdədir: “Orada quruculuq işləri davamlı şəkildə aparılır. Bu isə hamımızı sevindirir. Doğma yurda qayıdışdan böyük sevinc hissi ola bilməz. Öz yurdundan uzun illər didərgin düşmüş insanların geri qayıtmalarını arzulayıram.

Xankəndidə üç rəngli bayrağımızın dalğalanması bizi ürəkdən sevindirdi. İnşallah oraya da sakinlərimiz qayıdacaq. Ali Baş Komandanımıza təşəkkürümüzü bildiririk. Yəqin ki, ölkə başçısının rəhbərliyi, xalqımızın birliyi nəticəsində daha çox xoş günlərimiz qarşıda olacaq”.

Paylaş:

Baxılıb: 680 dəfə