Azərbaycanın gənclər və idman naziri BMT Baş Məclisinin sessiyasında çıxış edəcək

Bakı:

18 °C

88 %

3 m/s

Əlaqə

AZ RU EN

Ana səhifə / Xarici siyasət / Azərbaycanın gənclər və idman naziri BMT Baş Məclisinin sessiyasında çıxış edəcək

Azərbaycanın gənclər və idman naziri BMT Baş Məclisinin sessiyasında çıxış edəcək

18.10.2014 [11:20]

Azərbaycanın gənclər və idman naziri Azad Rəhimov Nyu-Yorkda keçiriləcək BMT Baş Məclisinin 69-cu sessiyasında iştirak etmək məqsədilə oktyabrın 20-də ABŞ-a səfər edəcək.
Bu barədə AzərTAc-a Gənclər və İdman Nazirliyindən məlumat verilib.
Məlumatda deyilir ki, sessiya çərçivəsində “İnkişaf və sülh naminə idman” bəndi altında müzakirələr keçiriləcək.
Müzakirələrdə nazir Azad Rəhimov çıxış edərək müstəqilliyini bərpa etdiyi gündən Azərbaycanın bir çox Avropa və dünya çempionatlarına ev sahibliyi etməsi, 2016-cı ildə 42-ci Dünya Şahmat Olimpiadasının və “Formula-1” üzrə Avropa “Qran-pri” avtomobil yarışının, 2017-ci ildə dördüncü İslam Həmrəyliyi Oyunlarının, 2020-ci ildə isə futbol üzrə Avropa çempionatının final mərhələsinin 4 oyununun Bakıda keçiriləcəyi haqqında məlumat verəcək.
Eyni zamanda, A.Rəhimov Təşkilat Komitəsinin sədri Azərbaycanın birinci xanımı, Heydər Əliyev Fondunun prezidenti Mehriban Əliyeva olan və 2015-ci il iyunun 12-də Bakıda start götürəcək birinci Avropa Oyunlarına hazırlıqla bağlı məlumatları diqqətə çatdıracaq. Nazir ölkəmizdə 17 gün davam edəcək Avropa oyunlarına qitənin 6 mindən çox idmançısının qatılacağını və onların 20 idman növündə mübarizə aparacaqlarını, idmançıların və Azərbaycana gələcək turistlərin ölkəmiz haqqında müsbət rəy əldə etmələri və oyunların yüksək səviyyədə keçirilməsi üçün lazımi hazırlıq işlərinin görüldüyünü vurğulayacaq.
Nazir, həmçinin dövlətimizin başçısı, Milli Olimpiya Komitəsinin prezidenti İlham Əliyevin idmana diqqət və qayğısından, son 10 ildə ölkəmizdə 50-dən artıq idman obyektinin tikilib istifadəyə verilməsindən danışacaq, idmançılarımızın Olimpiya Oyunlarında, dünya, Avropa çempionatlarında, Çinin Nankin şəhərində keçirilmiş Yeniyetmələr arasında İkinci Olimpiya Oyunlarında qazandıqları qələbələr haqqında da iştirakçıları məlumatlandıracaq.
Sessiyada, həmçinin birinci Avropa Oyunlarının keçirilməsi ilə bağlı görülmüş işlər barədə dünya ictimaiyyətinə ətraflı məlumat verilməsi və təbliğat xarakterli tədbirlərin təşkili, o cümlədən idmanın inkişafı sahəsində ölkəmizin fəaliyyətinə, uğurlarına və birinci Avropa Oyunlarına həsr olunmuş sərginin təşkili və təbliğat xarakterli materialların paylanılması da planlaşdırılır.
Səfər oktyabrın 25-də başa çatacaq.

Paylaş:

Baxılıb: 1836 dəfə