Azərbaycan ilə Səudiyyə Ərəbistanı arasında əlaqələr dostluq və qardaşlıq səviyyəsindədir

Bakı:

18 °C

88 %

3 m/s

Əlaqə

AZ RU EN

Ana səhifə / Xarici siyasət / Azərbaycan ilə Səudiyyə Ərəbistanı arasında əlaqələr dostluq və qardaşlıq səviyyəsindədir

Azərbaycan ilə Səudiyyə Ərəbistanı arasında əlaqələr dostluq və qardaşlıq səviyyəsindədir

06.06.2014 [09:39]

İyunun 5-də Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Səudiyyə Ərəbistanı-Azərbaycan parlamentlərarası dostluq qrupunun üzvlərindən ibarət nümayəndə heyəti ilə görüşüb.
AzərTAc xəbər verir ki, görüşdə Allahşükür Paşazadə Səudiyyə Ərəbistanı-Azərbaycan əlaqələrindən danışıb, iki ölkə arasında bütün sahələrdə münasibətlərin sürətlə inkişaf etdiyini bildirib. Qeyd edilib ki, hər iki ölkə bütün beynəlxalq təşkilatlarda bir-birini dəstəkləyir. Şeyxülislam ölkələrimiz arasında əlaqələrin bundan sonra da genişlənəcəyinə əminliyini ifadə edib.
Allahşükür Paşazadə yüksək səviyyəli görüşlərin əlaqələrin inkişafına töhfə verdiyini diqqətə çatdırıb. Hər iki ölkənin parlamentlərinin və digər qurumlarının bu əlaqələrin möhkəmlənməsində xüsusi rolunun olduğu vurğulanıb.
Ermənistan-Azərbaycan, Dağlıq Qarabağ münaqişəsi barədə qonaqlara məlumat verən şeyxülislam Azərbaycanın haqlı mövqeyini, ərazi bütövlüyünü və suverenliyini daim dəstəklədiyinə görə Səudiyyə Ərəbistanına minnətdarlığını bildirib.
Sovet dövründə Azərbaycanda məscidlərin sayının o qədər də çox olmadığını deyən A.Paşazadə bildirib ki, müstəqillik illərində ölkəmizdə xeyli sayda məscid tikilərək istifadəyə verilib. Eləcə də Azərbaycanda sinaqoq və kilsələr fəaliyyət göstərir. Bunlar hamısı Ulu öndər Heydər Əliyevin və Prezident İlham Əliyevin dəstəyi sayəsində mümkün olub.
Səudiyyə Ərəbistanı-Azərbaycan parlamentlərarası dostluq qrupunun sədri Abdulla ibn Məhəmməd Ən-Nasir ölkələrimiz arasında münasibətlərin hazırkı səviyyəsinin məmnunluq doğurduğunu bildirib. O, iki ölkə arasında əlaqələrin qurulmasında Azərbaycan xalqının Ümummilli lideri Heydər Əliyevin böyük xidmətləri olduğunu vurğulayıb. Bildirilib ki, bu gün Səudiyyə Ərəbistanı-Azərbaycan münasibətləri dostluq və qardaşlıq səviyyəsindədir.
Dağlıq Qarabağ münaqişəsinə toxunan Abdulla ibn Məhəmməd Ən-Nasir qeyd edib ki, Səudiyyə Ərəbistanının bu məsələdə mövqeyi dəyişməzdir. Rəsmi Ər-Riyad Azərbaycanın ərazi bütövlüyünü dəstəkləyir.
Görüşdə çıxış edən Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov, Aqrar siyasət komitəsinin sədri Eldar İbrahimov və deputat Siyavuş Novruzov Azərbaycanın haqq işini hər zaman bütün beynəlxalq təşkilatlarda dəstəklədiyinə görə Səudiyyə Ərəbistanına minnətdarlıqlarını bildiriblər. Qeyd edilib ki, bu gün Azərbaycan İslam dəyərlərini bütün dünyada uğurla təbliğ edir. Ölkəmiz İslam Əməkdaşlıq Təşkilatının fəal üzvüdür.

Paylaş:

Baxılıb: 1800 dəfə